ABŞ İrana yeni zərbələr endirib, Tramp həlak olan iki hərbçini yad edib

İordaniya üç İran raketini vurduğunu bildirib

Anadolu

İordaniya ordusu ölkə ərazisini hədəf alan üç İran raketini vurduğunu açıqlayıb. Hücum zamanı ölkədə hava həyəcanı siqnalları səsləndirilib.

“Petra” agentliyinin yaydığı hərbi bəyanata görə dördüncü raket yaşayış məntəqələrindən uzaq əraziyə düşüb.

Hücum nəticəsində ölən, yaralanan və ya dağıntı barədə məlumat verilməyib.

Küveyt: İranın hücumu elektrik stansiyasında yanğına səbəb olub

Küveytin Elektrik, Su və Bərpaolunan Enerji Nazirliyi elektrik enerjisi istehsalı və suyun duzsuzlaşdırılması stansiyasının İranın yeni hücumuna məruz qaldığını bildirib. Zərbə nəticəsində obyektdə yanğın baş verib.

KUNA agentliyinin yaydığı bəyanata görə bu, İranın Küveytin enerji obyektlərinə ikinci hücumudur.

İran ABŞ-nin “Darkhovin” AES ərazisinə zərbəsini pisləyib

İranın Atom Enerjisi Təşkilatı ABŞ-nin "Darkhovin"də tikilməkdə olan atom elektrik stansiyasının ərazisinə hücumunu pisləyib. Qurum zərbənin beynəlxalq hüququ pozduğunu bildirib.

“Mehr” agentliyi hücumun nə vaxt baş verdiyi barədə məlumat verməyib.

İranın cənub-qərbindəki Xuzistan vilayətində yerləşən stansiyanın tikintisinə 2022-ci ildə başlanılıb.

İran: Hörmüzdə xəbərdarlıqlara məhəl qoymayan iki gəmi qəzaya düşüb

İranın İnqilab Keşikçiləri Korpusu Hörmüz boğazından “təhlükəli marşrut”la keçməyə çalışan iki gəminin qəzaya düşdüyünü bildirib. “Tasnim” agentliyinin məlumatına görə daha iki gəmi həmin marşrutdan imtina edib.

Qurum dörd gəminin İranın xəbərdarlıqlarına məhəl qoymadığını və ABŞ-nin dəstəyi ilə hərəkət etdiyini iddia edib.

Bəyanatda ABŞ-nin çağırışlarına əməl edərək təhlükəli marşrutlara daxil olan gəmilərin “qəzalarla üzləşəcəyi” barədə xəbərdarlıq edilib.

İran təyyarəsinin Səna hava limanına enməsinə icazə verilməyib

Yəmənin beynəlxalq səviyyədə tanınan hökuməti İran təyyarəsinin husilərin nəzarətində olan Səna Beynəlxalq Hava Limanına uçuşunu tamamlamasına mane olduğunu bildirib.

Nəqliyyat naziri Möhsün əl-Əmri deyib ki, tələb olunan icazələr alınmadan heç bir uçuşun həyata keçirilməsinə yol verilməyəcək.

Onun sözlərinə görə qərar uçuşun təsdiqlənmiş rəsmi kanallar və prosedurlar vasitəsilə razılaşdırılmaması səbəbindən qəbul edilib. Nazir əlavə təfərrüat açıqlamayıb.

ABŞ-nin İordaniyadakı səfirliyi vətəndaşlara xəbərdarlıq edib

ABŞ-nin Əmmandakı səfirliyi amerikalı vətəndaşlara Əqəbədəki hava və dəniz limanlarına getməməyi tövsiyə edib. İordaniya hakimiyyəti “konkret və etibarlı təhlükə” səbəbindən bu obyektləri təxliyə edib.

Səfirlik vətəndaşları İordaniyanın təhlükəsizlik qurumlarının göstərişlərinə əməl etməyə və ölkədəki hərbi bazalara səfərlərdən çəkinməyə çağırıb.

