“Bavi” tayfunu Çinin şərqini vurub: İki milyona yaxın insan təxliyə edilib, günlərlə davam edəcək yağışlar gözlənilir

Bu ilin ən güclü tayfunu olan “Bavi” bazar günü  ölkənin Çjetszyan əyalətində sahilə çıxaraq güclü yağışlara, küləyə, daşqınlara və torpaq sürüşmələrinə səbəb olub.

Tayfun yaxınlaşmazdan əvvəl 2,8 milyondan çox insan təhlükəsiz ərazilərə təxliyə edilib.
Tayfun bazar günü tropik fırtına səviyyəsinədək zəifləyib. Lakin onun Çinin şərq və şimal bölgələrində uzunmüddətli güclü yağışlara səbəb olacağı gözlənilir.

Yueçində 1300-dən çox ağac aşıb, küçələri su basıb, torpaq sürüşməsi  dağ yolunu bağlayıb. Fövqəladə hallar xidmətləri dağıntıları təmizləyərək yolları yenidən nəqliyyatın hərəkəti üçün açıblar.

“Çox güclü külək əsirdi. Dam kirəmitlərinin və ağac budaqlarının yerə düşdüyünü eşidirdik. Əlbəttə, qorxurduq, amma dəniz kənarında yaşadığımız üçün belə hallara öyrəşmişik”, – Yueçin sakini Li Lyanşin “Reuters”ə bildirib.

Fövqəladə hallar xidmətləri bazar günü aşmış ağaclarla dolu, su basmış küçələri təmizləmək üçün ekskavatorlardan və zəncirli mişarlardan istifadə ediblər.

Şəhərin dağlıq şimal hissəsində CCTV-nin yayımladığı görüntülərdə torpaq sürüşməsi nəticəsində iri qaya parçalarının dağ yoluna yuvarlandığı, daşmış çay sularının isə yaxınlıqdakı ağacları su altında qoyduğu əks olunub.

Yuyhuanın sahilyanı balıqçılıq şəhərciyi Kanmendə mağaza sahibi 72 yaşlı Lin Yonqjin “Bavi” tayfununun vurduğu zərəri hesablayırdı.

Dənizə baxan mağaza fırtınadan ən çox zərər çəkən obyektlərdən biri olub. Girişdəki talvarı saxlayan metal konstruksiyalar çöküb. Həmçinin qonşu binanın pəncərələrindən biri küləyin təsirindən sınıb. Sahibkar tayfunun ona 6 min yuandan (885 dollar) çox ziyan vurduğunu bildirib.

“Tayfun sahilə çatdıqdan sonra əlimizdən nə isə gəlmədi. Yağış suyu evə doldu. Bütün gecəni suyu təmizləməklə məşğul olduq. Səhər saat 5-dən sonra yata bildik”, – o, deyib.

 

Nəqliyyatda fasilələr

“Bavi” şənbə günü Tayvanın şimalından keçərək adanın böyük hissəsində güclü külək və leysan yağışlarına səbəb olub. Tayvanın şimalındakı Miaoli əyalətinin bir bölgəsində yağıntının miqdarı təxminən 80 santimetrə çatıb.

Tayvanın yanğınsöndürmə xidməti bazar günü 134 nəfərin xəsarət aldığını bildirib. Nəqliyyat Nazirliyinin məlumatına görə, 137 beynəlxalq və 62 daxili aviareys ləğv edilib.
Çinin şərqində Hançjounun iki əsas dəmiryol stansiyasında qatarların hərəkəti dayandırılıb. Syaoşan Beynəlxalq Hava Limanında isə 327 reys ləğv olunub.

Qonşu Şanxayda ümumilikdə 1620 qatar reysi və 684 aviareys ləğv edilib. Bu barədə “The Paper” nəşri məlumat yayıb.

Güclü yağışlar davam edəcək

“Bavi” bazar günü Anhui əyalətinə doğru irəliləyib. Proqnozlara görə, çərşənbə axşamınadək şimal-şərq istiqamətində dönərək Sarı dənizə doğru hərəkət edəcək.

Hebey, Şandun, Ciansu, Anhui, Liaonin, Cilin əyalətlərində güclü və leysan xarakterli yağışların yağacağı gözlənilir. Bu isə torpağın artıq su ilə doymuş olduğu ərazilərdə daşqın riskini artırır. Hebeydə xilasedicilər sel suları səbəbindən köməksiz vəziyyətdə qalan insanlara çatmaq üçün şişmə qayıqlardan istifadə ediblər.

Mütəxəssislər xəbərdarlıq ediblər ki, “Bavi” zəifləməsinə baxmayaraq, ölkənin daxili hissələrində, sahildən yüzlərlə kilometr uzaqda təhlükəli hava şəraiti yaratmağa davam edə bilər.
Alimlər bildiriblər ki, gözlənilən El-Nino hava hadisəsinin formalaşması səbəbindən Çin bu il daha çox ekstremal hava şəraiti ilə üzləşə bilər. Bu hadisə temperaturun yüksəlməsinə və tayfunların trayektoriyasının qərbə, ölkə sahillərinə doğru dəyişməsinə səbəb ola bilər.

Teqlər

Bavi tayfunu Çin Çjetszyan daşqın torpaq sürüşməsi riski güclü yağış təxliyə