Texnologiya nəhəngləri süni intellekt qaydaları ilə bağlı Trampa mövqelərini çatdırıblar

Süni intellektin tənzimlənməsi ilə bağlı fikir ayrılıqları dərinləşdikcə, dünyanın aparıcı texnologiya rəhbərləri ABŞ Prezidenti Donald Trampın mövqeyinə təsir göstərməyə çalışırlar.

“The Wall Street Journal” qəzetinin məlumatına görə, İlon Mask, “Meta”nın baş direktoru Mark Zukerberq və “Nvidia”nın baş direktoru Censen Huanq son həftələrdə Donald Tramp ilə süni intellektin tənzimlənməsi məsələsi barədə danışıblar.

Müzakirələr “Google DeepMind”ın baş direktoru Demis Hassabisin qabaqcıl süni intellekt modellərini qiymətləndirəcək ABŞ-nin rəhbərlik etdiyi qurumun yaradılması təklifindən sonra başlayıb. “Anthropic” şirkətinin baş direktoru Dario Amodei də daha sərt nəzarətə çağırıb.

Texnologiya rəhbərləri tənzimləmə məsələsində fərqli mövqelər sərgiləyirlər

Mask, Zukerberq və Huanq təklif olunan yanaşmanın bəzi müddəalarına qarşı çıxırlar. Bununla belə, Mask aparıcı süni intellekt şirkətlərinin qabaqcıl modelləri istifadəyə verməzdən əvvəl bir-birinin sistemlərini təhlükəsizlik baxımından sınaqdan keçirməsini təklif edib. Huanq isə mövcud qanunların kifayət etdiyini bildirir.

“Bizə yeni qanunlar və qaydalar lazım deyil”, — Huanq “Salesforce” şirkətinin “Dreamforce” konfransında deyib.

“OpenAI”ın baş direktoru Sem Altman da Amodei və Maska qoşularaq şirkətləri ən güclü süni intellekt sistemlərinin inkişafını yavaşlatmağa çağırıb.

Tramp süni intellektlə bağlı qorxuları “uydurma” adlandırıb

Tramp əlavə tənzimləmələrin Çinə üstünlük qazandıra biləcəyini bildirərək bu çağırışları rədd edib.

O, süni intellektlə bağlı qorxuları ‘uydurma’ adlandırıb. Tramp ABŞ-də mövcud cinayət qanunlarının və tənzimləmə mexanizmlərinin texnologiya şirkətlərinə nəzarət üçün kifayət etdiyini bildirib.

Mübahisə süni intellektin təhlükəsizliyi ilə bağlı artan narahatlıqları və daha sərt tənzimləmələrin ABŞ-nin rəqabət qabiliyyətinə mümkün təsirini əks etdirir.

• Quterreş süni intellekt təhlükəsizliyinin gücləndirilməsinə çağırıb
• Tramp süni intellekt yarışının yavaşladılmasına qarşı çıxıb
• “Anthropic” rəhbəri süni intellekt modellərinin inkişaf tempini azaltmağa çağırıb

Teqlər

İlon Mask Mark Zukerberq Censen Huanq Donald Tramp süni intellekt "Meta" Dario Amodei