Rusiya-Ukrayna müharibəsi: İsveç və Finlandiya Rusiya təyyarələrinə görə qırıcıları havaya qaldırıb

Aİ Ukraynaya 7,52 milyard dollarlıq hərbi dəstəyin şərtlərini razılaşdırıb

Avropa İttifaqına üzv ölkələr Ukrayna üçün Avropa Sülh Fondundan təxminən 7,52 milyard dollar (6,6 milyard avro) vəsaitin ayrılması şərtləri barədə razılığa gəliblər. Bu barədə Aİ-nin xarici siyasət üzrə ali nümayəndəsi Kaya Kallas bildirib.

Kallasın sözlərinə görə, təxminən 1,03 milyard dollar (900 milyon avro) Aİ-nin Ukraynaya hərbi yardım missiyasına, 1,14 milyard dollar (1 milyard avro) isə hərbi texnikanın birgə satın alınmasının maliyyələşdirilməsinə yönəldiləcək.

Polşa XİN rəhbəri Rusiyanın mümkün böyük əməliyyatı barədə xəbərdarlıq edib

Polşanın xarici işlər naziri Radoslav Sikorski bildirib ki, Varşava Rusiyanın bu il genişmiqyaslı əməliyyata hazırlaşa biləcəyinə dair məlumatlar əldə edib. O, mümkün addımın mahiyyətinin hələlik aydın olmadığını vurğulayıb.

Nyu-Yorkda Xarici Əlaqələr Şurasında çıxış edən Sikorski deyib ki, Moskva əlavə səfərbərlik üçün bəhanə yaratmaq məqsədilə saxta bayraq əməliyyatı təşkil edə bilər.

O, NATO-nun Baltikyanı üzvləri ilə bağlı mümkün eskalasiya riskinə də diqqət çəkib. Sikorskinin fikrincə, Moskva alyansın kollektiv müdafiəni nəzərdə tutan 5-ci maddəsinin işə salınmasını çətinləşdirəcək addımlar ata bilər.

Polşanın xarici işlər naziri Radoslav Sikorski Almaniyanın Veymar şəhərində mətbuat konfransında iştirak edir. 3 sentyabr 2026-cı il.

Reuters

Zelenski: “Ukraynaya dron və raketlər üçün əlavə maliyyə lazımdır”

Ukrayna Prezidenti Volodimir Zelenski bildirib ki, ölkənin hərbi maliyyələşdirməsində yaranmış 27 milyard dollarlıq kəsir təcili şəkildə aradan qaldırılmalıdır. Əks halda, gələn ilin əvvəlindən Ukraynanın dron və raket ehtiyatları azalmağa başlaya bilər.

“Bu vəsaitin təxminən üçdə biri, bəlkə də bir qədər çoxu yanvar, fevral və mart aylarında dronlar üçün lazımdır. Əgər onları oktyabr və noyabr aylarında sifariş edib ödəniş etməsək, yanvar və fevralda ciddi problemlərlə üzləşəcəyik”, – Zelenski WhatsApp vasitəsilə keçirilən brifinqdə jurnalistlərə deyib.

O, Avropa Komissiyasını bu silahların alınmasını maliyyələşdirmək üçün 90 milyard avroluq, yəni 102 milyard dollarlıq kreditin ikinci tranşının ayrılmasını sürətləndirməyə çağırıb.

Kreml: Rusiya, Ukrayna və ABŞ arasında üçtərəfli görüş tezliklə baş tuta bilər

Kreml bildirib ki, Ukraynada dörd il yarımdır davam edən müharibənin başa çatdırılması istiqamətində səyləri müzakirə etmək üçün ABŞ, Rusiya və Ukrayna arasında üçtərəfli görüş yaxın vaxtlarda keçirilə bilər.

Ukrayna Prezidenti Volodimir Zelenski bildirib ki, görüş texniki səviyyədə keçiriləcək və Birləşmiş Ərəb Əmirliklərində baş tuta bilər.

Kremlin sözçüsü Dmitri Peskov mümkün görüşlə bağlı hələlik əlavə təfərrüat olmadığını deyib. O həmçinin bildirib ki, Rusiya Prezidentinin xüsusi nümayəndəsi Kirill Dmitriyev ABŞ-dədir və amerikalı danışıqlar aparan şəxslərlə görüşərək mümkün iqtisadi əməkdaşlıq məsələlərini müzakirə edir.

Danışıqlardan məlumatlı mənbə “Reuters”ə bildirib ki, Dmitriyev sentyabrın 24-də ABŞ nümayəndələri Stiv Uitkoff və Cared Kuşnerlə görüşüb.

Zelenski: “Ukrayna Ulyanovskda Rusiyanın müdafiə müəssisəsini vurub”

Ukrayna Prezidenti Volodimir Zelenski bildirib ki, ölkəsi Rusiyanın Ulyanovsk şəhərində yerləşən müdafiə sənayesi müəssisəsinə zərbə endirib.

Zelenskinin sözlərinə görə, Ukrayna “İskra” zavodu ilə yanaşı, Rostov vilayətindəki radiolokasiya stansiyalarını da vurub.

Rusiya zərbələri Ukraynanın ən böyük polad zavodunun fəaliyyətini dayandırıb

Polad istehsalçısı “ArcelorMittal” cümə günü bildirib ki, ardıcıl raket zərbələrindən sonra Ukraynanın ən böyük polad zavodunda istehsalı bərpa edə bilmir. Bu, Rusiyanın intensivləşən hava hücumlarının Ukrayna iqtisadiyyatına vurduğu növbəti zərbədir.

