Süni intellekt xərclərindəki artım "IBM"in əsas biznesinə zərbə vurur

"IBM" şirkəti süni intellekt infrastrukturuna çəkilən xərclərin kəskin artmasının onun əsas biznesinə mənfi təsir göstərdiyini açıqlayıb. Bu, süni intellekt bumunun texnologiya sektorunu necə yenidən formalaşdırdığını göstərən ən aydın əlamətlərdən biridir.

Müştərilər server və çiplərə üstünlük verirlər

Şirkət korporativ xərclərin proqram təminatından məlumat mərkəzi infrastrukturuna doğru sürətlə dəyişməsinə uyğunlaşmaqda çətinlik çəkdiyini bildirib. Bu isə "IBM"in ikinci rüb üzrə mənfəət gözləntilərinə ciddi zərbə vurub.

İnvestorlar bu xəbərdarlığa sərt reaksiya verib və nəticədə çərşənbə axşamı "IBM" səhmləri 25 faiz ucuzlaşıb. Bu geriləmə, səhmlərin 1987-ci ildəki "Qara bazar ertəsi" (Black Monday) bazar böhranı zamanı yaşadığı düşüşdən daha kəskin birgünlük ucuzlaşma istiqamətində olduğunu göstərib.

"IBM"in Baş icraçı direktoru Arvind Krişna müştərilərin büdcələrini getdikcə daha çox qıtlıq yaşanan süni intellekt infrastrukturlarının təminatına yönəltdiklərini bildirib.

"İyun ayının son bir neçə həftəsində biz müştərilərin qiymət artımı gözləntiləri fonunda tədarükü məhdud olan infrastrukturu təmin etmək məqsədilə rüblük kapital xərclərini (capex) server, yaddaş qurğuları və mikrosxemlərin alqısına yönəltdiyini gördük", - deyə Krişna investorlara ünvanladığı məktubda qeyd edib.

O əlavə edib: "Gözləntilərimizdə tədarük zənciri ilə bağlı müəyyən təsirlərin olacağını ehtimal etsək də, kapital xərclərinin prioritetləşdirilməsindəki bu kəskin dəyişikliyin miqyasını əvvəlcədən görə bilmədik". Şirkət rəhbəri həmçinin "çox sayda böyük müqavilənin" gözlənildiyi kimi bağlana bilmədiyini də diqqətə çatdırıb.

Bu zəifləmə əsasən bankçılıq və aviasiya da daxil olmaqla, müxtəlif sənaye sahələrində istifadə olunan irimiqyaslı hesablama sistemlərini təmin edən "IBM"-in meynfreym (mainframe) biznesində cəmləşib.

Şirkət eyni zamanda müştərilərin süni intellektin yaratdığı kiber təhdidlərlə bağlı artan narahatlıqlar fonunda kibertəhlükəsizlik xərclərini artırdığını da bildirib.

İnkişaf proqnozları gözləntiləri doğrultmur

"IBM" ikinci rübdə gəlirinin 17,2 milyard dollar olacağını proqnozlaşdırıb. Bu isə cəmi 1 faizlik artım deməkdir və analitiklərin 17,86 milyard dollarlıq gözləntisindən aşağıdır.

Şirkət həmçinin səhm başına düşən düzəliş edilmiş xalis mənfəətin 3,02 dollarlıq proqnozun əksinə olaraq, 2,93 dollar təşkil edəcəyini ehtimal edir.

Bu xəbərdarlıq, ənənəvi olaraq proqramçılar tərəfindən yerinə yetirilən tapşırıqları avtomatlaşdırmağı və kod yazmağı bacaran süni intellekt alətlərinin yaratdığı çətinliklərlə onsuz da üzləşən geniş proqram təminatı sektoru ilə bağlı narahatlıqları daha da artırıb.

"IG Group" şirkətinin bazar üzrə analitiki Kris Biçem (Chris Beauchamp) vəziyyəti belə şərh edib: "Bu, "IBM" və proqram təminatı səhmləri üçün çox xoşagəlməz bir məqamdır".

"Əsas sual infrastruktur və kibertəhlükəsizliyə bu keçidin nə qədər davam edəcəyidir. Vəziyyətin bir neçə ay belə davam etməsi dözülə bilən olar, lakin bundan daha uzun çəkərsə, proqram təminatı səhmləri ilə bağlı yenidən ciddi suallar ortaya çıxacaq".

Kvant kompyuterləri uzunmüddətli hədəf olaraq qalır

İnvestorları sakitləşdirmək məqsədilə "IBM" kvant kompyuterləri sahəsinə yatırdığı investisiyaları, o cümlədən 2029-cu ilə qədər dünyanın ilk irimiqyaslı kvant kompyuterini yaratmaq üçün 10 milyard dollardan çox vəsait xərcləmək planlarını diqqətə çatdırıb.

Şirkət eyni zamanda "OpenAI" da daxil olmaqla, süni intellekt sahəsində tərəfdaşlıq əlaqələrini genişləndirir.

Bununla belə, analitiklər "IBM"in kvant hesablamaları və süni intellekt təşəbbüslərinin hələ nisbətən ilkin mərhələdə olduğunu və şirkətin əsas proqram təminatı ilə infrastruktur bizneslərindəki zəifləməni kompensasiya edəcək qədər böyük olmadığını qeyd edirlər.

"IBM"in iyulun 22-də ikinci rüb üzrə maliyyə nəticələrini açıqlaması planlaşdırılır.

Teqlər

IBM texnologiya sektoru proqram təminatı məlumat mərkəzləri kvant hesablamaları biznes