İran Hörmüz boğazında ABŞ-yə məxsus ikinci pilotsuz sualtı aparatı ələ keçirdiyini bildirir

İran İslam İnqilabı Keşikçiləri Korpusu (SEPAH) Hörmüz boğazında ABŞ ordusuna məxsus ikinci pilotsuz sualtı aparatı ələ keçirdiyini açıqlayıb. Qurum Hörmüz boğazının bağlı olduğunu və icazəsiz keçidlərin qarşısının alınacağını bir daha bildirib.

“SEPAH Hərbi Dəniz Qüvvələrinin hərbçiləri kəşfiyyat üstünlüyü və elektron müharibə imkanlarından istifadə etməklə həyata keçirdikləri koordinasiyalı və mürəkkəb əməliyyat nəticəsində Hörmüz boğazında casusluq məqsədilə fəaliyyət göstərən ABŞ ordusuna məxsus qabaqcıl pilotsuz sualtı aparatı ələ keçiriblər”, – SEPAH-ın açıqlamasında deyilir.

SEPAH-a bağlı “Sepah News”un məlumatına görə, avtonom sualtı aparatın (AUV) REMUS 600 olduğu bildirilib və aparat üzərindəki məlumatların araşdırılması üçün mütəxəssislərə təhvil verilib.

ABŞ ordusu isə SEPAH-ın açıqlamasını təkzib edərək əməliyyatlarda istifadə etdiyi bütün pilotsuz aparatların öz nəzarətində olduğunu bildirib.

SEPAH daha əvvəl Dive-LD aparatını ələ keçirdiyini açıqlayıb

SEPAH sentyabrın 8-də Hörmüz boğazının girişinə yaxın ərazidə ABŞ ordusuna məxsus daha bir avtonom sualtı aparatı ələ keçirdiyini açıqlamışdı. Qurum həmin aparatın Dive-LD olduğunu bildirmişdi.

ABŞ Müdafiə Nazirliyi (Pentaqon) daha sonra Dive-LD aparatını itirdiyini təsdiqləyərək onun nasazlıq səbəbindən sıradan çıxdığını və məxfi sistemlərə, yaxud həssas məlumatlara malik olmadığını bildirmişdi.

İranın yarırəsmi ISNA xəbər agentliyi bildirib ki, REMUS 600 və Dive-LD aparatlarının ələ keçirilməsi İrana Pentaqonun Hörmüz boğazında minaların təmizlənməsi üzrə yanaşması və avtonom texnologiyaları barədə məlumat əldə etməyə imkan verə bilər.

Tehran ABŞ ilə yeni danışıqlar planlaşdırmadığını bildirir

Hadisə İran nümayəndə heyətinin Nyu-Yorkda olduğu və Tehranın ABŞ ilə yeni danışıqlar planlaşdırmadığını bildirdiyi vaxta təsadüf edir. ABŞ Prezidenti Donald Tramp isə bu həftə vasitəçilərin iştirakı ilə danışıqların davam edəcəyini gözlədiyini deyib.

• İran: Şərtlərimiz yerinə yetirilməsə, Hörmüz boğazı açılmayacaq

• Tramp ABŞ-İran danışıqlarında Hörmüz üzrə güzəştə gedə bilər

“İranın mövqeyi və yanaşmaları ötən çərşənbə axşamı Qətərin vasitəçiliyi ilə aydın şəkildə ABŞ tərəfinə çatdırılıb. İran hazırda ABŞ-nin cavabını gözləyir”, – IRNA məlumatlı mənbəyə istinadən bildirib.

Əraqçi: “İran real diplomatiyaya hazırdır, təcavüzə müqavimət göstərəcək”

Əraqçi ABŞ televiziyasına müsahibəsində bildirib ki, Trampın açıq bəyanatlarına baxmayaraq, Vaşinqton Hörmüz boğazının yenidən açılması ilə bağlı İranın təklifini rədd etdiyini Tehrana rəsmi şəkildə bildirməyib.

Əraqçi “X” sosial şəbəkəsində yazıb ki, İran “real diplomatiyaya” hazırdır, eyni zamanda mümkün təcavüzə müqavimət göstərəcək.

“İran istənilən təcavüz qarşısında müqavimət göstərəcək — hətta bu, apokaliptik müharibəyə gətirib çıxarsa belə. Eyni zamanda, biz real diplomatiyaya hazırıq”, – Əraqçi bildirib.

Teqlər

İran ABŞ İran–ABŞ gərginliyi sualtı aparat Hörmüz boğazı İran İslam İnqilabı Keşikçiləri Korpusu SEPAH Abbas Əraqçi