“Starlink” və süni intellekt “SpaceX”in gəlirlərini kəskin artırıb

“SpaceX”in rüblük gəlirləri kəskin artıb. Şirkət bunu “Starlink” peyk interneti xidmətinə yüksək tələbat və süni intellekt biznesinin sürətli inkişafı ilə əlaqələndirib.

Şirkət birjaya çıxdıqdan sonra ilk maliyyə hesabatını açıqlayıb. Hesabata görə, iyunda başa çatan üç ayda gəlirlər təxminən iki dəfə artıb. Lakin gələcək layihələr üçün xərclərin kəskin artması investorları narahat edib.

Hesabatın açıqlanmasından sonra “SpaceX”in səhmlərinin qiyməti 7,5 faiz aşağı düşüb.

“Starlink” əsas gəlir mənbəyidir

“SpaceX” ikinci rübdə 7,8 milyard dollar gəlir əldə edib. Ötən ilin eyni dövründə bu göstərici 4,1 milyard dollar olub. Son nəticə analitiklərin proqnozlarını üstələyib.

“Starlink”dən əldə olunan gəlir şirkətin ümumi gəlirinin yarıdan çoxunu təşkil edib.  Dünya üzrə müştərilərin sayının artması “Starlink”in gəlirlərini 66 faiz artırıb.

Peyk interneti xidmətinin hazırda təxminən 12 milyon abunəçisi var. Lakin yeni bazarlarda daha ucuz tariflərin tətbiqi bir müştəridən əldə edilən orta gəlirin azalmasına səbəb olub.

“SpaceX”in prezidenti Qvinn Şotvell bildirib ki, şirkət ənənəvi mobil rabitə operatorları ilə birbaşa rəqabət aparacaq. “SpaceX” peyk şəbəkəsini yerüstü infrastrukturla birləşdirərək tammiqyaslı mobil xidmət yaratmağı, “T-Mobile”, “AT&T” və “Verizon”dan çox sayda müştəri cəlb etməyi planlaşdırır.

Süni intellekt biznesi böyüyür

Süni intellekt “SpaceX”in ən sürətlə inkişaf edən biznes istiqamətlərindən birinə çevrilib.

“xAI”, “Grok” və “X” platformasını əhatə edən bu bölmənin gəlirləri ötən ilin eyni dövrü ilə müqayisədə təxminən 250 faiz artıb.

Bununla belə, tənqidçilər bu strategiyanı dayanıqlı hesab etmirlər. Onlar süni intellekt biznesinin və “Starship” proqramının “Starlink”dən əldə olunan gəlirlə maliyyələşdirilməsinə qarşı çıxırlar.

İkinci rübdə şirkətin ümumi əməliyyat zərəri 970 milyon dollardan 143 milyon dollara enib. Süni intellekt bölməsinin əməliyyat zərəri azalıb, “Starlink”in əməliyyat gəliri isə 79 faiz artıb.

Yüksək xərclər səhmlərə təzyiq göstərir

Güclü maliyyə nəticələrinə baxmayaraq, “SpaceX” gələcək layihələrə investisiyalarını kəskin artırıb.

Rüb ərzində kapital xərcləri 18 milyard dolları ötüb. Vəsait əsasən süni intellekt infrastrukturuna və “Starship” raket proqramının inkişafına yönəldilib.

Baş maliyyə direktoru Bret Conson xərclərin növbəti iki rübdə də oxşar səviyyədə qalacağını bildirib.

Şirkət “Starmind AI1” orbital hesablama peykləri üçün hesablama sistemlərinin hazırlanması üzrə “Nvidia” ilə tərəfdaşlıq da elan edib.

İnvestorlar şirkət birjaya çıxdıqdan sonra səhmlərin satışına qoyulan müvəqqəti məhdudiyyətin nə vaxt bitəcəyini də izləyirlər. Məhdudiyyət aradan qalxdıqdan sonra şirkətin əməkdaşları və ilkin investorlar səhmlərini sata biləcəklər. Bu, “SpaceX”in iyunda birjaya çıxmasından sonra onların ilk səhm satışı olacaq.

Teqlər

“Starlink” “SpaceX” süni intellekt Qvinn Şotvell peyk interneti Starship texnologiya sektoru “AT&T”