2026 Venesiya Film Festivalı müstəqil kinoya üstünlük verir

2026-cı il Venesiya Film Festivalının proqramı açıqlanıb. Budəfəki seçimlərdə son illərlə müqayisədə böyük Hollivud studiyalarının filmləri azalıb, müstəqil və müəllif kinosuna daha çox yer ayrılıb.

Buna baxmayaraq, təşkilatçılar festivalın 2-12 sentyabr tarixlərində keçiriləcək növbəti buraxılışında çoxsaylı məşhur simaların iştirak edəcəyini gözləyir.

Ulduzlarla zəngin proqram

Corc Kluni, Robert Pattinson, Con Malkoviç, Penelopa Kruz, Runi Mara və Xavyer Bardemin festivalda iştirakı gözlənilir. Liam və Noel Qallaqerlər isə “Oasis” qrupu haqqında sənədli filmin premyerasını təqdim edəcəklər.

Əsas müsabiqədə Martin Makdonax, Denni Boyl, Florian Zeller, Verner Hersoq və Hirokazu Kore-edanın yeni filmləri “Qızıl Şir” mükafatı uğrunda mübarizə aparacaq.

Festival Denni Boylun rejissoru olduğu və Qay Pirsin media maqnatı Rupert Merdok obrazını canlandırdığı “Ink” filmi ilə açılacaq. Martin Makdonax da “Wild Horse Nine” filmi ilə Venesiyaya qayıdır.

Rekord sayda müraciət

Festivalın direktoru Alberto Barbera bildirib ki, təşkilatçılar rekord sayda — 4 500 film müraciətinə baxıblar. O, Hollivudun iştirakının azalmasına baxmayaraq, qlobal kino sənayesinin güclü olaraq qaldığını vurğulayıb.

Böyük studiyalar və yayım platformaları büdcə məhdudiyyətləri, istehsal proseslərinin yavaşlaması və tənqidçilərin reaksiyası ilə bağlı narahatlıqlar səbəbindən Avropanın aparıcı film festivallarında iştiraklarını azaldıblar.

Sənədli filmlər və süni intellekt

Əsas müsabiqədən kənarda festival “Don't Look Back in Anger” sənədli filminin dünya premyerasına ev sahibliyi edəcək. Film Qallaq qardaşlarının münasibətini və “Oasis” qrupunun 2025-ci ildəki yenidən birləşmə turunu araşdırır.

Digər sənədli filmlər arasında rejissor Aleks Gibninin İlon Mask haqqında hazırladığı təxminən 4 saatlıq film, Rassel Krounun “What Love Builds” musiqi sənədli filmi və “Diesel” brendinin qurucusu Renzo Rosso haqqında “Be Brave” filmi yer alır. Sonuncu film demək olar ki, tamamilə süni intellektdən istifadə edilərək hazırlanıb.

“Qızıl Şir” uğrunda mübarizə aparan 20 film arasında yalnız biri qadın rejissor tərəfindən çəkilib. Danimarkalı rejissor May El-Tuxinin “Woman Unknown” dramı əsas müsabiqədə qadın rejissorun təqdim etdiyi yeganə filmdir.

Festivalın münsiflər heyətinə Meggi Gyllenhaal rəhbərlik edəcək. Corc Kluni və Ellen Börstin isə ömürboyu nailiyyətlərinə görə “Qızıl Şir” fəxri mükafatına layiq görüləcəklər.

Teqlər

2026 Venesiya Film Festivalı film festival kino Hollivud İlon Mask Alberto Barbera