Özbəkistan və Fars körfəzi: Yaxın Şərq niyə Mərkəzi Asiyanın texnologiya bazarına maraq göstərir?

Fars körfəzi ölkələri Özbəkistanın texnologiya sektoru üçün getdikcə daha mühüm tərəfdaşa çevrilir. “ICTWEEK Uzbekistan 2026” çərçivəsində aparılan müzakirələr göstərir ki, əməkdaşlıq yalnız startaplarla məhdudlaşmır. 

Səudiyyə Ərəbistanı, Birləşmiş Ərəb Əmirlikləri (BƏƏ) və Oman şirkətləri məlumat mərkəzləri, maliyyə texnologiyaları, bulud xidmətləri və süni intellekt də daxil olmaqla müxtəlif sahələrə maraq göstərirlər.

Fars körfəzi ölkələrinin maraq göstərdiyi əsas sahələrdən biri rəqəmsal infrastrukturdur. Səudiyyə Ərəbistanının “DataVolt” şirkəti Daşkənddə 12 meqavat gücündə məlumat mərkəzi inşa edir. Layihə ilkin mərhələdə 150 milyon dollarlıq maliyyələşdirmə ilə təmin olunub.

Omanın “Oman Data Park” şirkəti də Özbəkistan bazarına daxil olmaq və burada məlumat mərkəzləri tikmək imkanlarını müzakirə edib. Şirkət Omanda bulud xidmətləri, hostinq və məlumatların idarə edilməsi sahələrində fəaliyyət göstərir.

Maliyyə texnologiyaları və rəqəmsal xidmətlər

Maliyyə texnologiyaları Fars körfəzi şirkətlərinin maraq göstərdiyi digər sahədir.

Səudiyyə Ərəbistanının texnologiya və investisiya qrupları Özbəkistanda bu sahədə əməkdaşlıq imkanlarını müzakirə ediblər. DIFC Innovation Hub” özbək startaplarının BƏƏ və Səudiyyə Ərəbistanı bazarlarına çıxışı istiqamətində onlarla əməkdaşlıq edir.

Yaxın Şərq və Şimali Afrika bazarlarına yönəlmiş rəqəmsal bankçılıq platforması “Xpence” BƏƏ, Səudiyyə Ərəbistanı, Bəhreyn və Özbəkistanda fəaliyyət göstərir. Şirkət Özbəkistanda fəaliyyətini genişləndirmək və ixracyönümlü maliyyə texnologiyaları üzrə komanda yaratmaq imkanlarını müzakirə edib.

Əməkdaşlıq hər iki tərəf üçün yeni imkanlar yaradır. Fars körfəzi şirkətləri Özbəkistandan regional fəaliyyət mərkəzi kimi istifadə edə, özbək texnologiya şirkətləri isə Körfəz ölkələrinin bazarlarına çıxaraq fəaliyyətlərini genişləndirə bilərlər.

Süni intellekt, kibertəhlükəsizlik və korporativ texnologiyalar

Süni intellekt və kibertəhlükəsizlik də əməkdaşlığın inkişaf etdiyi sahələr sırasındadır. 2026-cı ildə keçirilən Səudiyyə Ərəbistanı–Özbəkistan texnologiya tədbirində şirkətlər və investorlar Səudiyyə Ərəbistanının İT şirkətlərinin Özbəkistana cəlb edilməsini, vençur fondları ilə əməkdaşlığı, eləcə də süni intellekt, avtomatlaşdırma və rəqəmsal platformalar sahəsində tərəfdaşlıq imkanlarını müzakirə ediblər.

Səudiyyə Ərəbistanından gələn digər nümayəndə heyəti “NEOM” ilə əməkdaşlıq çərçivəsində Özbəkistanda tədqiqat və inkişaf qruplarının, həmçinin proqram təminatı hazırlayan bölmələrin yaradılması imkanlarını nəzərdən keçirib. Danışıqlarda süni intellekt, robototexnika və ağıllı nəqliyyat texnologiyalarına xüsusi diqqət yetirilib.

Oyun və yaradıcı sənayelər

Səudiyyə Ərəbistanının “Savvy Games Group” şirkəti Özbəkistanın oyun sənayesinə maraq göstərib. Şirkət yerli studiyalar və özbək oyun tərtibatçıları ilə əməkdaşlıq imkanlarını araşdırmağı planlaşdırır. Səudiyyə Ərəbistanının investisiya qurumları da oyun və yaradıcı sənayelər sahəsində tərəfdaşlıq məsələlərini müzakirə ediblər.

Niyə məhz Özbəkistan?

Özbəkistan Fars körfəzi ölkələrinin texnologiya şirkətlərinə Mərkəzi Asiya bazarına çıxış və sayı artan İT mütəxəssisləri ilə əməkdaşlıq imkanları təklif edir. “IT Park”ın məlumatına görə, Fars körfəzi ölkələrinə tam məxsus 16 şirkət artıq Özbəkistanda fəaliyyətə başlayıb. Eyni zamanda 75 özbək şirkəti BƏƏ, Səudiyyə Ərəbistanı, Bəhreyn, Oman, Qətər və Küveytə rəqəmsal xidmətlər göstərir.

Özbəkistan xarici bazarlara çıxışı da asanlaşdırmağa çalışır. “IT Park”ın Ər-Riyaddakı nümayəndəliyi Səudiyyə Ərəbistanı bazarına daxil olan özbək şirkətlərinə biznesin inkişafı, tərəfdaşlıq əlaqələrinin qurulması, marketinq və müqavilələrin bağlanması sahəsində dəstək verir.

“ICTWEEK Uzbekistan 2026” çərçivəsində keçirilən “Middle East Tech Summit” tədbirində Özbəkistanın İT sektoruna və rəqəmsal infrastrukturuna investisiyalar, Yaxın Şərq şirkətlərinin Mərkəzi Asiya bazarına çıxışı, eləcə də özbək startaplarının Körfəz ölkələrindəki imkanları müzakirə olunub.

Nəticədə, Fars körfəzi şirkətləri Özbəkistana regional fəaliyyət və investisiya bazası kimi baxır, özbək şirkətləri isə Körfəz ölkələrində müştəri, kapital və tərəfdaşlıq imkanlarını genişləndirməyə çalışır.

• Özbəkistan İT sektoruna daha çox xarici investisiya cəlb edə bilərmi?

• Özbəkistan “ICTWEEK 2026”da rəqəmsal hökumət planlarını təqdim edir

Teqlər

Texnologiya investisiyaları Rəqəmsal infrastruktur DataVolt Səudiyyə Ərəbistanı Özbəkistan Fars körfəzi ICTWEEK Uzbekistan 2026 Bulud xidmətləri