Gürcüstan Orta Dəhlizdə mövqeyini gücləndirməyə çalışır

Gürcüstanın Baş naziri İrakli Kobaxidze BMT Baş Assambleyasında çıxış edərək ölkəsinin Orta Dəhlizdə mühüm nəqliyyat qovşağına çevrildiyini bildirib. O, Gürcüstanın beynəlxalq tərəfdaşlarla münasibətləri yaxşılaşdırmağa hazır olduğunu da deyib.

Kobaxidzenin sözlərinə görə, Gürcüstanın azad ticarət sazişləri ölkəyə təxminən 2,3 milyard istehlakçını əhatə edən bazarlara çıxış imkanı verir. Baş nazir bildirib ki, 2032-ci ilədək əsas nəqliyyat infrastrukturuna 7 milyard dollar sərmayə qoyulması planlaşdırılır.

Bu investisiyalar dəmir yolunun modernləşdirilməsi, Anakliya dərin dəniz limanının inkişafı, Tbilisidə yeni beynəlxalq hava limanının tikintisi və avtomagistral şəbəkəsinin genişləndirilməsini əhatə edir. Kobaxidze Qara dənizin dibi ilə fiber-optik kabel layihəsini isə Avropa ilə Asiya arasında rəqəmsal bağlantının gücləndirilməsi planı kimi ayrıca qeyd edib.

İqtisadi göstəricilər

Baş nazir bildirib ki, Gürcüstan iqtisadiyyatı son beş ildə orta hesabla illik 9,3 faiz artıb. Onun sözlərinə görə, 2026-cı ilin ilk yeddi ayında iqtisadi artım 7,9 faiz olub. Kobaxidze həmçinin 2021–2025-ci illərdə birbaşa xarici investisiyaların həcminin orta hesabla ümumi daxili məhsulun 6 faizindən çoxunu təşkil etdiyini deyib.

Kobaxidzenin sözlərinə görə, Beynəlxalq Valyuta Fondu Gürcüstan iqtisadiyyatının orta müddətdə illik orta hesabla 5,4 faiz artacağını proqnozlaşdırır. O, yoxsulluq səviyyəsinin 2020-ci ildəki 21,3 faizdən 7,1 faizə düşdüyünü də bildirib.

Tərəfdaşlarla münasibətlər

Kobaxidze Gürcüstanın Cənubi Qafqazda sülh və əməkdaşlığın təşviqinə töhfə verməyə çalışdığını bildirib. O, regionun gələcəyinin keçmişdə yaranmış bölünmələrlə müəyyənləşməməli olduğunu deyib və regional əlaqələrin inkişafının vacibliyini vurğulayıb.

Baş nazir Gürcüstanın bütün beynəlxalq tərəfdaşlarla münasibətləri “qarşılıqlı hörmət və suveren bərabərlik” prinsipləri əsasında inkişaf etdirməyə hazır olduğunu bildirib.

Kobaxidze çıxışında Avropa İttifaqının və ABŞ-nin adını çəkməyib. Gürcüstanın Aİ-yə üzvlük prosesi 2024-cü ilin iyunundan etibarən faktiki olaraq dayanıb. Avropa Şurası həmin vaxt Gürcüstan hökumətinin addımlarının ölkənin Aİ-yə inteqrasiya yolunu təhlükə altına aldığını və üzvlük prosesini faktiki dayandırdığını bildirib. 2024-cü ilin noyabrında isə ABŞ Gürcüstanla Strateji Tərəfdaşlıq mexanizmini dayandırıb.

Abxaziya və Cənubi Osetiya

Kobaxidze Gürcüstan ərazisinin təxminən 20 faizinin Rusiya tərəfindən işğal olunduğunu və yüz minlərlə vətəndaşın məcburi köçkün vəziyyətində qaldığını bildirib. O, abxaz və osetin icmalarına müraciət edərək ortaq tarixə və gələcəyə diqqət çəkib.

Baş nazir çıxışının sonunda BMT-ni dialoq və birgə fəaliyyət üçün mühüm platforma adlandırıb. O, UN80 təşəbbüsünü təşkilatın effektivliyinin, şəffaflığının və hesabatlılığının artırılması üçün imkan kimi qiymətləndirib.

• Gürcüstan Cənubi Qafqazdakı strateji rolunu ABŞ və Aİ qarşısında önə çəkir
• Azərbaycan və Gürcüstan 400 milyon dollarlıq sərhəd proqramından yararlana bilər
• Gürcüstan Anakliya limanı ilə Aİ-nin nəqliyyat şəbəkəsinə qoşulur, Orta Dəhliz güclənir

Teqlər

Gürcüstan İrakli Kobaxidze Orta Dəhliz BMT Cənubi Qafqaz Tbilisi Qara dəniz dəmir yolu liman Avropa İttifaqı ABŞ