Ukraynanın uzaqmənzilli dron zərbələri Rusiyada azı 8 nəfərin ölümünə səbəb olub

Ukraynanın gecə saatlarında Rusiyanın müxtəlif bölgələrinə endirdiyi dron zərbələri nəticəsində azı səkkiz nəfər həlak olub. Bu barədə bölgə rəsmiləri məlumat verib. Rəsmi Kiyev Rusiyanın logistika, enerji və hərbi infrastrukturuna zərbələri genişləndirib.

Rusiya Müdafiə Nazirliyi avqustun 3-nə keçən gecə Ukraynaya məxsus 635 dronun zərərsizləşdirildiyini bildirib. Bir neçə bölgədə insan tələfatı, yanğın və dağıntı qeydə alınıb.

Belqorod vilayətində dronun uşaq meydançası yaxınlığına düşməsi nəticəsində bir uşaq həlak olub, iki uşaq isə yaralanıb. Ukrayna Müdafiə Nazirliyi hadisə ilə bağlı açıqlama verməyib.

Samara vilayətində ölkənin ən böyük onlayn pərakəndə satış şirkəti olan “Wildberries”ə məxsus anbar vurulub. Hücumdan sonra yanğın baş versə də, xəsarət alan olmayıb. Ukrayna iyulun ortalarından bəri şirkətin obyektlərinə dəfələrlə zərbə endirib.

Saratov vilayətinin Engels şəhərində yaşayış binasına zərbə endirilməsi nəticəsində iki nəfər həlak olub. Engels və Saratov şəhərlərində mülki infrastruktura da ziyan dəyib.

Ukrayna ordusu Saratov neft emalı zavodunu, Engels hərbi aviabazasını və Kaluqa vilayətindəki neft anbarını vurduğunu bildirib. Hər üç obyektdə yanğın baş verdiyi qeyd olunub.

Udmurtiyada dron hücumu nəticəsində üç nəfər həlak olub. Belqorod vilayətinə edilən digər hücumlarda isə daha üç nəfərin öldüyü, beş nəfərin yaralandığı bildirilib.

Başqırdıstanda Rusiyanın hava hücumundan müdafiə qüvvələri sənaye obyektlərinə yönəldilən genişmiqyaslı dron hücumunu dəf edib. Dronlardan biri respublikanın paytaxtı Ufa üzərində vurulub.

Rusiya Müdafiə Nazirliyi isə Nikolayev limanında və onun ətrafında hərbi yük daşıyan gəmilərə, eləcə də infrastruktura zərbələr endirdiyini açıqlayıb. Ukraynanın Zaporojye vilayətində Rusiya hücumları nəticəsində bir nəfər həlak olub, bir neçə nəfər yaralanıb.

Kopyalandı