ABŞ süni intellekt infrastrukturunu qorumaq üçün Çin robotlarına qadağa qoyub

ABŞ administrasiyası milli təhlükəsizlik maraqlarını və ölkənin süni intellekt (Sİ) infrastrukturunu qorumaq məqsədilə Çin istehsalı olan yeni insanabənzər və dördayaqlı robotların, həmçinin şəbəkəyə qoşulan elektrik enerji çeviricilərinin idxalına qadağa qoyub.

Federal Rabitə Komissiyası tətbiq edilən məhdudiyyətləri açıqlayıb. Qadağa bərpa olunan enerji mənbələrini və batareyaları elektrik şəbəkələri, eləcə də məlumat mərkəzləri ilə birləşdirən yeni robot modellərini və enerji çeviricilərini əhatə edir.

Qurum cihazların təchizat zəncirində boşluqlar yarada biləcəyini, ABŞ-nin iqtisadi və milli təhlükəsizliyinə zərər vuracağını, həmçinin kritik infrastruktur üçün kibertəhlükəsizlik riski daşıdığını bildirib. Federal Rabitə Komissiyasının sədri Brendan Karr qurumun Amerikanın kritik təchizat zəncirlərini qorumaq üçün işləri davam etdirəcəyini vurğulayıb.

Rəsmilərin sözlərinə görə, məhdudiyyətlərin məqsədi məlumat oğurluğu və kiberhücum risklərini azaltmaq, eyni zamanda şirkətləri istehsalı ABŞ-yə köçürməyə təşviq etməkdir. Qərar dərhal qüvvəyə minib və hələ bazara çıxarılmayan modellərə şamil olunur. Bununla belə, Federal Rabitə Komissiyası artıq satışa icazə verilmiş modellərin icazələrini də ləğv etmək səlahiyyətinə malikdir.

Çinin Vaşinqtondakı səfirliyi ABŞ-ni Çin şirkətlərini ləkələməkdən və onları sanksiyalarla hədələməkdən əl çəkməyə çağırıb və Pekinin öz maraqlarına zərər vuran addımlara qarşı lazımi tədbirlər görəcəyini bəyan edib.

Robotlar və enerji çeviriciləri diqqət mərkəzində

"Counterpoint Research" şirkətinin məlumatına görə, robot qadağası qlobal bazarın beşdə birinə yaxın hissəsinə nəzarət edən Çinin aparıcı insanabənzər robot istehsalçısı "Unitree"yə təsir edəcək. "Unitree" bu yaxınlarda Pentaqonun Çin ordusu ilə əlaqəli olduğu iddia edilən şirkətlər siyahısına daxil edilib.

"Unitree" robotlarından birində ABŞ istehsalı olan "Blackwell" çipindən istifadə etmək üçün "Nvidia" ilə əməkdaşlıq edib. "Nvidia" bildirib ki, robotlardan toplanan məlumatlar ABŞ-də saxlanılacaq və "Unitree"nin ən böyük müştəriləri amerikalı akademik və elmi-tədqiqat institutlarıdır.

Çinlə bağlı sərt mövqeli şəxslər bu robotların sənaye məlumatlarını toplaya biləcəyindən, xarici kəşfiyyat xidmətlərinə yardım edə biləcəyindən və ya məsafədən idarə olunaraq zərər vura biləcəyindən ehtiyat edirlər. ABŞ Konqresinin Nümayəndələr Palatasının Çin üzrə Xüsusi Komitəsinin sədri Con Mulenaar bildirib ki, Federal Rabitə Komissiyasının bu addımı ölkəni qoruyur və ABŞ-nin robototexnika sənayesini gücləndirir.

Enerji çeviricilərinə qoyulan məhdudiyyətlər isə "Sungrow Power Supply" və "Huawei" kimi şirkətlərin liderlik etdiyi Çin bazarını hədəf alır. ABŞ rəsmiləri "Volt Typhoon" kimi dövlət dəstəkli kiberkampaniyaların bu cihazlardan Amerika infrastrukturuna hücumları gizlətmək üçün istifadə edə biləcəyindən narahatdırlar.

Bundan əlavə, Xəzinə naziri Skott Bessent Çin süni intellekt şirkətlərinin ABŞ-nin intellektual mülkiyyətini oğurladıqları iddiası ilə sanksiyalarla üzləşə biləcəyi barədə xəbərdarlıq edib.

Kopyalandı