Paşinyan: “Azərbaycanla sülh sazişi 2027-2028-ci illərdə imzalana bilər”

Paşinyan: “Azərbaycanla sülh sazişi 2027-2028-ci illərdə imzalana bilər”
Ermənistanın Baş naziri Nikol Paşinyan. Yekaterinburq, Rusiya, 6 iyul 2026-cı il.
Reuters

Azərbaycan və Ermənistan arasında sülh müqaviləsi 2027 və ya 2028-ci illərdə imzalana bilər.

“Armenpress” dövlət xəbər agentliyinin məlumatına görə, bunu Ermənistanın Baş naziri Nikol Paşinyan oktyabrın 22-də bildirib.

“Azərbaycanla birgə işi davam etdirməliyik”, – deyə Paşinyan mətbuat konfransında sülh müqaviləsi ilə bağlı sualı cavablandırarkən bildirib.

Baş nazir bildirib ki, əvvəllər müqavilənin 2031-ci ilədək imzalanacağını gözləyirdi. İndi isə sənədin daha tez imzalanmalı olduğunu düşünür.

Xatırladaq ki, 2025-ci il avqustun 8-də Vaşinqtonda keçirilən görüşdə Azərbaycanın və Ermənistanın xarici işlər nazirləri sülh sazişinin layihəsini paraflayıblar. Azərbaycan Prezidenti İlham Əliyev və Ermənistanın Baş naziri Nikol Paşinyan isə Ağ Ev rəhbəri Donald Trampla birlikdə Birgə Bəyannamə imzalayıblar.

ABŞ Prezidenti Donald Tramp, Azərbaycan Prezidenti İlham Əliyev və Ermənistanın Baş naziri Nikol Paşinyan Ağ Evdə görüş keçirirlər. Vaşinqton, ABŞ, 8 avqust 2025-ci il.
Reuters

Bəyannamədə iki ölkə arasında münasibətlərin normallaşdırılması, nəqliyyat əlaqələrinin açılması və sülhün möhkəmləndirilməsi nəzərdə tutulur.

Rəsmi Bakı sülh müqaviləsinin imzalanması üçün Ermənistan Konstitusiyasında Azərbaycana qarşı ərazi iddialarının aradan qaldırılmasını tələb edir.

“Azərbaycana qarşı ərazi iddialarına tamamilə son qoyulduqdan sonra sülh sazişini imzalamağa hazır olacağıq”, – deyə Azərbaycan Prezidentinin köməkçisi Hikmət Hacıyev Türkiyənin “Haber Global” telekanalına müsahibəsində bildirib.

Paşinyan yeni Konstitusiya ilə bağlı prosesdə növbədənkənar parlament seçkilərinin keçirilməsi ehtimalını istisna etməyib.

O bildirib ki, yeni Konstitusiya layihəsi yaxın vaxtlarda dərc ediləcək, sənədlə bağlı müzakirələr aparılacaq və layihə parlamentə təqdim olunacaq.

“Biz müxalifətdəki həmkarlarımızı inandırmağa çalışacağıq ki, bu, Ermənistan dövlətinin davamlılığı məsələsinin müəyyənləşdirilməsi və həlli baxımından çox mühüm və fundamental məsələdir. Onları inandırmağa çalışacağıq. Əgər bu, nəticə verməsə, növbədənkənar seçkilər də daxil olmaqla, digər variantları nəzərdən keçirəcəyik”, – deyə Paşinyan bildirib.

TRIPP layihəsi üzrə işlər davam edir

Paşinyan Azərbaycanın əsas ərazisi ilə Naxçıvan arasında Ermənistanın cənubundan keçən nəqliyyat əlaqəsinin yaradılmasını nəzərdə tutan Beynəlxalq Sülh və Rifah naminə Tramp Marşrutu (TRIPP) layihəsinin həyata keçirilməsinin də vacib olduğunu bildirib.

“Əlbəttə, bu iki məsələnin bir-biri ilə əlaqəsi yoxdur. Lakin biz artıq TRIPP layihəsinin icrasına başlayırıq”, – deyə o qeyd edib.

Oktyabrın 21-də Ermənistan rəsmiləri ABŞ-nin dəstəklədiyi nəqliyyat marşrutu üzrə hazırlıq işlərini davam etdirmək məqsədilə ölkənin cənubundakı Sünik vilayətinə səfər ediblər.

Teqlər