“Meta” yeni nəsil VR və ağıllı eynəklərini nümayiş etdirib

“Meta” sentyabrın 23-də ABŞ-nin Kaliforniya ştatında keçirilən “Meta Connect” tədbirində yeni virtual reallıq eynəyini və kamerasız ağıllı eynəyini təqdim edib. Şirkət süni intellektlə işləyən bu cihazların istifadəsini genişləndirməyi planlaşdırır.

Daha yüngül VR eynəyi

“Meta”nın yeni virtual reallıq (VR) eynəyi təxminən 100 qram çəkidədir. Prosessor və batareya cibdə daşına bilən ayrıca qurğuda yerləşdiyindən eynək daha yüngüldür.

Cihaz 5K təsvir ölçülü ekranla təchiz olunub. Onu göz hərəkətləri, əl jestləri və səsli əmrlərlə idarə etmək mümkündür. Eynəyin 2027-ci ilin yazında satışa çıxarılması planlaşdırılır. ABŞ-də qiyməti təxminən 1 300 dollar olacaq. “Meta”nın rəhbəri Mark Zukerberq cihazı böyük texnoloji irəliləyiş adlandırıb.

Kamerasız ağıllı eynək

Şirkət “Ray-Ban Meta Audio” adlı ilk kamerasız ağıllı eynəyini də təqdim edib. Eynəklə musiqi dinləmək, zəng etmək və “Muse” adlı süni intellekt köməkçisi ilə danışmaq mümkündür.

Cihaz bir dəfə enerji ilə doldurulduqda 12 saata qədər işləyir. Eynəyin satış üçün göndərilməsinə oktyabrın 13-də başlanacaq. Başlanğıc qiyməti ABŞ-də 349 dollar, Böyük Britaniyada isə 319 funt sterlinq olacaq.

Kamerasız model insanların xəbəri olmadan videoya çəkilməsi ilə bağlı narahatlıqlar fonunda təqdim edilib. Bununla belə, eynəklə səs yazmaq mümkündür. “IDC” şirkətinin tədqiqat direktoru Citeş Ubrani bildirib ki, əsas narahatlıq səsin insanların razılığı olmadan yazıla bilməsidir.

“Meta” isə kameranın çıxarılmasının yeganə səbəbinin məxfilik olmadığını bildirir. Şirkətin məlumatına görə, səs funksiyaları ağıllı eynəklərdə ən çox istifadə olunan imkanlar sırasındadır.

“Muse” digər cihazlarda da işləyəcək

“Meta” “Muse” süni intellekt köməkçisini digər ağıllı eynəklərinə də əlavə etməyi planlaşdırır. Şirkət bildirir ki, istifadəçilər səsli əmrlərlə məhsullar haqqında məlumat ala və gündəlik işlərini yerinə yetirə biləcəklər.

Tədbirdə “Muse Charm” adlı kiçik cihaz da nümayiş etdirilib. Cihaz “Muse” köməkçisi ilə danışmaq üçün nəzərdə tutulub. “Meta” onunla bağlı əlavə məlumatı ilin sonunadək açıqlayacağını bildirib.

• Polşa Aİ-ni “Meta”ya qarşı sərt tədbirlər görməyə çağırıb
• "Meta" 16,68 milyard dollarlıq nəhəng barışıq sazişini qəbul edib

Teqlər

VR eynəyi ağıllı eynək Kamerasız eynək Virtual reallıq Meta ABŞ Kaliforniya