"Meta" uşaqların təhlükəsizliyi ilə bağlı 567 milyon dollar cərimələnib

ABŞ-nin Nyu-Meksiko ştatının məhkəməsi "Meta" şirkətinin yetkinlik yaşına çatmayan istifadəçilərinin əqli sağlamlığına dəyən zərərə görə 567 milyon dollar ödəməsi barədə qərar çıxarıb.

Beləliklə, "Meta"ın bu iş üzrə ödəməli olduğu ümumi məbləğ 942 milyon dollara çatıb. Hakim bildirib ki, şirkətin platformaları uşaqlar üçün ciddi risklər yaradıb. O, vəsaitin bu risklərin azaldılmasına yönəlmiş tədbirlərə sərf edilməsini tapşırıb.

İddianı Nyu-Meksiko ştatı qaldırıb. Ştat “Meta”nı “Instagram” və “Facebook” da daxil olmaqla platformalarında uşaqların zərərli məzmunla qarşılaşmasının qarşısını almamaqda ittiham edib.

Hakim, həmçinin "Meta"nın tövsiyə sistemlərinin gənc istifadəçiləri zərərli materiallara yönləndirdiyini və bunun ictimai təhlükəsizlik problemi yaratdığını bildirib.

“Meta” qərardan apellyasiya şikayəti verəcək

“Meta” məhkəmənin qərarı ilə razılaşmadığını və apellyasiya şikayəti verəcəyini bildirib.

Şirkət istifadəçilərin təhlükəsizliyini qorumaq, zərərli məzmunu silmək və təhlükəsizlik tədbirlərini gücləndirmək üçün çalışdığını qeyd edib.

Son qərar eyni iş üzrə daha əvvəl tətbiq olunan 375 milyon dollarlıq cərimədən sonra verilib. “Meta” ABŞ-də uşaqların təhlükəsizliyi ilə bağlı minlərlə oxşar məhkəmə işi ilə də üzləşir.

Məhkəmənin qərarına əsasən, şirkət əlavə təhlükəsizlik tədbirləri görməlidir. Yetkin istifadəçilərin hesablarının azyaşlılara tövsiyə edilməsi, eləcə də böyüklərlə azyaşlılar arasında birbaşa mesajlaşma imkanları məhdudlaşdırılmalıdır.

“Meta” həmçinin 18 yaşdan kiçik istifadəçilər üçün bildirişləri və platformadan istifadəni artırmağa yönəlmiş bəzi funksiyaları məhdudlaşdırmalıdır.

Qərar ABŞ hakimiyyətinin sosial media platformalarının uşaqların təhlükəsizliyinə və şəxsi məlumatlarının qorunmasına təsirini daha geniş şəkildə araşdırdığı bir dövrdə verilib.

Teqlər

uşaq təhlükəsizliyi sosial media Facebook Meta Instagram