Türkiyə Suriya ilə “Hizbullah” arasında gizli danışıqlar barədə xəbəri təkzib edib

Türkiyə kəşfiyyat xidmətinin Suriya rəsmiləri ilə “Hizbullah” arasında gizli danışıqlara vasitəçilik etdiyi barədə xəbəri təkzib edib və bu iddianı tamamilə əsassız adlandırıb.

Təkzib oktyabrın 1-də Türkiyə Prezident Administrasiyasının Kommunikasiya İdarəsi tərəfindən qurumun Dezinformasiya ilə Mübarizə Mərkəzi vasitəsilə yayılıb.

Ankara bildirib ki, Suriya hökumətinin nümayəndələri ilə Livanın “Hizbullah” qruplaşmasının təmsilçilərinin Türkiyədə Milli Kəşfiyyat Təşkilatının vasitəçiliyi ilə görüşdüyünə dair iddialar uydurmadır.

“Reuters” məsələdən məlumatlı altı mənbəyə istinadən Suriya və “Hizbullah” nümayəndələrinin sentyabrda Türkiyədə azı bir dəfə gizli görüşdüyünü yazıb.

Agentliyin məlumatına görə, gərginliyi azaltmağa yönələn görüşdə müəyyən irəliləyiş olsa da, yekun razılaşma əldə edilməyib. 

Türkiyə Prezident Administrasiyasının Kommunikasiya İdarəsi iddia edilən görüşün tarixi, yeri, məzmunu və təmaslarla bağlı məlumatların həqiqəti əks etdirmədiyini bildirib və ictimaiyyəti yalnız rəsmi açıqlamalara etibar etməyə çağırıb. 

Dəməşq də “Reuters”in məlumatını təkzib edib.

Suriyanın dövlət “Alikhbariah” televiziyasının məlumatına görə, İnformasiya Nazirliyinin Xarici Media İdarəsi bildirib: “Bu iddialar yalandır, belə bir görüş keçirilməyib”.

Əsədin devrilməsindən sonra münasibətlər gərginləşib

Suriyanın yeni hökuməti ilə “Hizbullah” arasında münasibətlər Bəşər Əsəd hakimiyyətinin 2024-cü ilin dekabrında devrilməsindən sonra gərginləşib. 

2011-ci ildə başlayan Suriya münaqişəsi zamanı “Hizbullah” İranın uzunmüddətli müttəfiqi olan Əsədi və onun hökumətini dəstəkləmək üçün ölkəyə döyüşçülər göndərib. 

Bəşər Əsədin devrilməsindən sonra hakimiyyətə gələn Suriya rəhbərliyi “Hizbullah”la əlaqəli şəbəkələri silah qaçaqmalçılığı və ölkədə gizli hüceyrələr saxlamaqda ittiham edib. “Hizbullah” isə bu iddiaları rədd edir.

Türkiyə isə Əhməd Əl Şaraa rəhbərliyindəki Suriya hökumətinin əsas regional tərəfdaşlarından biridir və münaqişədən sonrakı Suriyada siyasi, təhlükəsizlik və iqtisadi təsirini genişləndirməyə çalışır.

Səudiyyə Ərəbistanı ilə həmrəylik

Ankara oktyabrın 1-də Yəmən husilərinin Mədinədə Peyğəmbər məscidinə xidmət edən mülki infrastruktura hücumunu pisləyib. 

Türkiyə Xarici İşlər Nazirliyi bu cür hücumların dərhal və qeyd-şərtsiz dayandırılmasına çağırıb. Nazirlik bildirib ki, hücumlar Səudiyyə Ərəbistanının suverenliyini və təhlükəsizliyini təhdid edir, İslam dünyasının müqəddəs dəyərlərini hədəfə alır. 

Nazirlik Türkiyənin Səudiyyə Ərəbistanına güclü dəstəyini bir daha təsdiqləyib və bütün tərəfləri regionda gərginliyi daha da artıra biləcək addımlardan çəkinməyə çağırıb. 

Səudiyyə Ərəbistanı rəsmiləri hücumu Yəməndə İrana yaxın “Ənsar Allah” hərəkatının, yəni husilərin həyata keçirdiyini bildiriblər.

Husilər isə Mədinəni və ya digər İslam müqəddəs məkanlarını hədəfə aldıqlarına dair Səudiyyə Ərəbistanının iddialarını rədd edib və bunu təbliğat adlandırıblar.

Tərəflərin irəli sürdüyü iddiaların heç biri müstəqil şəkildə təsdiqlənməyib.

Teqlər

Suriya Yaxın Şərq Livan Ankara regional təhlükəsizlik Bəşər Əsəd siyasi gərginlik diplomatik münasibətlər