canlı Husilər Qırmızı dənizdən keçən gəmilərdən ödəniş tutulacağına dair xəbərləri təkzib ediblər

İranın qərbindəki Kermanşah vilayətində partlayış səsi eşidilib

Avqustun 1-də İranın qərbində yerləşən Kermanşah vilayətində partlayış səsi eşidilib.

İranın “Fars” xəbər agentliyinin məlumatına görə, hadisə İslamabad-e Qərb şəhəri yaxınlığında baş verib.

Partlayışın dəqiq yeri və səbəbi barədə hələlik məlumat verilməyib.

Ərbildə yanğın neft emalı zavodunun fəaliyyətini dayandırıb

İraqın Ərbil şəhərində yerləşən neft emalı zavodunun yanacaq anbarında yanğın baş verib.

Yanğın şəhərin cənub-qərbindəki Şamamik bölgəsində yerləşən Şamak zavodunda qeydə alınıb.Təhlükəsizlik xidmətlərindəki və zavoddakı mənbələrin avqustun 1-də verdiyi məlumata görə, yanğın müəssisənin fəaliyyətini dayandırıb.

Mənbələr yanğınsöndürənlərin alovu nəzarət altına almağa çalışdıqlarını bildiriblər.

ABŞ-nin İordaniyadakı səfirliyi vətəndaşlarını ehtiyatlı olmağa çağırıb

ABŞ-nin İordaniyadakı səfirliyi vətəndaşlarına xəbərdarlıq edib. Səfirlik Yaxın Şərqdən kənarda olan ABŞ vətəndaşlarına regiona və ya region üzərindən səfər planlarını ciddi şəkildə yenidən nəzərdən keçirməyi tövsiyə edib.

“Hazırda Yaxın Şərqdə olan ABŞ vətəndaşları ehtiyatlı olmalı, diqqətli davranmalı, uçuşların ləğvinə, hava məkanının vaxtaşırı bağlanmasına və mümkün səyahət çətinliklərinə hazırlaşmalıdırlar”, – deyə səfirliyin “X” platformasında yayımladığı təhlükəsizlik xəbərdarlığında bildirilib.

Küveyt ordusu düşmən PUA-larını məhv etdiyini bildirib

Küveyt ordusu avqustun 1-də səhər saatlarından etibarən ölkənin hava məkanında düşmən PUA-larının aşkar edildiyini və məhv olunduğunu bildirib. Ordu İran hücumu kimi xarakterizə etdiyi hadisə zamanı bir neçə mühüm obyektin hədəfə alındığını açıqlayıb.

Məlumata görə, Küveytin şimalındakı dövlət obyektinə və Bubiyan adasında bir şirkətə məxsus mülki əmlaka zərbə dəyib. Yerə düşən qəlpələr maddi ziyana səbəb olsa da, ölən və yaralanan olmayıb.

Aİ: İtaliya freqatı gəmini Qırmızı dənizdən təhlükəsiz keçirib

Ticarət gəmisi İtaliyanın “Bergamini” freqatının mühafizəsi altında Qırmızı dənizdən təhlükəsiz keçib. Bu barədə Avropa İttifaqının (Aİ) “ASPIDES” dəniz missiyası avqustun 1-də məlumat verib.

Aİ-nin Qırmızı dənizdə fəaliyyət göstərən müdafiə xarakterli “ASPIDES” missiyası gəminin adını açıqlamayıb. Missiya, həmçinin gəminin hansı ölkənin bayrağı altında üzdüyü, kimə məxsus olduğu və daşıdığı yük barədə məlumat verməyib.

İranın dəstəklədiyi Yəmən husiləri Səudiyyə Ərəbistanına qarşı dəniz blokadası elan edib. Daha sonra onlar Səudiyyə gəmilərinə hücum ediblər. Bu hadisələr son həftələrdə Qırmızı dənizdə gəmiçiliyi yenidən çətinləşdirib.

Misirin Dəmyat limanından görüntü, 28 iyul 2026.

Reuters

UKMTO Oman sahilləri yaxınlığında partlayış qeydə alındığını bildirib

Omanın Xasab şəhərindən 39 kilometr şimal-şərqdə hərəkət edən tankerin yaxınlığında hadisə baş verib. Bu barədə Böyük Britaniyanın Dəniz Ticarəti Əməliyyatları Mərkəzi (UKMTO) məlumat yayıb.

