canlı İran: Hörmüz boğazı ilə bağlı razılaşma çox yaxındır, lakin ABŞ kompensasiya ödəməlidir

HƏMAS Qəzza yol xəritəsinə sadiq qaldığını bildirib

HƏMAS-ın yüksək vəzifəli rəsmisi Basem Naim bildirib ki, qrup 10 gün əvvəl Qahirədə vasitəçilərlə razılaşdırılmış yol xəritəsinə sadiq qalır.

Naim vasitəçiləri və ABŞ-ni yol xəritəsinə əməl etməsi üçün İsrail Baş naziri Benyamin Netanyahunun hökumətinə təzyiq göstərməyə çağırıb. O, həmçinin yol xəritəsinin daxili siyasi və ya seçki səbəbləri ilə icrasına maneə yaradılmamasına çağırıb.

O bildirib ki, davam edən pozuntular regional təhlükəsizlik və sabitliyə əlavə təhdid yarada bilər.

Yəmən ordusu: Husilərin Mokha şəhərinə hücumu nəticəsində yeddi nəfər ölüb

Yəmən ordusunun sözçüsü bildirib ki, husilərin Yəmənin liman şəhəri Mokhaya hücumları nəticəsində yeddi nəfər ölüb.

Bundan əvvəl Yəmən mediası İranın dəstəklədiyi husi qrupunun Mokha limanı yaxınlığındakı yaşayış ərazilərini raket və dronlarla hədəf aldığını bildirib.

Husilərin hərbi sözçüsü Yəhya Sərii bildirib ki, qrup Mokha ərazisində Səudiyyə hərbi qüvvələrinin toplandığı məntəqələrə və silah anbarlarına hücum edib. Husilər bu hücumu “genişmiqyaslı və yüksək səviyyəli hərbi əməliyyat” adlandırıblar.

Mokha şəhəri beynəlxalq səviyyədə tanınan Yəmən hökumətinə sadiq qüvvələrin nəzarətindədir.
 

İran: Ali rəhbərin görüntüləri gələcəkdə yayımlanacaq

İranın ali rəhbəri Müctəba Xameneinin ictimaiyyət qarşısında çəkilmiş görüntüləri gələcəkdə yayımlanacaq. Bu barədə İslam İnqilabı Keşikçiləri Korpusuna (SEPAH) bağlı “Bəsic” təşkilatının rəhbər müavini bildirib.

Qasım Qureyşi bildirib ki, görüntülərdə Xamenei xalq arasında, küçələrdə və silahlı qüvvələrin komandanları ilə görüşlər zamanı görünəcək

Mart ayında atası Əli Xameneini ali rəhbər vəzifəsində əvəz edən Müctəba Xamenei həmin vaxtdan bəri ictimaiyyət qarşısında görünməyib.

İrandakı yüksək səviyyəli mənbələrin məlumatına görə, o, fevralın 28-də atasının öldürüldüyü hücum zamanı üz nahiyəsindən və bədəninin digər hissələrindən xəsarətlər alıb. Həmin tarix ABŞ və İsrailin İrana hava zərbələrinin ilk gününə təsadüf edib.

Əraqçi: “ABŞ iyun razılaşmasını pozduğu müddətdə birbaşa danışıqlar olmayacaq”

İranın xarici işlər naziri Abbas Əraqçi bildirib ki, rəsmi Vaşinqton iyun ayında imzalanmış müvəqqəti razılaşmanı pozduğu müddətdə İran ABŞ ilə birbaşa danışıqlara başlamayacaq.

“ABŞ İslamabad Anlaşma Memorandumunu pozmağa davam etdiyi və öhdəliklərinin pozulmasına görə kompensasiya ödəmədiyi müddətdə danışıqların bərpası mümkün olmayacaq. Hazırda vasitəçilər üzərindən mesaj mübadiləsi gedir, lakin bu prosesi danışıqlar adlandırmaq olmaz. Bəziləri hələ də danışıqların bərpası üçün şərait yaratmağa çalışırlar”, — Əraqçi bildirib.

O, İranla vasitəçi Oman arasında Hörmüz boğazından keçən gəmilər üçün yeni marşrutlarla bağlı razılaşmanın əldə edilməsinə yaxın olduqlarını bir daha deyib. Lakin Əraqçi vurğulayıb ki, təkcə bu razılaşma dəniz keçidinin yenidən açılması üçün kifayət etməyəcək.

“Bu danışıqların nəticəsində mövcud marşrutlar yeni marşrutlarla əvəz olunacaq. Hazırda mütəxəssislər xəritələr üzərində işləyirlər. Bu, Hörmüz boğazının yenidən açılması demək deyil. Bu razılaşma əldə oluna bilər, lakin Hörmüz boğazının açılması digər şərtlərin də yerinə yetirilməsindən asılıdır. Həmin şərtlər vasitəçilər üzərindən ABŞ tərəfinə çatdırılıb”, — İranın xarici işlər naziri bildirib.

İranın xarici işlər naziri Abbas Əraqçi İranın paytaxtı Tehranda keçirilən tədbirdə iştirak edir. 9 avqust, 2026-cı il.