Lüksemburqda yerləşən şirkət Ukrayna hökumətinə bildirib ki, beş həftə ərzində zavoda endirilən dörd zərbə genişmiqyaslı dağıntılara səbəb olub və beş işçi həlak olub. Şirkətin sözlərinə görə, bundan sonra zavodda “təhlükəsiz və dayanıqlı” fəaliyyət mümkün deyil.

Zavodun fəaliyyətinin dayanması Ukraynanın polad sənayesi üçün növbəti ciddi zərbədir. Ölkə ixracının 15 faizini təşkil edən bu sektor həm Rusiya hücumlarının, həm də Ukraynanın əsas ticarət tərəfdaşı olan Avropa İttifaqının məhdudiyyətlərinin təzyiqi altındadır.

“ArcelorMittal Kryvyi Rih”in baş direktoru Mauro Longobardo açıqlamasında deyib: “Böyük təəssüf hissi ilə belə nəticəyə gəldik ki, artıq ‘ArcelorMittal Kryvyi Rih’də təhlükəsiz şəkildə fəaliyyət göstərə bilmirik”.

Britaniya Ukraynanın döyüş dronları məlumatlarına çıxış əldə edəcək

Böyük Britaniya iki ölkə arasında yeni süni intellekt tərəfdaşlığı çərçivəsində Ukraynanın dronlar və digər pilotsuz sistemlər vasitəsilə topladığı altı milyondan çox aşkarlama məlumatını ehtiva edən döyüş meydanı məlumat bazasına çıxış əldə edəcək.

Məlumat bazasına tanklar, artilleriya qurğuları, hava hücumundan müdafiə sistemləri, piyadalar və hava hədəflərinin görüntüləri daxildir. Bu məlumatlar 12-dək Britaniya şirkətinə təqdim olunacaq. Şirkətlərdən həm Ukraynanın, həm də Böyük Britaniyanın müdafiə ehtiyaclarında istifadə oluna biləcək texnologiyalar hazırlamaq tələb ediləcək.

Proqram hədəfləri tanıya bilən və dron qruplarının vahid idarəetmə məntəqəsindən asılı olmadan marşrutlarını, prioritetlərini və fəaliyyətlərini əlaqələndirməsinə imkan verən süni intellekt sistemlərinə yönələcək. Böyük Britaniya hökuməti bildirib ki, belə əməliyyatlarda insan nəzarəti saxlanılacaq.

Müdafiə naziri Ues Stritinq bildirib ki, real döyüş meydanı məlumatlarına çıxış Britaniya şirkətlərinə yeni müdafiə texnologiyaları hazırlamağa kömək edəcək, eyni zamanda Böyük Britaniya və Ukraynanın təhlükəsizliyini gücləndirəcək.

Ukrayna dronları Rusiyada neft emalı zavodunu və qatarı vurub

Rostov vilayətində təxminən 50 dron məhv edilib, Novoşaxtinsk neft emalı zavodu isə zədələnib. Qubernator Yuri Slyusar bildirib ki, zavod fəaliyyətini müvəqqəti dayandırıb.

Ulyanovsk vilayətində səkkiz nəfər yaralanıb, sənaye və mülki infrastruktura ziyan dəyib. Voronej vilayətində isə dörd nəfər yaralanıb, yaşayış binaları, nəqliyyat vasitələri və sənaye obyektləri zədələnib. Qubernator Aleksandr Qusevin sözlərinə görə, vilayətdə 88 dron məhv edilib.

Samara vilayətində Moskvadan Tolyattiyə gedən sərnişin qatarı da zədələnib. Rusiyanın dövlət dəmir yolu operatorunun “xarici müdaxilə” adlandırdığı hadisə nəticəsində elektrovoz və qatarın birinci vaqonu zədələnib. Maşinist yaralanıb, həmin xətt üzrə qatarların hərəkəti dayandırılıb.

ABŞ Rusiya və Ukrayna ilə BƏƏ-də üçtərəfli görüş təklif edib

Ukrayna Prezidenti Volodimir Zelenski bildirib ki, ABŞ dörd il yarımdır davam edən müharibənin başa çatdırılması istiqamətində səyləri müzakirə etmək üçün Rusiya və Ukraynanın iştirakı ilə Birləşmiş Ərəb Əmirliklərində üçtərəfli görüş keçirməyi təklif edib.

“Tarixlə bağlı ABŞ-dən təklif gözləyirik. ABŞ mümkün görüş yeri kimi Əmirlikləri təklif edib”, – Zelenski jurnalistlərə bildirib.

İsveç və Finlandiya qırıcıları Finlandiya körfəzi üzərində Rusiya təyyarələrinə yaxınlaşıb

Finlandiya Hərbi Hava Qüvvələrinin sentyabrın 25-də yaydığı məlumata görə, Finlandiya körfəzi üzərində Rusiya hərbi təyyarələri aşkar edildikdən sonra Finlandiya və İsveç qırıcı təyyarələrini havaya qaldırıb.

İsveç və Finlandiya qırıcıları beynəlxalq hava məkanında Rusiya təyyarələrinə yaxınlaşaraq onları müəyyənləşdiriblər. Onların arasında bir nəqliyyat və bir neçə qırıcı təyyarə olub.

Finlandiya Hərbi Hava Qüvvələrinin məlumatına görə, əməliyyat iki ölkənin öz hava məkanına birgə nəzarət və onların mühafizəsi çərçivəsində həyata keçirilib.

Rusiyanın “Su-30” qırıcı təyyarələri Finlandiya körfəzi üzərində beynəlxalq hava məkanında uçur. 24 sentyabr 2026-cı il.

Reuters