Bəhreyndə hava hücumu xəbərdarlığı elan edilib Anadolu

ABŞ ilə gərginliyin artdığı bir vaxtda İranın Körfəz ölkələrinə raket və PUA hücumlarını davam etdirməsi fonunda Bəhreynin müxtəlif bölgələrində hava hücumu siqnalları işə salınıb.

Bəhreynin Daxili İşlər Nazirliyi sakinləri sakit olmağa və ən yaxın təhlükəsiz yerə keçməyə çağırıb.

BƏƏ-nin qeyri-neft xarici ticarəti 13,1 faiz artıb

Birləşmiş Ərəb Əmirliklərinin qeyri-neft xarici ticarəti 2026-cı ilin ilk yarısında illik müqayisədə 13,1 faiz artaraq 1,937 trilyon dirhama, yəni 527,42 milyard dollara çatıb.

Bu barədə Dubayın əmiri və BƏƏ-nin Baş naziri Şeyx Məhəmməd bin Raşid Əl Məktum “X” platformasında bildirib.

Onun sözlərinə görə həmin dövrdə qeyri-neft ixracı rekord həddə — 452,8 milyard dirhəmə yüksəlib.

İran Əhvazda ABŞ-yə məxsus MQ-9 PUA-sını vurduğunu bildirib

İranın İslam İnqilabı Keşikçiləri Korpusu ölkənin cənub-qərbində yerləşən Əhvaz şəhəri üzərində ABŞ-yə məxsus MQ-9 pilotsuz uçuş aparatını vurub. Bu barədə İranın dövlət televiziyası IRIB məlumat yayıb.

ABŞ rəsmiləri bu iddiaya münasibət bildirməyiblər.

Küveyt İran raketləri və PUA-larını zərərsizləşdirdiyini bildirib

Küveyt ordusu ölkəni hədəf alan İran raketləri və pilotsuz uçuş aparatlarının qarşısının alındığını bildirib. Dövlət mediasının məlumatına görə Küveytin bəzi bölgələrində hava hücumu xəbərdarlığı səsləndirilib.

Qara dənizdə CPC terminalı yaxınlığında tankerə hücum edilib

Xəzər Boru Kəməri Konsorsiumu (CPC) bildirib ki, “Nordic Zenith” tankeri Qara dənizdəki ixrac terminalı yaxınlığında hücuma məruz qalıb. Hadisə nəticəsində gəmi planlaşdırıldığı kimi neft yükləyə bilməyib.

CPC-nin məlumatına görə hücumdan sonra tankerdə yanğın baş verib və gəmi yükləmə əməliyyatları üçün yararsız hesab olunub.

SOS siqnalından sonra 13 ekipaj üzvü təxliyə edilib. Konsorsiumun mətbuat xidməti daha 9 nəfərin könüllü olaraq gəmidə qaldığını bildirib.

Hücumun səbəbi və təfərrüatları barədə əlavə məlumat verilməyib.

Pakistan və Küveyt müdafiə tərəfdaşlığını genişləndirməyi müzakirə edir

Pakistan və Küveyt daha geniş müdafiə sazişi üzrə danışıqlar aparır. Müzakirələr enerji əməkdaşlığı və investisiya layihələrini də əhatə edə bilər.

Danışıqlar ilkin mərhələdədir. Küveytin Pakistanın Səudiyyə Ərəbistanı ilə mövcud razılaşmasına bənzər hərbi dəstək istədiyi bildirilir.

Pakistan isə enerji təhlükəsizliyi, yanacağın saxlanılması və təchizatı, eləcə də investisiya imkanlarını nəzərdən keçirir.

Müzakirələr ABŞ–İran gərginliyi fonunda aparılır. Rəsmilərin sözlərinə görə İslamabad hazırda Küveytə döyüş qüvvələri göndərməyi planlaşdırmır.

Əraqçi İsraili ABŞ-ni müharibəyə sürükləməkdə ittiham edib

İranın xarici işlər naziri Abbas Əraqçi İsraili ABŞ-ni “qalib gəlməsi mümkün olmayan seçim müharibəsinə” cəlb etməyə çalışmaqda ittiham edib. O, Prezident Donald Trampın tərəfdarlarını hədəf aldığı iddia olunan İsrailin təsir əməliyyatları barədə media materialına istinad edib.

