ABŞ məktəbində humanoid robot layihəsi etirazlara səbəb olub

Nyu-Yorkda məktəbə humanoid robotların gətirilməsi planından imtina edilib. Qərar müəllimlər, yerli icma nümayəndələri və ştatın təhsil rəsmiləri tərəfindən səsləndirilən sərt tənqidlərdən sonra verilib.

Nyu-York ştatının qərbində yerləşən Salamanka Liseyi bu payız "Sally" adlı insanabənzər robotun iştirakı ilə pilot layihəyə başlamağı planlaşdırırdı. 

Kanadanın “Realbotix” şirkəti tərəfindən hazırlanan robot süni intellekt əsaslı “Optio” tədris köməkçisi ilə birlikdə işləməli idi.

Layihə 11 və 12-ci sinif şagirdlərinə STEAM (elm, texnologiya, mühəndislik, incəsənət və riyaziyyat) fənləri üzrə fərdi dəstək göstərməyi, sinifdə interaktiv köməkçi kimi fəaliyyət göstərməyi nəzərdə tuturdu.

Məktəb rəhbərliyi bildirib ki, bu texnologiya müəllimləri əvəz etməyəcək, əksinə onların işini dəstəkləyən əlavə vasitə kimi istifadə olunacaq.

“Realbotix”in mübahisəli keçmişi suallar yaradıb

Layihə “Realbotix” şirkətinin əvvəlki fəaliyyəti ilə bağlı mübahisələr səbəbindən geniş müzakirələrə yol açıb. İnsanabənzər robotlar istehsal edən şirkətin məktəblərlə əməkdaşlığı tənqidçilər tərəfindən sual altına alınıb.

“Realbotix” isə təhsil üçün hazırladığı robotların və texnologiyaların böyüklər üçün nəzərdə tutulan məhsullarından tamamilə ayrı inkişaf etdirildiyini və bu fəaliyyətlərin bir-biri ilə əlaqəli olmadığını bildirib.

Həmkarlar ittifaqları da layihəyə etiraz edib. Onların fikrincə, siniflərdə süni intellektlə işləyən humanoid robotlardan istifadə müəllimlərin rolunu zəiflədə, şagirdlərin məxfiliyi və məlumatlarının qorunması ilə bağlı narahatlıq yarada, məktəblərin texnologiyadan asılılığını artıra bilər.

Layihə yerli icmanın da etirazı ilə qarşılaşıb

“Seneca Nation” yerli icmasının nümayəndələri layihənin sınaqdan keçirilməsinə etiraz ediblər. Onlar bildiriblər ki, şagirdlərin əksəriyyətinin yerli icmaya mənsub olduğu məktəbdə bu layihənin sınaqdan keçirilməsi narahatlıq doğurur.

Nümayəndələrin sözlərinə görə bu təşəbbüs yerli icmaların razılığı alınmadan və onlarla kifayət qədər məsləhətləşmə aparılmadan həyata keçirilən əvvəlki təhsil layihələrini xatırladır.

Nyu-York Dövlət Təhsil Departamentinin məxfilik, təhlükəsizlik və hüquqi məsələlərlə bağlı narahatlıqlarından sonra Salamanka Şəhər Mərkəzi Məktəb Dairəsi pilot proqramını dayandırdığını açıqlayıb.

Məktəb dairəsi məlumatların qorunması tədbirlərini yenidən qiymətləndirdiyini və bu məsələ ilə bağlı yerli icma ilə məsləhətləşmələr apardığını bildirib.

Bu hadisə məktəblərdə humanoid süni intellekt texnologiyalarının tətbiqi ilə bağlı müzakirələri yenidən gündəmə gətirib.

Teqlər

ABŞ süni intellekt texnologiya İnnovasiya Humanoid robotlar