Əlcəzairin parlament seçkilərində seçici fəallığı rekord həddə enib

Əlcəzair Konstitusiya Məhkəməsinin açıqladığı nəticələrə görə parlament seçkilərində ölkə prezidentini dəstəkləyən üç siyasi partiya üstünlük qazanıb. Bununla yanaşı, seçici fəallığı cəmi 21 faiz təşkil edərək ən aşağı səviyyəyə enib.

Ölkə müstəqillik qazandıqdan sonra hakimiyyətdə olan Milli Azadlıq Cəbhəsi parlamentin aşağı palatası olan 407 yerlik Milli Xalq Assambleyasında 91 mandat qazanıb.

Konstitusiya Məhkəməsinin məlumatına görə hakimiyyətə yaxın Milli Demokratik Birlik 74 mandatla ikinci, mərkəzçi Gələcək Cəbhəsi isə 56 mandatla üçüncü yerdə qərarlaşıb.

Siyasi korrupsiya və işsizliyə qarşı kütləvi etirazlar Şimali Afrika ölkəsinə təxminən 20 il rəhbərlik etmiş keçmiş prezident Əbdüləziz Buteflikanın 2019-cu ildə istefası ilə nəticələnib.

Onu əvəz edən Əbdülməcid Tebbun 2024-cü il prezident seçkilərində səslərin 84,30 faizini toplayaraq yenidən dövlət başçısı seçilib. Lakin əsas rəqiblərindən biri səslərin hesablanması zamanı qanun pozuntularına yol verildiyini iddia edib.

İyulun 2-də keçirilən parlament seçkiləri ərəfəsində yüzlərlə namizədin, eləcə də bir neçə siyasi partiyanın seçki siyahısının qeydiyyatı rədd edilib.

2019-cu il etirazlarında iştirak etmiş bir sıra şəxslər, o cümlədən tanınmış müxalif fəal Kərim Tabbu da cinayət məsuliyyətinə cəlb olunub.

Seçkilərdə 24,7 milyon insan səsvermə hüququna malik olub. Onların 854 mini xaricdə yaşayan vətəndaşlar idi.

Kopyalandı