Əraqçi həmçinin İsrailin tənqidçilərini susdurmaq üçün ABŞ vergiödəyicilərinin vəsaitindən istifadə etdiyini iddia edib. O, bütün bunların “tezliklə ifşa olunacağını” bildirib.

İran Qətərdəki ABŞ bazasını hədəfə aldığını açıqlayıb

İran İslam İnqilabı Keşikçiləri Korpusu (SEPAH) Qətərdə yerləşən ABŞ-nin Əl-Udeyd aviabazasını hədəfə aldığını açıqlayıb. Bu barədə İranın dövlət xəbər agentliyi IRNA məlumat yayıb.

Ədən körfəzində kənar şəxslər gəminin göyərtəsinə qalxıblar

Ədən körfəzində hərəkət edən gəminin göyərtəsinə Yəmənin Əl-Mükəlla limanından 120 kilometr cənubda kənar şəxslər qalxıb. Bu barədə Böyük Britaniyanın Dəniz Ticarəti Əməliyyatları Agentliyi məlumat yayıb.

İranın zərbəsi Küveytdə enerji və su infrastrukturuna ziyan vurub 

İranın endirdiyi zərbə nəticəsində Küveytdə elektrik enerjisi istehsalı və suyun duzsuzlaşdırılması müəssisələrindən birinə ziyan vurub. Hücum nəticəsində yanğın baş verib və elektrik enerjisi istehsal edən bir neçə blokun fəaliyyəti pozulub.

Britaniyalı kişi İran kəşfiyyatına yardım göstərməkdə ittiham olunub

Britaniya polisi 39 yaşlı kişini İranın kəşfiyyat xidmətinə yardım göstərməkdə ittiham edib. İttiham milli təhlükəsizlik qanunvericiliyinə əsasən irəli sürülüb. Bu, Birləşmiş Krallıqda Tehran tərəfindən dəstəkləndiyi iddia olunan fəaliyyətlərə qarşı mübarizənin gücləndirildiyi bir vaxta təsadüf edir.

İran İordaniyadakı ABŞ qırıcılarını hədəfə alıb

SEPAH İordaniyada yerləşdirilmiş ABŞ qırıcılarını hədəfə aldığını bildirib. Bu barədə İranın dövlət mediası məlumat yayıb.

SEPAH Omandakı radar obyektlərini hədəfə aldığını bildirib

SEPAH donanması Omandakı radar obyektlərini, o cümlədən ABŞ-yə məxsus hava məkanına nəzarət radarını hədəfə alıb. Bu barədə ISNA informasiya agentliyi məlumat yayıb.

Agentlik SEPAH-ın bəyanatına istinadən bildirib ki, səhər saatlarında Salamə qayalıqlarında yerləşən dəniz nəzarəti radarı və Omanın Qanim bölgəsində ABŞ-yə məxsus hava məkanına nəzarət radarı hədəfə alınıb.

SEPAH hər iki radar sisteminin məhv edildiyini iddia edib.

Hörmüz boğazında gəmi hərəkəti maydan bəri ən aşağı səviyyəyə enib
 

Hörmüz boğazından keçən gəmilərin sayı may ayından bəri ən aşağı gündəlik səviyyəyə enib. İyulun 16-da boğazdan cəmi üç yük gəmisi keçib. ABŞ ilə İran arasında döyüşlərin yenidən başlaması fonunda bəzi gəmilər hərəkətini dayandırıb, digərləri isə geri dönüb.

Çin və Pakistan ABŞ ilə İranı atəşkəsə və danışıqlara çağırıb
 

Çin və Pakistan ABŞ ilə İran arasında dərhal atəşkəs elan olunmasına və danışıqların bərpasına çağırıb. Bu barədə Çinin Xarici İşlər Nazirliyi məlumat yayıb.

İordaniya: İrandan atılan üç raket zərərsizləşdirilib
 

İordaniya Silahlı Qüvvələri ölkəni hədəfə alan üç İran raketinin zərərsizləşdirildiyini bildirib. Hadisə nəticəsində ölən və ya yaralanan olmayıb, maddi ziyan qeydə alınmayıb.

