Azərbaycan Fransanın “özbaşına saxlanılma” ilə bağlı iddialarını rədd edib

Azərbaycan Fransanın Azərbaycana səfərlə bağlı xəbərdarlığını “özbaşına saxlanılma və ədalətsiz məhkəmə araşdırması riski” ilə əsaslandırmasını rədd edib.

Azərbaycan Xarici İşlər Nazirliyinin Mətbuat xidməti idarəsinin rəisi Ayxan Hacızadə 18 sentyabrda Fransa Xarici İşlər Nazirliyinin açıqlamalarını qətiyyətlə pisləyib və Parisin irəli sürdüyü iddiaları əsassız və qərəzli adlandırıb.

“Ayrı-ayrı cinayət işləri üzrə Azərbaycan qanunvericiliyinə uyğun həyata keçirilən məhkəmə proseslərinin siyasi mülahizələr əsasında təqdim edilməsi və Azərbaycan məhkəmə sisteminə müdaxilə cəhdləri qəbuledilməzdir”, — Ayxan Hacızadə bildirib.

Açıqlama Fransa Xarici İşlər Nazirliyinin mətbuat katibi Paskal Konfavrönün 17 sentyabrda Fransa vətəndaşlarına, o cümlədən ikili vətəndaşlığı olan şəxslərə zəruri hallar istisna olmaqla Azərbaycana səfər etməməklə bağlı tövsiyəni təkrarlamasından sonra verilib. Paris bunu “özbaşına saxlanılma və ədalətsiz məhkəmə araşdırması riski” ilə əsaslandırır.

Fransanın rəsmi səyahət tövsiyəsində bildirilir ki, bu risk turistlərə və işgüzar səfərə gələn şəxslərə də şamil oluna bilər. Sənəddə həbs və ya saxlanılma halında fundamental hüquqlara riayət olunmasına təminat verilmədiyi qeyd olunur.

Azərbaycanda həbsdə olan Fransa vətəndaşları ilə bağlı fikir ayrılığı

Son diplomatik açıqlamalar Azərbaycanda həbsdə olan Fransa vətəndaşları ilə bağlı fikir ayrılığı fonunda səsləndirilib.

Martin Ryan martda 10 il azadlıqdan məhrum edilib. Anass Derrazın isə ilkin 12 illik həbs cəzası iyunda apellyasiya məhkəməsi tərəfindən 9 ilə endirilib. Fransa bu işlərlə bağlı tənqidi mövqe sərgiləyib, Azərbaycan isə Fransa vətəndaşları ilə bağlı məhkəmə proseslərinin ölkə qanunvericiliyinə uyğun aparıldığını bildirir.

Rəsmi Bakı daha əvvəl Martin Ryanla bağlı Fransa tərəfinin tənqidlərini rədd edərək onun prosessual hüquqlarının təmin olunduğunu və Fransa səfirliyinin konsulluq nümayəndələrinin məhkəmə iclaslarında iştirak etdiyini bildirib.

Azərbaycanla Fransa arasında münasibətlər son illərdə bir sıra məsələlər fonunda kəskinləşib. 

Azərbaycan bu ittihamları rədd edir və Fransanın Ermənistanla, eləcə də keçmiş və hazırkı dənizaşırı əraziləri ilə bağlı siyasətini dəfələrlə tənqid edib.

Ayxan Hacızadə Fransa tərəfini Azərbaycanın suverenliyinə və daxili işlərinə hörmət etməyə, həmçinin ikitərəfli münasibətlərə zərər vuran yanaşmalara son qoymağa çağırıb.

• Fransa İranın addımına cavab olaraq iki iranlı diplomatı ölkədən çıxaracaq

Teqlər

Azərbaycan XİN Fransa XİN Məhkəmə araşdırması ikili vətəndaşlıq Fransa səfirliyi