Nepalda güclü daşqın: Sakinlər təxliyəyə çağırılıb

Nepal hakimiyyəti oktyabrın 11-də ölkənin mərkəzi hissəsində baş verən daşqından sonra sakinləri təhlükəsiz ərazilərə köçməyə çağırıb. Sel suları bir neçə evi və infrastruktur obyektini aparıb. İlkin məlumatlara görə, ölən və yaralanan yoxdur.

Rəsmilərin məlumatına görə, paytaxt Katmandudan təxminən 100 kilometr qərbdə yerləşən Qorxa rayonunun Çumnubri kəndində torpaq sürüşməsi Budhi-Qandaki çayının məcrasını bağlayıb. Nəticədə çayın aşağı axarında daşqın baş verib.

Budhi-Qandaki Trişuli çayının qollarından biridir. Avqustda həmin çay hövzəsində buzlağın qopması nəticəsində də güclü daşqın baş vermişdi.

Rəsmilərin sözlərinə görə, sel suları təxminən 12 evi və iki asma körpünü aparıb. Su elektrik stansiyasının tikinti düşərgəsinə də ziyan dəyib.

“Çayda palçıqlı sel sularının səviyyəsi yüksəlir. Daşqın Qorxa rayonunu qonşu Dhadinq rayonu ilə birləşdirən avtomobil körpüsünü də aparıb”, – Nepalın Fəlakət Risklərinin Azaldılması və İdarə Edilməsi üzrə Milli Qurumunun rəhbəri Dharam Rac Upreti bildirib.

Sakinlər təhlükəsiz ərazilərə köçməyə çağırılıb

Nepalın fövqəladə hallar qurumları Qorxa, Tanahun, Çitvan, Şərqi Navalparasi və Qərbi Navalparasi rayonlarında çay sahillərində yaşayan sakinlərə daşqın təhlükəsi ilə bağlı xəbərdarlıq ediblər.

Xilasetmə işləri davam edir

Nepalın Baş naziri Balendra Şah sosial şəbəkədə bildirib ki, hərbçilər Caqat yaşayış məntəqəsində torpaq sürüşməsi təhlükəsi ilə üzləşən altı nəfəri xilas ediblər.

Təbii Fəlakət Risklərinin Azaldılması və İdarə Edilməsi üzrə Milli Qurumun rəhbəri Dharam Rac Upretinin sözlərinə görə, daşqının ziyan vurduğu su elektrik stansiyasının tikinti düşərgəsində çalışan daha 18 işçi təhlükəsiz yerə çıxıb.

Rəsmilərin məlumatına görə, hərbi və polis xilasediciləri hadisə yerinə çatıblar. Əraziyə helikopterlə də nəzarət edilir.

• Hindistan və Nepalda daşqın və torpaq sürüşmələri nəticəsində 19 nəfər ölüb

Teqlər

Nepal Nepal hakimiyyəti daşqın təxliyə infrastruktur obyekt sel suları təhlükəsiz ərazilər