İran Suriyadakı keçmiş ABŞ bazasına zərbə endirdiyini bildirib
 

SEPAH Suriyanın Əl-Tanf bölgəsində yerləşən keçmiş ABŞ bazasına zərbə endirdiyini bildirib. SEPAH hücumun İranşəhrdə iranlı hərbçilərin öldürülməsinə cavab olaraq həyata keçirildiyini açıqlayıb.

Bu iddia müstəqil şəkildə təsdiqlənməyib. ABŞ ordusu daha əvvəl həmin bazadan qüvvələrini çıxardığını bildirmişdi.

SEPAH, həmçinin ABŞ-nin hücumları davam etdiyi müddətdə İranın Hörmüz boğazı vasitəsilə neft və qaz ixracını dayandıracağını bildirib.

BEA neft nəqlində fasilələrin yarana biləcəyi barədə xəbərdarlıq edib

Hörmüz boğazından neft nəqli yaxın həftələrdə yaxşılaşmasa, dünya enerji təhlükəsizliyi risk altında qalacaq. Bu qənaətə Beynəlxalq Enerji Agentliyi (BEA) gəlib. Onun məlumatına görə, fövqəladə ehtiyatlar və ABŞ-də neft hasilatının artırılması təchizatdakı fasilələrin təsirini yalnız müəyyən müddət azalda bilər.

Agentliyinin rəhbəri Fatih Birol iyulun 16-da Xarici Əlaqələr Şurasının tədbirində bildirib:

“Neft təhlükəsizliyi hələ də mühüm məsələ olaraq qalır. Vəziyyət yaxın bir neçə həftə ərzində yaxşılaşmasa, narahat olmalıyıq. Mən də narahatam”, – deyə o bildirib.

ABŞ İranın bir neçə şəhərinə zərbələr endirib: yeddi nəfər ölüb

ABŞ İranın cənubundakı Bəndər-Xəmir şəhərində körpülərə zərbə endirib. Hücum nəticəsində yeddi nəfər ölüb. Bu barədə IRNA agentliyi Hörmüzqan Tibb Elmləri Universitetinə istinadən məlumat yayıb.

Digər zərbənin ölkənin cənub-şərqində yerləşən Çabahar liman şəhərinə endirildiyi bildirilir. İranın dövlət mediası şəhərdə üç partlayış səsinin eşidildiyini açıqlayıb.

Bəhreyndə iyulun 17-də hava hücumu xəbərdarlığı verilib

İyulun 17-də Bəhreyndə ikinci dəfə hava hücumu xəbərdarlığı verilib. Bu barədə Daxili İşlər Nazirliyi məlumat yayıb. Hadisə regionda gərginliyin artdığı bir vaxtda baş verib.

Qətər: İranın raket hücumunun qarşısını alınıb, bir uşaq yaralanıb  

Qətərin Müdafiə Nazirliyi ölkə qüvvələrinin iyulun 17-də səhər saatlarında İranın raket hücumunun qarşısını aldığını bildirib. Daxili İşlər Nazirliyinin məlumatına görə, raketin zərərsizləşdirilməsi zamanı bir uşaq qəlpədən yaralanıb və ona tibbi yardım göstərilib.

Paytaxt Dohada partlayışa bənzər səslər eşidilib, mobil telefonlara isə təhlükəsizlik xəbərdarlıqları göndərilib. ABŞ-nin İran ərazisinə zərbələrindən sonra rəsmi Tehran körfəz ölkələrinə hücumların sayını artırıb.

ABŞ İrana məxsus Qeşm adası və Bəndər-Abbasa zərbələr endirib

ABŞ-yə məxsus mərmilər iyulun 16-da axşam saatlarında Qeşm adasına və Bəndər-Abbas yaxınlığındakı ərazilərə düşüb. Hücumlar İranın ən böyük limanı yaxınlığındakı mövqeləri hədəfə alıb. Hörmüz boğazında yerləşən əsas hərbi-dəniz və SEPAH obyektlərinin ətrafına da zərbələr endirilib.