Əraqçi: “Çinlə məsləhətləşmələr zamanı qəbul edilən qərarlar regiondakı strateji tarazlığa təsir edəcək”

İranın xarici işlər naziri Abbas Əraqçi Pekinə səfərini “uğurlu” adlandıraraq, Tehranla Pekin arasında strateji tərəfdaşlığın əhəmiyyətini vurğulayıb.

Əraqçi “X” platformasında bildirib ki, Çin rəsmiləri ilə aparılan məsləhətləşmələr regionun gələcəyi baxımından mühüm əhəmiyyət daşıyır.

“Çində tərəfdaşlarımızla uğurlu məsləhətləşmələr apardıq. İran zamanla formalaşdırdığımız strateji tərəfdaşlığı yüksək qiymətləndirir. Bu gün qəbul edilən qərarlar regionda gələcək strateji tarazlığı müəyyənləşdirəcək və geniş təsirlərə səbəb olacaq. Sədr Sinin sülhlə bağlı irəli sürdüyü dörd prinsip xüsusi əhəmiyyət daşıyır”, — Əraqçi yazıb.

 

Əraqçi Çin Xalq Respublikasının Sədri Si Cinpinin təkliflərinin detalları barədə məlumat verməyib. Çin tərəfinin açıqlamasına görə, xarici işlər naziri Van İ İran və ABŞ-ni İslamabad Anlaşma Memorandumuna qayıtmağa və danışıqları bərpa etməyə çağırıb. İran isə memorandumun qüvvədə qaldığını bildirib.

İranın keçmiş xarici işlər naziri Məhəmməd Cavad Zərif də Si Cinpinin təşəbbüsünü dəstəkləyib. Zərif 2015-ci ildə İranın nüvə proqramı ilə bağlı Birgə Hərtərəfli Fəaliyyət Planı (JCPOA) üzrə danışıqlarda İran nümayəndə heyətinə rəhbərlik edib.

“Sədr Sinin konstruktiv təşəbbüsləri gərginliyin azaldılması üçün mühüm imkanlar yaradır. Regionda davamlı təhlükəsizlik suverenliyə qarşılıqlı hörmət edilməsini, məcburetmə tədbirlərinə son qoyulmasını və beynəlxalq hüquqa riayət olunmasını tələb edir”, — Zərif “X” platformasında yazıb.

“Çoxtərəfli diplomatiya sabitliyə aparan yeganə real yoldur”, — o əlavə edib.

 

Əraqçi Pekinə səfəri zamanı Türkiyənin xarici işlər naziri Hakan Fidan və Pakistan ordusunun komandanı, feldmarşal Asim Munirlə ayrı-ayrılıqda telefonla danışıb. Tərəflər regiondakı son prosesləri və qarşılıqlı maraq doğuran məsələləri müzakirə ediblər.

Çin Yaxın Şərqdə vasitəçilik rolunu artırır

Çin 2023-cü ildə İran və Səudiyyə Ərəbistanı arasında diplomatik münasibətlərin bərpasına dair razılaşmanın əldə olunmasına vasitəçilik edib. Pekində əldə olunan razılaşmaya əsasən, Tehran və Ər-Riyad diplomatik münasibətləri bərpa etməyə və səfirliklərini yenidən açmağa razılaşıblar.

İran və Səudiyyə Ərəbistanı arasında diplomatik münasibətlər 2016-cı ildə kəsilmişdi. Buna Səudiyyə Ərəbistanında şiə din xadimi şeyx Nimr ən-Nimrin edamından sonra Tehrandakı Səudiyyə Ərəbistanı səfirliyinə və Məşəddəki konsulluğuna hücumlar səbəb olmuşdu.

İran və Çin arasında iqtisadi və ticarət əlaqələri ilə yanaşı, strateji əməkdaşlıq da mövcuddur. İki ölkə 2016-cı ildə hərtərəfli strateji tərəfdaşlıq qurduqlarını elan edib. 2021-ci ildə isə tərəflər 25 illik hərtərəfli əməkdaşlıq planı imzalayıblar.

• İranın Cənubi Qafqazda paradiqma dəyişikliyi
• Tramp İranın razılaşma əldə etmək istədiyini bildirir, Tehran bunu təkzib edir

Teqlər

Abbas Əraqçi İran Çin Van İ Si Cinpin Səudiyyə Ərəbistanı regional diplomatiya