Pezeşkian: “ABŞ və İsrail İranda daxili parçalanma yaratmağa çalışır”

İranın Zahidan şəhərində partlayış səsi eşidilib

İranın cənub-şərqində yerləşən Zahidan şəhərində partlayış səsi eşidilib. Bu barədə “Fars” xəbər agentliyi Zahidan administrasiyasına istinadən məlumat yayıb.

Məlumata görə, hadisə nəticəsində hər hansı ziyan qeydə alınmayıb.

Dubay–Təl-Əviv reysində pilotlar arasında dava düşüb

İsrailin “Ynet” nəşrinin məlumatına görə, Dubaydan Təl-Əvivə uçan “Flydubai” sərnişin təyyarəsində pilotlar arasında baş verən dava nəticəsində mümkün təyyarə qaçırılmasını bildirən kod ötürülüb. Bundan sonra təyyarə çərşənbə günü Səudiyyə Ərəbistanına yönəlib.

174 sərnişin daşıyan təyyarə Ben-Qurion hava limanına enməli idi. Uçuşdan təxminən 90 dəqiqə sonra, İordaniya hava məkanına daxil olarkən təyyarə əvvəlcə ümumi fövqəladə vəziyyəti bildirən “7700”, daha sonra isə qanunsuz müdaxilə, o cümlədən mümkün təyyarə qaçırılması zamanı istifadə olunan “7500” kodunu ötürüb.

Bundan sonra təyyarə istiqamətini dəyişərək Səudiyyə Ərəbistanının hava məkanına qayıdıb və Tabuk hava limanına enib. Şahzadə Sultan bin Əbdüləziz Beynəlxalq Hava Limanının məlumatına görə, kapitan və ikinci pilot xəsarət alaraq xəstəxanaya aparılıblar.

Müctəba Xamenei İsraili hədələyib

İranın ali rəhbəri Müctəba Xamenei “X” platformasında İsrailə hədə ünvanlayıb.

O bildirib ki, İsrail “tezliklə dəfn ediləcək və unudulacaq”.

Xamenei bu açıqlamanı İsrailin Livandakı fəaliyyəti ilə əlaqədar verib.

Pezeşkian: “Hörmüz boğazı dünyanın ən mühüm dəniz keçidlərindən biridir”

İran Prezidenti Məsud Pezeşkian Hörmüz boğazını dünyanın ən mühüm dəniz keçidlərindən biri adlandırıb. Bu barədə İran hökuməti Dünya Dənizçilik Günü münasibətilə “X” platformasında məlumat yayıb.

Pezeşkian bildirib ki, İran xarici təzyiqlərə baxmayaraq, ölkə üçün vacib dəniz yollarının fasiləsiz fəaliyyətini təmin edib.

Hörmüz boğazında gəmi vurulub

UKMTO-nun məlumatına görə, sentyabrın 29-da Hörmüz boğazında bir gəmi naməlum mərminin zərbəsinə məruz qalıb.

Qurum bildirib ki, hadisə mayeləşdirilmiş təbii qaz daşıyan tankerə təsir edib. Hadisə ilə bağlı araşdırma aparılır.

Çin ABŞ və İranı İslamabad Anlaşma Memorandumuna qayıtmağa çağırır

Çin ABŞ və İranı İslamabad Anlaşma Memorandumuna yenidən sadiq qalmağa və münaqişənin başa çatdırılmasına yönəlmiş danışıqları bərpa etməyə çağırıb.

Çin Xarici İşlər Nazirliyinin sözçüsü Quo Cyakun bildirib ki, Pekin fikir ayrılıqlarının siyasi və diplomatik yollarla həllini dəstəkləməkdə davam edir.

İyunun 18-də imzalanan İslamabad Anlaşma Memorandumu Hörmüz boğazında gəmiçilik və İranın nüvə proqramını əhatə edən daha geniş sülh sazişi üçün çərçivə yaratmağı nəzərdə tuturdu.

Çin Yaxın Şərq və Körfəz regionunda sülh və sabitliyin bərpasına kömək etmək üçün səylərini davam etdirəcəyini bildirib.

ABŞ İranın yeddi günlük planına cavab verib

İranın xarici işlər naziri Abbas Əraqçi sentyabrın 29-da Dohada Qətər vasitəçiləri vasitəsilə Vaşinqton və Tehran arasında etimadın yaradılmasına yönəlmiş yeddi günlük planla bağlı ABŞ-nin cavabını alıb. Rəsminin sözlərinə görə, əsas fikir ayrılığı addımların hansı ardıcıllıqla atılması ilə bağlıdır.

Adı açıqlanmayan rəsmi bildirib ki, Əraqçinin ABŞ-nin cavabını sentyabrın 30-da Tehranda müzakirə edəcəyi gözlənilir.

İran ötən həftə yeddi günlük təklif irəli sürüb. Təklifə əsasən, zəruri şərtlər yerinə yetirilərsə, Hörmüz boğazı yenidən açıla və normal gəmiçilik bərpa oluna bilər.

ABŞ Prezidenti Donald Tramp daha sonra bu təklifi rədd edib. Bundan sonra Qətərin vasitəçilik səyləri davam etdirilib.

SEPAH: ABŞ hərbi gəmiləri Hörmüz boğazından uzaqlaşıb

ABŞ hərbi gəmiləri Hörmüz boğazından 500 kilometr uzaqlaşıb. Bunu İran İslam İnqilabı Keşikçiləri Korpusu (SEPAH) sentyabrın 29-da bildirib.

