“Dujuan” tayfunu Yaponiyada 4 nəfərin ölümünə səbəb olub

Yaponiyanın Sakit okean sahillərində “Dujuan” tayfununun gətirdiyi leysan yağışları torpaq sürüşmələrinə və daşqınlara səbəb olub. NHK-nın 22 sentyabrda yaydığı məlumata görə, təbii fəlakət nəticəsində dörd nəfər ölüb, altı nəfər itkin düşüb.

Kanaqava prefekturasının Yokosuka şəhərində palçıq kütləsinin evə dolması nəticəsində 60 yaşlarında qadın həyatını itirib. Kanaqava və qonşu Çiba prefekturalarında baş verən torpaq sürüşmələri nəticəsində 50–80 yaşlarında daha üç nəfərin öldüyü bildirilib.

Tokionun cənubundakı Miura şəhərində xilasedicilər dağıntıları təmizləyərək torpaq sürüşmələrindən sonra itkin düşənlərin axtarışını davam etdirirlər.

Tayfun elektrik təchizatında da fasilələrə səbəb olub. “Tokyo Electric Power Company”nin məlumatına görə, bölgədə təxminən 45 min ev elektriksiz qalıb.

Güclü yağışlar bir sıra ərazilərdə daşqınlara səbəb olub. Çiba prefekturasının Sakura şəhərində yaxınlıqdakı çay məcrasından çıxıb.

Sakin Riçard Yonamine bildirib ki, 30 ildən çoxdur yaşadığı evində ilk dəfə daşqınla üzləşib.

• Yaponiya: “Dujuan” tayfunu yaxınlaşır, torpaq sürüşməsi ilə bağlı xəbərdarlıq və təxliyə göstərişləri verilib

Ötən ay da güclü yağışlar Çibada genişmiqyaslı daşqınlara səbəb olub və Narita hava limanında sərnişinlərin hərəkətini çətinləşdirib. Yerli medianın məlumatına görə, daşqınlar nəticəsində 10 mindən çox avtomobil yararsız hala düşüb.

“Dujuan” tayfunu dünyanın bir sıra bölgələrində qeyri-adi dərəcədə güclü yağışlar, daşqınlar və tropik siklonların müşahidə olunduğu bir ilə təsadüf edir.

Teqlər

torpaq sürüşməsi təbii fəlakət daşqın tayfun Kanaqava Yokosuka