Fransada ağıllı eynəklərlə bağlı cinayət işi açılıb

Fransa prokurorluğu ağıllı eynəklərdən istifadə ilə bağlı cinayət işi açıb. Araşdırma bu cihazların məxfilik üçün yaratdığı risklərlə bağlı narahatlığın artdığı bir vaxta təsadüf edir.

Paris prokurorluğu bildirib ki, sosial şəbəkələrdə yayılan tendensiya ilə bağlı şikayətlərdən sonra azı bir araşdırmaya başlanılıb. İddialara görə, ağıllı eynəklər vasitəsilə insanlar ictimai yerlərdə gizli şəkildə çəkilib və görüntülər onların razılığı olmadan internetdə yayımlanıb.

Səlahiyyətli qurumlar söhbətin hansı markadan getdiyini açıqlamayıb. Fransanın Məlumatların Qorunması üzrə Milli Komissiyası (CNIL) ağıllı eynəklərin iş yerlərində istifadəsi ilə bağlı şikayətlər aldığını bildirib. Qurumun məlumatına görə, iş yerlərində bu cihazların qadağan edilməsinin mümkünlüyü ilə bağlı şirkətlərdən daxil olan müraciətlərin sayı artır.

Məsələ Fransadan kənarda da tənzimləyici qurumların diqqətini çəkib. Birləşmiş Krallıqda bəzi kinoteatrlar ağıllı eynəklərdən istifadəni qadağan edib, Almaniyada istehlakçı hüquqlarını müdafiə edən qrup “Meta” və digər istehsalçılarla bağlı cinayət işi açılması üçün şikayət verib. Avstraliya isə kameralı ağıllı eynəklərin dövlət qurumlarının iş yerlərində qadağan edilməsini nəzərdən keçirir.

CNIL bildirib ki, bu texnologiya insanların çəkiliş barədə məlumatlandırılması və razılıqlarının alınması ilə bağlı suallar yaradır. Ağıllı eynəklərdə çəkiliş zamanı kiçik işıq yansa da, məxfilik hüquqlarını müdafiə edən fəallar bunun çəkilişə və görüntülərin internetdə yayılmasına razılıq verildiyi anlamına gəlmədiyini bildirirlər.

Kopyalandı