Rusiya Ukraynada müdafiə tədbiri keçirilən əraziyə raket zərbəsi endirib

Rusiya ordusunun Ukraynanın Kiyev vilayətinə endirdiyi ballistik raket zərbəsi nəticəsində müdafiə sənayesi nümayəndələrinin iştirak etdiyi tədbirdə 10 nəfər ölüb, 100-ə yaxın şəxs yaralanıb.

Hücum Ukrayna paytaxtı yaxınlığında, müdafiə sənayesi ilə bağlı tədbirin keçirildiyi ərazidə baş verib.

Ukrayna Fövqəladə Hallar Xidməti bildirib ki, dağıntılar altından axtarış və xilasetmə işləri başa çatdırılıb. Ərazi yaşayış binalarının yaxınlığında yerləşib.

Ukrayna Prezidenti Volodimir Zelenskiy hücuma görə Rusiyanı günahlandıraraq, hadisəni terror aktı adlandırıb. Lakin o, müharibə şəraitində silahların hazırlanması ilə bağlı böyük tədbirin mülki ərazilərin yaxınlığında keçirilməsi qərarını da tənqid edib.

Araşdırma başlanıb

Tədbir dron istehsalçılarını birləşdirən assosiasiyanın təşkilatçılığı ilə keçirilib və Ukraynanın müdafiə sektorunun nümayəndələri iştirak edib.

Ukrayna Müdafiə Sənayesi Şurası bildirib ki, raket müdafiə sənayesi nümayəndələrinin olduğu əraziyə düşüb. Qurum eyni zamanda tədbirin təşkilatçısı olmadığını vurğulayıb.

Ukraynanın baş prokuroru tədbirin təşkili və təhlükəsizliyinin təmin edilməsində mümkün nöqsanlarla bağlı cinayət işi açıb.

Ukraynanın digər bölgələrinə də zərbələr endirilib

Raket hücumu Rusiyanın Ukraynaya qarşı həyata keçirdiyi genişmiqyaslı zərbələr dalğası fonunda baş verib.

Rəsmilərin məlumatına görə şərqdə yerləşən Slovyansk şəhərində Rusiyanın hava bombası nəticəsində 5 nəfər ölüb, daha bir neçə nəfər yaralanıb.

Sumı vilayətində dron hücumu nəticəsində 2 nəfərin öldüyü, Zaporojye şəhərində isə zərbə nəticəsində ticarət mərkəzində yanğın baş verdiyi və bir neçə nəfərin xəsarət aldığı bildirilib.

2022-ci ilin fevralında Moskvanın genişmiqyaslı müdaxiləsi ilə başlayan müharibə zamanı Rusiya və Ukrayna mülki əhalini hədəfə aldıqlarını inkar edirlər.

Teqlər

Rusiya Ukrayna Rusiya- Ukrayna müharibəsi Kiyev ballistik raket Volodimir Zelenski müharibə