Moskva İrəvana xəbərdarlıq etdi: Dəmir yolu sazişi dəyişərsə, təzminat tələb olunacaq

İrəvan Cənubi Qafqaz Dəmir Yolu (CQDY) sazişinin şərtlərini qarşılıqlı razılıq olmadan dəyişəcəyi təqdirdə, Rusiya Ermənistandan təzminat tələb edə bilər. Bu barədə Rusiyanın İqtisadi İnkişaf naziri Maksim Reşetnikov bəyan edib.

Nazir bildirib ki, Ermənistanın saziş üzrə öhdəliklərinə birtərəfli qaydada yenidən baxacağı təqdirdə, Moskva dəymiş ziyanın əvəzini tələb etmək hüququna malikdir. Reşetnikov vurğulayıb ki, dəmir yolu operatoru Rusiya şirkətinin sərbəst aktivi deyil, Rusiya investisiyaları və müqavilə öhdəlikləri hesabına inkişaf etdirilmiş bir müəssisədir.

Rusiyalı naziri Ermənistanın dəmir yolu şəbəkəsindən istifadəyə görə icarə haqqı tətbiq etmək ehtimalını rədd edərək, bu cür tələbləri əsassız adlandırıb. "Rusiyanın Ermənistana əlavə ödənişlər etməli olduğu məsələsini qaldırmaq tamamilə əsassızdır", – deyə Reşetnikov qeyd edib.

O əlavə edib ki, saziş birtərəfli qaydada dəyişdirilərsə və investor zərər çəkərsə, Rusiyanın kompensasiya tələb etmək üçün hüquqi əsasları olacaq.

"Rusiya Dəmir Yolları" konsessiya sazişinə əməl etmək niyyətindədir

Daha əvvəl "Rusiya Dəmir Yolları" ASC-nin baş icraçı direktoru Oleq Belozyorov şirkətin mövcud konsessiya sazişi çərçivəsində fəaliyyətini dəqiq şəkildə davam etdirmək niyyətində olduğunu bildirmişdi:

"Biz sazişə ciddi şəkildə riayət etmək niyyətindəyik. Əgər Ermənistan tərəfi müqaviləyə xitam verməyi və ya onun şərtlərini dəyişməyi nəzərdən keçirirsə, bizim qoyulmuş investisiyaların geri qaytarılmasını tələb etmək hüququmuz var."

Qeyd edək ki, Rusiyanın bu xəbərdarlıqları Ermənistanın Baş naziri Nikol Paşinyanın Moskva ilə münasibətlərdə alternativlər axtarılması barədə bəyanatlarından sonra səsləndirilib.

Teqlər

Rusiya Ermənistan dəmir yolu təzminat CQDY investisiya