SEPAH-a yaxın İran xəbər agentliyinin yaydığı məlumata görə, qurumun sözçüsü, briqada generalı Hüseyn Möhibi deyib:

“Həqiqət budur ki, Fars körfəzində bir dənə də olsun ABŞ gəmisi qalmayıb. Fars körfəzində fəaliyyət göstərən və Bəhreyndə yerləşən ABŞ Beşinci Donanmasına aid heç bir gəmi və ya kiçik hərbi kater də yoxdur”.

Əraqçi: “İranın Hörmüz boğazı ilə bağlı mövqeyi dəyişməyib”

İranın Hörmüz boğazı ilə bağlı mövqeyi dəyişməyib. Bunu İranın xarici işlər naziri Abbas Əraqçi sentyabrın 29-da bildirib.

Əraqçi Nyu-Yorkdan Tehrana yola düşməzdən əvvəl jurnalistlərə deyib:

“Qəti şəkildə bildirirəm ki, İranın mövqeyində heç bir dəyişiklik yoxdur. Boğazın açılması üçün şərtlərimiz aydındır”.

Onun sözlərinə görə, Hörmüz boğazının açılması İranın qarşı tərəfə açıqladığı bir sıra şərtlərin yerinə yetirilməsindən asılıdır.

Tramp: “İranın nə vaxt təslim olacağını bilmirəm”

ABŞ Prezidenti Donald Tramp İranın sonda təslim olacağını deyib, lakin bunun nə vaxt baş verəcəyini bilmədiyini bildirib.

Jurnalistin İranın təslim olmağa yaxın olub-olmadığı barədə sualına Tramp belə cavab verib:

“Vəziyyətləri çox pisdir. Hələ nə vaxt təslim olacaqlarını bilmirəm, amma təslim olacaqlar”.

ABŞ qüvvələri İraqdan çıxıb

ABŞ qüvvələri İraqda qalan son bazalarını da tərk edib. Bununla da ABŞ-nin 2003-cü ildə Səddam Hüseyn hakimiyyətini devirməklə nəticələnən müdaxiləsindən 23 il sonra ölkədəki hərbi mövcudluğu başa çatıb. 

Səddam Hüseynin devrilməsindən sonra ABŞ hərbçiləri İraqda əvvəlcə keçmiş rejimin tərəfdarlarına, daha sonra isə “Əl-Qaidə” terror təşkilatına qarşı döyüşüb.

ABŞ qüvvələri 2011-ci ilin sonunda İraqdan çıxıb, lakin üç ildən az müddət sonra İraq ordusuna “İslam Dövləti” qruplaşmasına qarşı mübarizədə dəstək vermək üçün geri qayıdıb. 

2024-cü ildə Co Bayden administrasiyası dövründə razılaşdırılan çıxış İran və onun müttəfiqləri tərəfindən qələbə kimi qarşılanıb. ABŞ qüvvələrinin ölkədən çıxması İraqda təhlükəsizlik boşluğunun yaranması, İranın dəstəklədiyi silahlı qrupların təsirinin artması və “İslam Dövləti” qruplaşmasının yenidən fəallaşması ilə bağlı narahatlıqları da gündəmə gətirib.

• ABŞ qoşunları İraqdan çıxır: Bundan sonra nə baş verə bilər?

İran İnqilab Keşikçiləri amerikalıları Trampın müttəfiqlərinə səs verməməyə çağırıb

İran İslam İnqilabı Keşikçiləri Korpusu sentyabrın 29-da yayımlanan məktubda amerikalıları ABŞ Prezidenti Donald Trampın Konqresdəki müttəfiqlərinə *səs verməməyə* çağırıb.

“Reuters”in məlumatına görə, məktub İran mediasında yayımlanıb.

ABŞ-də noyabrın 3-də keçiriləcək aralıq seçkilərində Nümayəndələr Palatasının bütün üzvləri və Senat üzvlərinin bir hissəsi seçiləcək.

“Amerikanın hazırkı vəziyyətinə görə məsuliyyət daşıyan şər, hiyləgər və zorakı siyasətçiləri hakimiyyətdən uzaqlaşdırın”, — deyə məktubda bildirilib. “Siyasətçilərinizin dünyanın dəyişdiyini anlamasını təmin edin”.

Tramp 2024-cü il seçki kampaniyası zamanı yeni müharibələrə başlamayacağını, mövcud münaqişələrə son qoyacağını və inflyasiyanı aşağı salacağını vəd etmişdi. ABŞ və İsrailin İrana qarşı apardığı müharibə* dünyada yanacaq qiymətlərinin artmasına təsir göstərib, döyüşlər isə Yaxın Şərqin digər ərazilərinə də yayılıb.

Pezeşkian ABŞ və İsraili daxili parçalanma yaratmaq cəhdində ittiham edib

İran Prezidenti Məsud Pezeşkian bildirib ki, ABŞ və İsrail ölkəsini hərbi yolla məğlub edə bilmədikləri üçün İranda daxili parçalanma yaratmağa çalışırlar. Bu barədə IRNA məlumat yayıb.

“İranın təcavüzkar düşmənləri artıq anlayıblar ki, müharibə yolu ilə İran xalqını təslim olmağa məcbur edə bilməzlər, ölkəmizi isə bomba və raketlərlə ələ keçirə bilməzlər”, — deyə Pezeşkian bildirib.