Məlumata görə, tankerin kapitanı gəminin yaxınlığında suyun güclü sıçradığını və partlayış baş verdiyini görüb.

UKMTO hadisə nəticəsində tankerin zədələnmədiyini bildirib.

İran və Oman Hörmüz boğazında gəmiçiliyin idarə olunması planı üzərində işləyir

Rəsmi Tehran Hörmüz boğazında gəmiçiliyin idarə olunması üçün praktiki mexanizmlərin yaradılması istiqamətində Omanla birgə çalışır. Bu barədə İranın dövlət yayımçısı IRIB ölkənin xarici işlər naziri Abbas Əraqçiyə istinadən məlumat yayıb.

Məlumata görə, Əraqçi Omanla birlikdə bu strateji su yolunda dəniz hərəkətinin idarə olunması üçün praktiki mexanizmlər hazırlamağa qərarlı olduqlarını bildirib.

O xəbərdarlıq edib ki, üçüncü tərəflərin bu prosesə müdaxiləsi “mövcud vəziyyəti yalnız daha da mürəkkəbləşdirəcək”.

Türkiyə və Səudiyyə Ərəbistanı XİN başçıları regiondakı son vəziyyəti müzakirə ediblər

Türkiyənin xarici işlər naziri Hakan Fidan Səudiyyə Ərəbistanından olan həmkarı şahzadə Feysəl bin Fərhanla telefon danışığı zamanı regiondakı son vəziyyəti müzakirə edib. Bu barədə Türkiyənin diplomatik mənbələri məlumat verib.

Mənbələrin bildirdiyinə görə, Fidan və şahzadə Feysəl regiondakı münaqişələrə son qoyulması istiqamətində göstərilən səyləri də müzakirə ediblər.

Beş aydır davam edən İran müharibəsi Yaxın Şərqin digər ölkələrinə də yayılıb.

Husilər: Səkkiz Səudiyyə neft tankeri Ümid burnu marşrutuna yönəldilib

Yəmənin bir hissəsinə nəzarət edən husilər Səudiyyə Ərəbistanına məxsus səkkiz neft tankerinin Bab əl-Məndəb boğazından keçməsinə imkan verməyiblər.

Bunun əvəzində tankerlər Ümid burnu marşrutuna yönəlmək məcburiyyətində qalıb.

Husilərin hərbi sözçüsü Yəhya Səri "X" platformasında bildirib ki, marşrutun dəyişdirilməsi qruplaşmanın Səudiyyə Ərəbistanına məxsus gəmilərə tətbiq etdiyi blokadanın bir hissəsidir.

Husilər gəmilərdən ödəniş tutulacağına dair iddiaları rədd ediblər

Yəmənin bir hissəsinə nəzarət edən husilər Bab əl-Məndəb boğazından keçən kommersiya gəmilərindən ödəniş tutulacağına dair xəbərləri təkzib edib. Bu barədə hərəkatın nəzarətində olan dənizçilik üzrə koordinasiya qurumu avqustun 1-də açıqlama yayıb.

Açıqlama "Reuters"in çərşənbə günü yaydığı xəbərin ardınca verilib. Həmin xəbərdə İranın dəstəklədiyi husilərin Qırmızı dənizin cənubundan keçən kommersiya gəmilərindən ödəniş almağı nəzərdən keçirdiyi bildirilirdi.

Oman sahilləri yaxınlığında tanker naməlum mərmi ilə vurulub

Omanın Lima yaşayış məntəqəsindən azı 20 km şimal-şərqdə hərəkət edən tanker naməlum mərmi ilə vurulub. Bu barədə avqustun 1-də Böyük Britaniyanın Dəniz Ticarəti Əməliyyatları Mərkəzi məlumat yayıb.

Belə ki, mühərrik bölməsinin zədələnməsindən sonra gəmi idarəetməni itirib.

UKMTO-nun məlumatına görə hadisə nəticəsində ölən və ya xəsarət alan olmayıb, həmçinin ətraf mühitə hər hansı təsir qeydə alınmayıb.

Lima Omanın Müsəndəm yarımadasında, Fars körfəzini Oman körfəzi ilə birləşdirən strateji dəniz marşrutu — Hörmüz boğazının girişində yerləşir.