Tramp: “ABŞ–İran görüşü çox yaxşı keçib, danışıqlar davam edəcək”

“Cənubi Pars” qaz yatağında zədələnmiş hasilat gücünün yarısı bərpa olunub

İran “Cənubi Pars” qaz yatağında zədələnmiş hasilat gücünün təxminən yarısını bərpa edib. “Fars” yarırəsmi xəbər agentliyinin məlumatına görə, bu barədə neft nazirinin müavini Əhməd Zəraatkar bildirib.

Onun sözlərinə görə, planlaşdırılan bütün bərpa işləri qışa qədər tamamlanacaq.

Zəraatkar avqustun sonlarında zədələnmiş hasilat gücünün təxminən 40 faizinin bərpa olunduğunu bildirmişdi.

İran şərtlərini Qətər vasitəsilə ABŞ-yə çatdırıb

İran Nyu-Yorkda Qətərin vasitəçiliyi ilə şərtlərini ABŞ-yə çatdırıb. İran Xarici İşlər Nazirliyinin sözçüsü İsmayıl Bəqayinin sözlərinə görə, Tehran bütün cəbhələrdə müharibənin dayandırılmasını və ABŞ-nin Tehran tərəfindən “təcavüz aktları” kimi qiymətləndirilən hərəkətlərinə son qoyulmasını tələb edib.

IRNA-nın məlumatına görə, İranın şərtləri arasında dəniz blokadasının aradan qaldırılması, iqtisadi təzyiqlərin dayandırılması, həmçinin ölkənin dondurulmuş aktivlərinin sərbəst buraxılması da var.

Səudiyyə Ərəbistanı Şərq–Qərb neft kəmərinin fəaliyyətini bərpa edib

Səudiyyə Ərəbistanı Şərq–Qərb neft kəmərinin fəaliyyətini bərpa edib. “Reuters” məsələ barədə məlumatlandırılmış üç mənbəyə istinadən Qırmızı dənizdəki Yanbu limanından neft ixracının da bərpa olunmasının gözlənildiyini bildirib.

Tədarükün bərpası qlobal neft bazarında qiymətlərin enməsinə təkan verib. “Brent” markalı neftin bir bareli 2 dollardan çox ucuzlaşaraq 97 dollara yaxınlaşıb. Bu, sentyabrın 8-dən bəri ən aşağı səviyyədir.

Səudiyyə Ərəbistanı sentyabrın 11-də pilotsuz uçuş aparatlarının (PUA) hücumları nəticəsində kəmərin işini dayandırmağa məcbur olmuşdu. Ər-Riyad hücumlara görə İraqdakı silahlı qruplaşmaları ittiham edib. Kəmərin fəaliyyətinin dayanması Yanbu limanında xam neftin tankerlərə yüklənməsinin də dayandırılmasına səbəb olmuşdu.

Hörmüz boğazında gəmi hərəkəti 10 günlük orta göstəricidən aşağıdır

Sentyabrın 22-də Hörmüz boğazından üç yük gəmisi keçib. Bu, əvvəlki gündən bir gəmi azdır və son 10 gün üzrə gündəlik orta göstəricidən xeyli aşağıdır. Həmin dövrdə boğazdan gündə orta hesabla təxminən 15 gəmi keçib.

“Reuters”in məlumatına görə, bu rəqəmlər sonradan dəqiqləşdirilə bilər. Buna səbəb bəzi gəmilərin səfər zamanı mövqeləri və hərəkətləri barədə məlumat ötürən cihazlarını — transponderlərini söndürməsidir.

Hörmüz boğazında gəmilər. Musandam, Oman, 6 sentyabr 2026-cı il.

Reuters

ABŞ və İran Nyu-Yorkda üç saatlıq danışıqlar aparıb

Tramp növbəti görüşün yaxın vaxtlarda keçiriləcəyini bildirib, lakin əlavə təfərrüat açıqlamayıb.

ABŞ-nin xüsusi nümayəndəsi Stiv Uitkoff deyib ki, tərəflər BMT Baş Assambleyası çərçivəsində vasitəçilərin iştirakı ilə dolayı danışıqlar aparıblar.

Məlumata görə, İran nümayəndə heyətinə xarici işlər naziri Abbas Əraqçi rəhbərlik edib. Pakistan və Qətər danışıqlarda vasitəçilik edib.