“NVIDIA” və “AMD” rəhbərləri Tsinxua Universitetinin biznes məktəbinin məsləhət şurasına qoşulublar

“NVIDIA” və “AMD” rəhbərləri Tsinxua Universitetinin biznes məktəbinin məsləhət şurasına qoşulublar
“Advanced Micro Devices” (AMD) şirkətinin baş direktoru Liza Su forumda iştirak edir. Taypey, Tayvan, 22 may 2026-cı il.
Reuters
EN

Müəllif

Mahnoor Makhdoom

AZ

Azərbaycan dili

Leyla Qədirova

“NVIDIA”nın təsisçisi və baş direktoru Censen Huanq və “AMD”nin sədri və baş direktoru Liza Su Tsinxua Universitetinin İqtisadiyyat və Menecment Məktəbinin (SEM) məsləhət şurasına qoşulublar. 

Bununla da süni intellekt çipləri sənayesinin ən nüfuzlu rəhbərlərindən ikisi qlobal biznes liderləri ilə Çin rəsmilərini bir araya gətirən platformada təmsil olunacaq.

Məktəb yeni təyinatları sentyabrın 29-da açıqlayıb.

Huanq və Su şuraya yeni təyin olunan üç üzvdən ikisidir. Üçüncü yeni üzv İsveçrənin sərvət və aktivlərin idarə edilməsi şirkəti “Pictet Group”un baş idarəedici tərəfdaşı Mark Piktedir. Çin mediası məktəbin rəsmi “WeChat” hesabına istinadən təyinatlar barədə məlumat yayıb.

Şuraya yeni rəhbərlər qoşulub

Daha beş rəhbər şirkətlərində baş verən rəhbərlik dəyişikliklərindən sonra əvvəlki nümayəndələri əvəz edərək şuraya qoşulub. Bunlar “BMW Group”un İdarə Heyətinin sədri Milan Nedelkoviç, “Walmart”ın prezidenti və baş direktoru Con Furner, “Coca-Cola”nın baş direktoru Enrike Braun, “General Atlantic”in həmprezidenti və qlobal artım kapitalı bölməsinin rəhbəri Martin Eskobari və “bp”nin baş direktoru Meq O’Nildir.

Huanq 1993-cü ildə “NVIDIA”nı təsis edib və o vaxtdan şirkətin prezidenti və baş direktoru vəzifələrində çalışır. Su 2014-cü ildən “AMD”nin baş direktorudur, 2022-ci ildə isə şirkətin sədri vəzifəsini də üzərinə götürüb. Onun rəhbərliyi dövründə “AMD” yüksək məhsuldarlıqlı hesablama və süni intellekt sahələrində fəaliyyətini genişləndirərək qabaqcıl süni intellekt çipləri bazarında “NVIDIA”nın əsas rəqiblərindən birinə çevrilib.

SEM-in məsləhət şurasına 2019-cu ildən “Apple”ın baş direktoru Tim Kuk rəhbərlik edir. Çinin keçmiş vitse-prezidenti Van Çişan isə şuranın fəxri sədridir.

Şura qlobal şirkət rəhbərləri ilə Çinin yüksəkvəzifəli rəsmilərini bir araya gətirən yüksək səviyyəli platformadır. Şuranın 27-ci illik toplantısının oktyabrın 13–14-də Pekində keçirilməsi planlaşdırılır. Yeni təyinatlar da toplantı ərəfəsində açıqlanıb.

Çip nəhəngləri ABŞ–Çin gərginliyi fonunda fəaliyyət göstərir

Təyinatlar sənaye üçün həssas bir dövrə təsadüf edir. “NVIDIA” və “AMD” dünyanın ən böyük yarımkeçirici bazarlarından biri olan Çinə çıxışlarını qorumağa çalışır, eyni zamanda ABŞ və Çinin tətbiq etdiyi getdikcə mürəkkəbləşən məhdudiyyətlərə uyğunlaşırlar.

İki ölkə arasında texnologiya və investisiya sahəsində gərginliyə baxmayaraq, şura transmilli şirkətlərlə Çin arasında əlaqə kanalı olaraq qalır.

Yarımkeçiricilərin ixracına qoyulan məhdudiyyətlər Çin Prezidenti Si Cinpin və ABŞ Prezidenti Donald Tramp arasında keçirilən son sammitlə bağlı ictimaiyyətə açıqlanan məlumatlarda əsas yer tutmayıb. Məhdudiyyətlərin əksəriyyəti isə qüvvədə qalır. Huanq Vaşinqtonda Si Cinpinin şərəfinə verilən dövlət ziyafətində iştirak edib. Bu, “NVIDIA” rəhbərinin ABŞ–Çin münasibətləri çərçivəsində daha geniş təmaslarda yaxından iştirak etdiyini göstərir.

Huanqın təyinatı gözlənilirdi

Huanqın SEM-in məsləhət şurasına təyin ediləcəyi geniş şəkildə gözlənilirdi. Məlumata görə, o, bu ilin əvvəlində Trampın nümayəndə heyətinin tərkibində mayın ortalarında Çinə səfər etdikdən sonra şuraya qoşulmaq dəvətini qəbul etmişdi.

Həmin vaxt onun Çinin ən nüfuzlu universitetində rəsmi məsləhətçi rolunu qəbul etməsi ABŞ texnologiya şirkətlərinin Çin bazarı ilə əlaqələri ehtiyatla bərpa etməsinin daha bir əlaməti kimi diqqət çəkmişdi.
 

“NVIDIA”nın prezidenti və baş direktoru Censen Huanq “Dumfries House”da. Kamnok, Birləşmiş Krallıq, 17 sentyabr 2026-cı il.
Reuters
Bazara çıxış və məhdudiyyətlər arasında tarazlıq

Hər iki şirkət üçün bu təyinatlar mürəkkəb tarazlığı əks etdirir. Hər iki şirkət Çində kommersiya fəaliyyətini qorumaq istəyir. Bununla yanaşı, ABŞ-nin ixrac qaydaları onların ölkədə sata biləcəyi qabaqcıl çipləri məhdudlaşdırır. Çin hakimiyyəti də bu sahədə müəyyən məhdudlaşdırıcı tədbirlər tətbiq edib.

Yeni şura üzvlüyünün mövcud vəziyyətə mümkün təsiri hələ məlum deyil. Bununla belə, bu təyinatlar sənayenin ən nüfuzlu rəhbərlərindən ikisinə Çin rəsmiləri və qlobal biznes liderlərinin mütəmadi görüşdüyü platformada daimi iştirak imkanı verir.

Teqlər

NVIDIA AMD süni intellekt yarımkeçiricilər çip sənayesi texnologiya Çin
comments
share