“Anthropic” rəhbəri süni intellekt modellərinin inkişaf tempini azaltmağa çağırıb

“Anthropic” şirkətinin baş direktoru Dario Amodei süni intellekt şirkətlərini modellərin inkişaf tempini azaltmağa çağırıb. Onun fikrincə, bu addım risklərin qiymətləndirilməsi və təhlükəsizlik tədbirlərinin görülməsi üçün daha çox vaxt qazandıracaq.

Amodei “X” sosial şəbəkəsində paylaşdığı məqalədə bildirib ki, modellərin inkişaf tempi azaldılsa belə, süni intellekt sahəsində irəliləyiş sürətlə davam edəcək.

O, aparıcı süni intellekt şirkətlərində müstəqil üçüncü tərəf qiymətləndiricilərinin daimi fəaliyyət göstərməsini, onların şirkət əməkdaşları ilə eyni səviyyədə məlumat və alətlərə çıxış əldə etməsini təklif edib. Qiymətləndiricilər şirkətlərin alətlərini və daxili risk qiymətləndirmə proseslərini araşdırmalı, lazımi təhlükəsizlik tədbirlərinin tətbiqini yoxlamalıdırlar.

Bu təklif “Anthropic”in Claude modellərindən silah hazırlanması, kiberəməliyyatlar, müşahidə və dələduzluq məqsədilə istifadə hallarını əks etdirən hesabatından sonra irəli sürülüb.

Amodei süni intellekt şirkətlərini risklərin idarə olunması üzrə ortaq standartlar hazırlamaq üçün könüllü əməkdaşlığa da çağırıb. Bu çağırış ABŞ qanunvericilərinin süni intellektin tənzimlənməsi ilə bağlı qaydaların qəbuluna dair tələbləri gücləndirdiyi bir vaxtda səsləndirilib.

Kopyalandı