Almaniya Kansleri Fridrix Mertsin reytinqi 13 faizə düşüb

Almaniya Kansleri Fridrix Merts reytinqinin düşməsi və ifrat sağçı "Almaniya üçün Alternativ" (AfD) partiyasının mövqeyinin güclənməsi fonunda artan təzyiqlərlə üzləşib.

Almaniyanın ARD ictimai teleradio kanalının keçirdiyi rəy sorğusu göstərir ki, ölkə əhalisinin cəmi 13 faizi Kansler Mertsin fəaliyyətindən razıdır. Bu göstərici sorğunun keçirildiyi təxminən 30 illik dövrdə vəzifədə olan kansler üçün qeydə alınmış ən aşağı reytinq hesab olunur.

Almaniya iqtisadiyyatının vəziyyəti, eləcə də planlaşdırılan pensiya və səhiyyə islahatları ilə bağlı narazılıq hökumətə təzyiqi artırır.

“Anadolu” Agentliyinin istinad etdiyi məlumatlara əsasən, AfD ölkə üzrə dəstək göstəricisinə görə Xristian Demokrat İttifaqını (CDU) geridə qoyub. AfD-yə dəstək 28 faiz, Mertsin partiyasına isə 21 faiz təşkil edir.

CDU daxilində təzyiq

Merts hökumətdəki kadr dəyişikliklərindən sonra öz partiyası daxilində də tənqidlərlə üzləşib.

Almaniyanın “Der Spiegel” jurnalı kanslerə yaxın bəzi şəxslərin və CDU rəhbərliyinin bir sıra üzvlərinin onun siyasi gələcəyini sual altına aldığını yazıb.

Adının açıqlanmasını istəməyən yüksəkvəzifəli CDU rəsmisi jurnala bildirib ki, Merts əyalət seçkilərindən sonra, sentyabrın 21-dək vəzifədən getməyə məcbur qala bilər.

Mertsi kim əvəz edə bilər?

Mümkün namizədlərdən biri Şimali Reyn-Vestfaliya federal torpağının baş naziri, CDU üzvü Hendrik Vüstdür.

Vüst Mertsi əvəz edə biləcəyi ilə bağlı ehtimalları rədd edib. O bildirib ki, kansler vəzifəsi hazırda onun üçün gündəmdə deyil. Bununla belə, Vüst gələcəkdə bu vəzifəyə namizəd ola biləcəyini istisna etməyib.

Almaniyanın parlament sisteminə görə, Merts istefa verərsə və ya Bundestaqda konstruktiv etimadsızlıq səsverməsi nəticəsində vəzifəsini itirərsə, onun yerinə yeni kansler seçilə bilər.

Teqlər

Almaniya kansleri Fridrik Merts Almaniya üçün Alternativ AfD Xristian Demokrat İttifaqı CDU Hendrik Vüst bundestaq