Azərbaycan və Gürcüstan 400 milyon dollarlıq sərhəd proqramından yararlana bilər

Azərbaycan, Gürcüstan və Qazaxıstan Asiya İnkişaf Bankının (AİB) Mərkəzi Asiya Regional İqtisadi Əməkdaşlıq (CAREC) regionunda sərhəd infrastrukturunun modernləşdirilməsi üçün təsdiqlədiyi 400 milyon dollarlıq regional maliyyələşdirmə mexanizminin əhatə etdiyi 11 ölkə arasındadır.

Sərhəd infrastrukturu modernləşdiriləcək

Maliyyə vəsaiti sərhəd-keçid məntəqələrinin infrastrukturunun modernləşdirilməsinə, rəqəmsal sistemlərin və müasir yoxlama və skan avadanlıqlarının tətbiqinə, həmçinin sərhəd prosedurlarının təkmilləşdirilməsinə yönəldiləcək.

Proqram Əfqanıstan, Azərbaycan, Çin, Gürcüstan, Qazaxıstan, Qırğızıstan, Monqolustan, Pakistan, Tacikistan, Türkmənistan və Özbəkistanı əhatə edir.

Maliyyələşdirmənin 320 milyon dolları adi kreditlər, 65 milyon dolları güzəştli kreditlər, 15 milyon dolları isə qrant hesabına təmin ediləcək.

Proqrama inkişaf tərəfdaşları və ixtisaslaşmış etimad fondlarından əlavə maliyyə vəsaitinin cəlb edilməsi də nəzərdə tutulur.

Artan ticarət sərhəd-keçid məntəqələrinə təzyiqi artırır

AİB bildirir ki, ticarət və yükdaşımaların artması CAREC regionundakı nəqliyyat dəhlizlərində sərhəd-keçid məntəqələrinin imkanlarının genişləndirilməsinə ehtiyac yaradır. Mövcud infrastruktur və sərhəd idarəetmə sistemlərindəki çatışmazlıqlar isə daşınma müddətini uzadır və xərcləri artırır.

Bankın məlumatına görə, yeni maliyyələşdirmə mexanizmi sərhəd-keçid məntəqələrinin modernləşdirilməsi, nəqliyyat və logistika xərclərinin azaldılması, eləcə də insanların və yüklərin sərhəddən daha sürətli keçidinin təmin edilməsi məqsədi daşıyır.

AİB-in Direktorlar Şurası 400 milyon dollarlıq proqramı təsdiqləyib.

• AİB: Orta Dəhliz Gürcüstanın daha gəlirli sahələrdə inkişafına imkan yaradır

• Gürcüstan və Türkmənistan yeni sazişlərlə Orta Dəhliz üzrə əməkdaşlığı dərinləşdirir

Teqlər

Azərbaycan Gürcüstan sərhəd gözləmə müddəti CAREC AİB