Ukrayna dronunun Bolqarıstana qəsdən yönəldildiyi təsdiqlənməyib

Bolqarıstan Silahlı Qüvvələrinin Baş Qərargah rəisi Emil Eftimov bildirib ki, ölkənin hava məkanına daxil olan dronun Bolqarıstanı qəsdən hədəf aldığına dair sübut yoxdur.

Onun sözlərinə görə, pilotsuz uçuş aparatı Rumıniyadan Bolqarıstana daxil olduqdan sonra elektron müharibə vasitələrinin təsiri ilə istiqamətini dəyişmiş ola bilər. Dron avqustun 8-də Trans-Balkan qaz kəmərinin yaxınlığındakı günəbaxan tarlasında partlayıb.

İlkin təhlillər onun Ukrayna qüvvələrinin geniş istifadə etdiyi “Maya” tipli aldadıcı dron olduğunu göstərir.

Baş nazir Rumen Radev bildirib ki, PUA yerli vaxtla saat 08:10-da Bolqarıstanın hava məkanına daxil olub. Partlayış yeri Trans-Balkan qaz kəmərinin Bolqarıstandakı kompressor stansiyasından təxminən 1000 metr, Rumıniyadakı stansiyadan isə 200 metr məsafədə yerləşir.

Partlayış nəticəsində ölən və ya yaralanan olmayıb.

Radev bildirib ki, hadisədən sonra strateji obyektlərin mühafizəsi və Bolqarıstan-Rumıniya sərhədi boyunca müşahidə gücləndiriləcək. Bolqarıstan, həmçinin dronların aşkarlanması imkanlarını və pilotsuz uçuş aparatlarına qarşı müdafiə sistemlərini gücləndirməyi planlaşdırır.

Ukrayna Xarici İşlər Nazirliyinin sözçüsü Georgi Tixiy bildirib ki, Ukrayna Silahlı Qüvvələri heç bir vasitəni qəsdən Bolqarıstan istiqamətinə yönəltməyib.

Hadisə ilə əlaqədar Ukraynanın səfiri danışıqlar üçün Bolqarıstan Xarici İşlər Nazirliyinə çağırılıb.

Hadisə Rusiyanın Ukraynaya qarşı genişmiqyaslı müharibəsinin başlanmasından sonra Şərqi Avropada, o cümlədən Şimali Atlantika Müqaviləsi Təşkilatına (NATO) üzv ölkələrdə dronlarla bağlı insidentlərin artdığı bir dövrə təsadüf edir.

Kopyalandı