Səudiyyə Ərəbistanının xarici işlər naziri danışıqlar üçün Vaşinqtona gedib

ABŞ İran–İraq zəvvar reysləri üçün sanksiya istisnası verməyə hazırlaşır

Məlumatlı mənbənin bildirdiyinə görə, ABŞ Prezidenti Donald Trampın administrasiyası İran və İraq arasında şiə zəvvarlarını daşıyan reyslərə icazə vermək üçün İrana qarşı sanksiyalara məhdud istisna tətbiq etməyə hazırlaşır.

Təklifə əsasən, ABŞ Maliyyə Nazirliyi “Iraqi Airways” aviaşirkətinə İranla İraqın şiələr üçün müqəddəs şəhəri Nəcəf arasında bir ay müddətində qarşılıqlı reyslər həyata keçirməyə imkan verən müvəqqəti icazə verəcək.

Məlumata görə, rəsmilər ilkin müddət başa çatdıqdan sonra daha uzunmüddətli mexanizmin tətbiqini də nəzərdən keçirirlər.

İraq ABŞ sanksiyalarına uyğun olaraq sentyabrın 25-də İrana və İrandan uçuşları dayandırıb. Mənbənin sözlərinə görə, nəzərdə tutulan istisna İraq hökumətinə təzyiqi azaltmaq məqsədi daşıyır.

İraq hökuməti tibbi müalicə, təhsil və ziyarət məqsədilə İranla İraq arasında səfərlərə istisna tətbiq olunması üçün ABŞ ilə danışıqlar aparır. İraqlı rəsminin sözlərinə görə, İranla Nəcəf arasında reyslərin 48 saat ərzində bərpa olunacağı gözlənilir.

Tehran Fairford bazasındakı həbslərlə bağlı iddiaları təkzib edir

“Sky News”un İranın Londondakı səfirliyinə istinadən yaydığı məlumata görə, Tehran Britaniyanın Fairford hərbi hava bazasında beş nəfərin saxlanılması ilə əlaqəsi olduğu iddiasını rədd edib.

ABŞ–İran danışıqları sentyabrın 28-i və ya 29-u keçirilə bilər

Danışıqlar barədə məlumatlandırılmış rəsmi “Reuters”ə bildirib ki, vasitəçilərin sentyabrın 28-i və ya 29-u ABŞ və İranla ayrı-ayrılıqda danışıqlar aparacağı gözlənilir. İranın xarici işlər naziri Abbas Əraqçi və Qətər vasitəçiləri hazırda ABŞ-dədir.

Rəsminin sözlərinə görə, danışıqlarda İranın BMT Baş Assambleyası çərçivəsində təqdim etdiyi yeddi günlük təklifin dəyişdirilmiş versiyasının müzakirə olunacağı gözlənilir.

Birləşmiş Krallıqda RAF Fairford bazası yaxınlığında saxlanılan beş nəfər dindirilir

Birləşmiş Krallığın terrorla mübarizə polisi RAF Fairford hərbi hava bazası yaxınlığında partlayıcı maddələr və terror cinayətləri ilə bağlı şübhələr əsasında saxlanılan beş nəfəri dindirir. Həbslər üç iri ağ furqonun hərbi bazaya doğru hərəkət etməsi barədə məlumat daxil olduqdan sonra həyata keçirilib. Bazadan ABŞ bombardmançılarının İrandakı hədəflərə zərbələr endirməsi üçün istifadə olunub.

Araşdırma ilə tanış olan mənbə bildirib ki, əsas ehtimallardan biri hadisənin İranla əlaqəli olmasıdır. Rusiyanın mümkün təxribatı və islamçı hücum planı ehtimalları da araşdırılır. Polis saxlanılan şəxslərin kimliyini açıqlamayıb və hadisənin motivini təsdiqləməyib.

RAF Fairford və Birləşmiş Krallıqda ABŞ ilə əlaqəli digər obyektlərin ətrafında təhlükəsizlik tədbirləri gücləndirilib. Ərazidə 400 metrlik təhlükəsizlik zonası yaradılıb, 85 evin sakinləri təxliyə edilib.
İran Birləşmiş Krallıqda və digər ölkələrdə baş verdiyi iddia edilən hücum və ya sui-qəsd planlarında iştirakını dəfələrlə təkzib edib. Hadisə ilə bağlı araşdırma davam edir.

Xamenei: “Düşmən qüvvələri tezliklə Ərəbistan dənizindən çıxarılacaq”

İran düşmən qüvvələrini ölkənin cənub sahilləri yaxınlığındakı sulardan Ərəbistan dənizinə doğru geri çəkilməyə məcbur edib. Bu barədə İranın ali rəhbəri Müctəba Xamenei “Telegram” kanalında bildirib.
Xamenei deyib ki, İran qüvvələri tezliklə onları Ərəbistan dənizindən də çıxaracaq.

Britaniya naziri: “Hərbi baza yaxınlığındakı həbsləri İranla əlaqələndirmək tezdir”

Böyük Britaniyanın müdafiə naziri Ues Stritinq bildirib ki, Britaniyadakı hərbi bazanın yaxınlığında saxlanılan şəxslərin motivləri barədə fərziyyə irəli sürmək “çox ağılsızlıq” olardı. O, bunu hadisədə İranın mümkün iştirakı ilə bağlı suala cavab verərkən deyib.

Açıqlama Qlosterşirdə yerləşən və ABŞ Hərbi Hava Qüvvələrinin istifadə etdiyi RAF Fairford bazasının yaxınlığında beş nəfərin terror aktı hazırlamaqda və Partlayıcı Maddələr Haqqında Qanunun tələblərini pozmaqda şübhəli bilinərək saxlanılmasından sonra verilib.

Kallas Qırmızı dənizdə gəmiçiliyin qorunması üçün daha çox gəmi tələb edib

Aİ-nin xarici siyasət üzrə ali nümayəndəsi Kaya Kallas bildirib ki, “Aspides” hərbi-dəniz missiyasının tam fəaliyyət göstərməsi və Qırmızı dənizdə gəmiçiliyin qorunması üçün daha çox gəmiyə ehtiyac var.

Kallas Brüsseldə Aİ müdafiə nazirlərinin görüşündən əvvəl deyib ki, üzv dövlətləri missiyaya daha çox vasitə ayırmağa çağırıb, lakin hələlik yeni konkret öhdəlik əldə olunmayıb.

.

Əraqçi: “İran diplomatiyaya da, müharibəyə də hazırdır”

İranın xarici işlər naziri Abbas Əraqçi bildirib ki, Tehran ABŞ ilə diplomatiyaya hazırdır. Nazir əlavə edib ki, ölkəsi istənilən hücuma cavab verəcək.

Əraqçi “X” platformasında yazıb ki, Prezident Məsud Pezeşkianla birlikdə Nyu-Yorka “sülhə nail olmaq üçün” gediblər. Onun sözlərinə görə, İran həm “real diplomatiyaya”, həm də “fəlakətli müharibə” kimi xarakterizə etdiyi ssenariyə hazırdır.

Feysəl bin Fərhan Vaşinqtonda danışıqlar aparacaq

Şahzadə Feysəl bin Fərhan sentyabrın 28-də ABŞ rəsmiləri ilə danışıqlar aparmaq üçün Vaşinqtona gedib.

Görüşlərdə ABŞ-Səudiyyə Ərəbistanı münasibətləri, eləcə də əsas regional və beynəlxalq məsələlər müzakirə olunacaq. Səfər Yaxın Şərqdə gərginliyin davam etdiyi və Vaşinqtonun region ölkələri ilə təmaslarını artırdığı bir dövrə təsadüf edir.