Pinkin UNICEF səfiri rolundan uzaqlaşdırılması üçün petisiya başladılıb

Müğənni Pinkin UNICEF səfiri rolundan uzaqlaşdırılması tələbi ilə onlayn petisiya başladılıb. Buna onun Ed Şiranın ABŞ turnesi zamanı Maklmorun fələstinlilərə dəstək çıxışını tənqid etməsi səbəb olub.

“Change.org” platformasında yayımlanan petisiyada Pinkin açıqlamalarının UNICEF-in humanitar prinsiplərinə və bütün uşaqları qorumaq öhdəliyinə zidd olduğu bildirilir.

Pink Maklmorun Nyu-Cersidəki “MetLife” stadionunda çıxışını tənqid edib. Reper həmin çıxışında fələstinlilərə dəstəyini ifadə edib və Qəzzadan görüntülərin nümayişi fonunda “Hind’s Hall” mahnısını ifa edib.

Pink sonradan açıqlamasına aydınlıq gətirərək mesajının bütün insanlar üçün sülh və insan ləyaqətinin müdafiəsinə yönəldiyini bildirib. O, uşaqlara qarşı zorakılığı da pisləyib.

Maklmor Ed Şiranın turnesindən kənarlaşdırılıb

Maklmor Ed Şiranın “Loop Tour” turnesi çərçivəsində ABŞ-də keçirilməsi nəzərdə tutulan qalan səkkiz konsertin proqramından çıxarılıb. Turnenin təşkilatçısı “Messina Touring Group”un məlumatına görə, bir neçə konsert məkanı reperin iştirakı ilə tədbir keçirməyə etiraz edib.

Maklmor antisemitizm ittihamlarını rədd edərək Fələstin xalqının hüquqlarını müdafiə etdiyini və İsrail hökumətinin siyasətini tənqid etdiyini bildirib.

Şiran bildirib ki, Maklmorun turnedən çıxarılması qərarını o deyil, turnenin təşkilatçısı verib. Turnenin digər ifaçıları Aaron Rowe, Finneas və “Lukas Graham”, eləcə də Şiranın “Beoga” qrupu  sonradan Maklmorla həmrəylik nümayiş etdirərək turneni tərk ediblər.

Petisiyada UNICEF-dən Pinkin təşkilatdakı roluna yenidən baxılması istənilir. UNICEF müğənni ilə bağlı hər hansı tədbir gördüyünü açıqlamayıb.

Kopyalandı