Türkiyə və Azərbaycan dəyəri 500 milyon dollardan çox olan müdafiə sazişləri imzalayıb

Türkiyə və Azərbaycan dəyəri 500 milyon dollardan çox olan müdafiə sazişləri imzalayıb
Anadolu
EN

Müəllif

Adam Morrow

AZ

Azərbaycan dili

Günel Məmmədova

Türkiyə və Azərbaycan dəyəri 500 milyon dollardan çox olan müdafiə sazişləri imzalayıb. Razılaşmalar arasında Türkiyə istehsalı 14 ədəd “HÜRKUŞ-II” təlim təyyarəsinin alınması da var.

Sazişlər Bakıda keçirilən “ADEX 2026” 6-cı Azərbaycan Beynəlxalq Müdafiə Sərgisi çərçivəsində imzalanıb. Tərəflər hərbi və müdafiə sənayesi sahəsində əməkdaşlığı daha da genişləndirməyi planlaşdırırlar.

Türkiyə Respublikası Prezident Administrasiyası yanında Müdafiə Sənayesi İdarəsinin sədri Haluk Görgün bildirib ki, razılaşmalar hər iki ölkənin müdafiə imkanlarını və böhran, təbii fəlakət, eləcə də digər fövqəladə hallarda birgə fəaliyyət qabiliyyətini gücləndirəcək.

Razılaşmalardan biri “Turkish Aerospace Industries” şirkəti ilə 14 ədəd “HÜRKUŞ-II” təyyarəsinin alınmasını nəzərdə tutur. Turbovintli təyyarə əsas pilot hazırlığı və məhdud döyüş tapşırıqları üçün hazırlanıb.

Görgünün sözlərinə görə, təyyarələrin ilk tədarükləri bu il həyata keçiriləcək.

“HÜRKUŞ-II” Türkiyədə hazırlanmış “HÜRKUŞ” təlim təyyarəsinin ən son versiyasıdır. Model köhnə təlim təyyarələrini əvəz etmək, pilot hazırlığını və döyüşə hazırlıq səviyyəsini təkmilləşdirmək üçün nəzərdə tutulub.

Digər müqavilələr “Baykar”ın “Mızrak” ağıllı dolaşan sursatı və “Antidot” sistemi, həmçinin “Roketsan”ın “Barbaros” sahil müdafiə sistemini əhatə edir.

“Aselsan” da Azərbaycana ALP-100 radar sisteminin tədarükünə dair anlaşma memorandumu imzalayıb.

Razılaşmalar daha geniş əməkdaşlığı əhatə edir

Bakıda imzalanan sənədlər yalnız hərbi texnika alışını deyil, təhsil, tədqiqat, logistika, radiotezlik texnologiyaları və yerli istehsal sahələrində əməkdaşlığı da əhatə edir.

“Aselsan” həmçinin Azərbaycanın “NOVASIS” texnologiya şirkəti ilə Naxçıvanda istehsal müəssisəsinin yaradılmasına dair ilkin razılaşma imzalayıb.

“Qardaş Azərbaycanla mühəndislərin birgə hazırlığı ilə məşğul olacağıq. Yerli istehsal və ortaq layihələr qardaşlıq bağlarımızı gücləndirən addımlar olacaq”, – Görgün bildirib.

Türkiyə və Azərbaycan sıx siyasi və hərbi əməkdaşlığa malikdir. Ankara Azərbaycan Silahlı Qüvvələrinin hazırlığı və modernləşdirilməsində uzun illərdir iştirak edir.

Teqlər

Azərbaycan Türkiyə ADEX 2026 müdafiə sistemləri HÜRKUŞ Baykar hərbi əməkdaşlıq müdafiə sazişləri
comments
share