Yaralı fələstinlini öldürən keçmiş hərbçinin məhkumluq qeydi silinib

İsrail Prezidenti İsxak Hersoq 2016-cı ildə İordan çayının qərb sahilində yaralı fələstinlini güllələyərək öldürdüyünə görə məhkum edilmiş keçmiş hərbçi Elor Azarianın məhkumluq qeydinin vaxtından əvvəl silinməsinə qərar verib.

Hersoq sentyabrın 19-da Azarianın məhkumluq qeydinin avtomatik silinməsi üçün qalan müddətin qısaldılması barədə müraciətini təsdiqləyib. Qərar dərhal qüvvəyə minib. Əks halda, məhkumluq qeydi 2032-ci ildə silinəcəkdi. Qərar İsrail ordusunun Baş Qərargah rəisi Eyal Zamir və digər yüksək vəzifəli zabitlərin etirazına baxmayaraq qəbul edilib.

Hadisə zamanı döyüş sanitarı olan Azaria 2016-cı il martın 24-də Hebronda yaralı vəziyyətdə yerdə uzanan 21 yaşlı Əbdülfəttah əl-Şərifi başından güllələyərək öldürüb. Əl-Şərif İsrail hərbçisini bıçaqladıqdan sonra əsgərlər tərəfindən vurulmuş və hərəkətsiz vəziyyətdə qalmışdı. Azaria ona təxminən 11 dəqiqə sonra atəş açıb. Hadisənin görüntüləri yayılaraq İsraildə və ölkə xaricində geniş müzakirələrə səbəb olub.

Hərbi rəhbərlik qərara qarşı çıxıb

Hersoqun ofisi bildirib ki, qərar verilərkən hadisədən keçən vaxt, Azarianın cəzasını çəkməsi, şəxsi və ailə vəziyyətində baş verən dəyişikliklər, eləcə də peşmanlığını ifadə etməsi nəzərə alınıb. Bildirilib ki, qərar hərbi məhkəmənin hökmünü yenidən qiymətləndirmək və ya həmin məhkəmə prosesini şübhə altına almaq məqsədi daşımır.

İsrail ordusunun Baş Qərargah rəisi Eyal Zamir və digər yüksək vəzifəli zabitlər isə müraciətin əleyhinə olublar. Onlar müdafiə nazirinə göndərdikləri məktubda Azarianın əməlinə görə peşmanlıq ifadə etmədiyini və məsuliyyəti üzərinə götürmədiyini bildiriblər. Azaria daha əvvəl atəş açmaqla düzgün davrandığını bildirib.

Azaria 2017-ci ildə adam öldürməkdə təqsirli bilinərək 18 ay həbs cəzasına məhkum edilib. Daha sonra onun cəzası 14 aya endirilib. O, doqquz ay həbsdə qaldıqdan sonra 2018-ci ilin mayında azadlığa buraxılıb.

Azarianın müraciətini dəstəkləyən İsrailin müdafiə naziri İsrael Kats Hersoqun qərarını alqışlayıb. O bildirib ki, keçmiş hərbçi cəzasını çəkib və ona həyatında yeni səhifə açmaq imkanı verilməlidir.

Azarianın işi İsraildə ciddi fikir ayrılığına səbəb olub. Hərbi rəhbərlik onun cinayət məsuliyyətinə cəlb edilməsini müdafiə edib, bir sıra israilli siyasətçilər və ictimaiyyət nümayəndələri isə Azariaya dəstək veriblər.

• “Adidas” keçmiş israilli hərbçiyə görə boykot çağırışları ilə üzləşib

Teqlər

İsrail İsxak Hersoq Elor Azaria məhkumluq qeydi yaralı fələstinli Baş Qərargah rəisi Eyal Zamir İsrailin müdafiə naziri İsrael Kats İordan çayının qərb sahili