"Bavi" tayfunu Yaponiyanın cənubunu cənginə alıb, Tayvanda əhali təxliyə olunub

"Bavi" tayfunu Yaponiyanın cənubundakı Sakişima adalar qrupuna güclü leysan yağışları və şiddətli küləklərlə ciddi zərbə vurub. Əlaqədar rəsmi qurumlar Tayvana doğru irəliləyən qasırğaya görə daşqın və torpaq sürüşməsi risklərinə qarşı xəbərdarlıq ediblər.

Okinava prefekturasının bir hissəsi olan İşiqaki adasında boş qalmış küçələrdə küləyin qopardığı kiçik qırıntıların uçuşduğu görünüb. Yalnız az sayda avtomobil fırtına və yağışa rəğmən hərəkət etməyə cəhd göstəriblər. Mərkəzi yaxınlığında sabit küləyin maksimal sürəti saatda 144 km-ə çatan bu irimiqyaslı və güclü fırtınanın yaratdığı güclü axınlar səbəbindən limandakı gəmilər şiddətlə yırğalanıb. Səlahiyyətli orqanlar küləyin bəzi anlarda saatda 198 km-ə qədər güclənə biləcəyi barədə xəbərdarlıq ediblər.

Məşhur turizm məkanı olan İşiqaki boyunca təyyarə və bərə səfərləri tamamilə dayandırılıb. Aviaşirkətlər 345 reysi təxirə salıb, Okinavada isə 24 000-dən çox təsərrüfat elektrik enerjisiz qalıb.

Fırtına yaxınlaşdıqca Tayvan minlərlə insanı təxliyə edir

Qonşu Tayvanda qasırğanın adanın şimalına doğru yaxınlaşması fonunda həyat tamamilə iflic olub və hökumət əsasən dağlıq ərazilərdən 14 mindən çox insanı təxliyə edib.

Tədricən zəifləyən "Bavi" tayfununun Tayvanda birbaşa quruya daxil olmayacağı gözlənilsə də, bəzi bölgələrdə yağıntının miqdarının təxminən 1 metrə çatacağı barədə proqnozları nəzərə alan hökumət insan tələfatının qarşısını almaq üçün ciddi ehtiyat tədbirləri görür.

Təxliyə edilənlərin əksəriyyəti adanın şimal və şərq rayonlarının payına düşür. Hava nəqliyyatında isə 920 beynəlxalq, həmçinin 280 daxili reys ləğv olunub. Tayvanın demək olar ki, bütün şəhər və inzibati rayonlarında şənbə günü üçün "tayfun tətili" elan edilib, həftəsonu açıq ola biləcək ofis və məktəblər bağlanıb.

"Bavi" zəiflədikdən sonra Çinə tərəf yönəlir

Paytaxt Taybeyin mərkəzində külək və yağış müşahidə olunsa da, bəzi sakinlər hələ də küçələrdə gəzişir.Paytaxt sakini, iti ilə səhər gəzintisinə çıxan 68 yaşlı Yeh Maoşiunq vəziyyəti belə qiymətləndirib: "Hər şey qaydasındadır, o qədər də ciddi bir şey yoxdur. Sadəcə bir az güclü külək əsir."

Lakin Taybeyin dağətəyi zonada yerləşən Beytou rayonunda saatda təxminən 100 km-ə çatan külək ağacları aşırıb və çaylarda suyun səviyyəsini yüksəldib.

Proqnozlara görə, "Bavi" tayfununun bazar günü səhər saatlarında Çinin şərqində yerləşən və 10 milyon əhalisi olan Vencou şəhərinə çatacağı gözlənilir.

Teqlər

Bavi tayfunu yaponiya Tayvan qasırğa Çin təxliyə