Touraj Shiralilou

İran: ABŞ şərtləri qəbul edənədək Hörmüz boğazına nəzarət davam edəcək

İran İslam İnqilabı Keşikçiləri Korpusu (SEPAH) bildirib ki, rəsmi Tehran ABŞ bütün şərtləri qəbul edənədək Hörmüz boğazına nəzarəti davam etdirəcək. Qurumun sözçüsü, briqada generalı Hüseyn Möhübbi deyib ki, strateji su yolu artıq yalnız gəmiçilik marşrutu deyil, həm də qarşıdurma məkanına çevrilib.

Onun sözlərinə görə, İranın strategiyası tələbləri yerinə yetirilənədək boğazı nəzarətdə saxlamaqdır. Möhübbi bu fikirləri İran dövlət televiziyasına müsahibəsi zamanı səsləndirib.

İranın xarici işlər naziri Abbas Əraqçi də Hörmüz boğazının yenidən açılmasının bir sıra şərtlərdən asılı olduğunu bildirib. Onun sözlərinə görə, bu şərtlərdən biri kompensasiyanın ödənilməsidir. Rəsmi Tehran hesab edir ki, ABŞ İslamabad Anlaşma Memorandumunu pozub.

Yəmən hökuməti husi mövqelərinə zərbələr endirib

Yəmən hökumət qüvvələri ölkənin cənub-qərbində yerləşən Əd-Dali əyalətində husi mövqelərinə dron zərbələri endirdiklərini bildiriblər. Məlumata görə, hücumlar Bab Qalaq, Əl-Faxer və Maris cəbhələrindəki hərbi mövqeləri, kazarmaları və nəqliyyat vasitələrini hədəf alıb.

Zərbələr nəticəsində səngərlərin, tunellərin, qoşunların toplandığı məntəqələrin və hərbi texnikanın vurulduğu, ağır itkilərin verildiyi iddia edilib.   

Əməliyyat husilərin cəbhə xəttində qoşun hərəkətlərinə və əlavə qüvvələr yerləşdirməsinə cavab olaraq həyata keçirilib.

Husilər bu iddialara dərhal münasibət bildirməyiblər. Yəməndə hökumət qüvvələri ilə İranın dəstəklədiyi husilər arasında qarşıdurmada 2022-ci ilin aprelindən bəri nisbi sakitlik hökm sürsə də, vaxtaşırı toqquşmalar baş verir.

Husilər “Aramco”nun zavoduna hücum etdiklərini bildiriblər

Yəməndə İranın dəstəklədiyi husi silahlıları Səudiyyə Ərəbistanının cənub-qərbində, Cazan şəhərində yerləşən “Aramco” neft emalı zavoduna hücuma görə məsuliyyəti üzərlərinə götürüblər.

Bundan əvvəl Səudiyyə Ərəbistanının Energetika Nazirliyi “X” platformasında yaydığı açıqlamada avqustun 9-da zavodda baş verən yanğının söndürüldüyünü bildirmişdi.

“Reuters”in məlumatına görə, zavod iyulun 27-də husi silahlılarının müəssisəyə ziyan vurduğu başqa bir hücumdan sonra fəaliyyətini dayandırmaq məcburiyyətində qalmışdı.

ABŞ vitse-prezidenti İranın nüvə proqramının məhv edildiyini bildirib

ABŞ vitse-prezidenti Ceyms Devid Vens deyib ki, ölkəsi İranın nüvə proqramını məhv edib. Həmçinin İranın ənənəvi və asimmetrik hərbi imkanları əhəmiyyətli dərəcədə zəiflədilib.

Vens avqustun 8-də “Fox News”a açıqlamasında bildirib ki, rəsmi Vaşinqton Tehranla münasibətlərin yaxşılaşdırılması üçün İranın uzunmüddətli dəyişikliklərə hazırlığını qiymətləndirir. O əlavə edib ki, İran buna hazır olmasa, ABŞ təzyiq göstərməyə davam edəcək.

Qeyd edək ki, İranın Xarici İşlər naziri Abbas Əraqçi daha əvvəl bildirib ki, İran və Oman razılaşmaya “çox yaxındır”. Razılaşma Hörmüz boğazından keçən yeni gəmiçilik marşrutu ilə bağlıdır. Vensin açıqlaması Əraqçinin bu bəyanatından sonra verilib. İranın Xarici İşlər naziri həmçinin deyib ki, boğazın yenidən açılması digər şərtlərdən, o cümlədən ABŞ-nin İrana kompensasiya ödəməsindən asılı olacaq.

“Aramco” neft emalı zavodundakı yanğın söndürülüb

Avqustun 9-da Səudiyyə Ərəbistanının cənub-qərbində yerləşən “Aramco”nun Cazan neft emalı zavodunda baş verən yanğın söndürülüb. Bu barədə ölkənin Energetika Nazirliyi “X” platformasında məlumat verib. Qurum hadisə nəticəsində xəsarət alanların olmadığını bildirsə də, Qırmızı dəniz sahilində, Yəmən sərhədi yaxınlığında yerləşən zavodda yanğının səbəbini açıqlamayıb.

Cazan neft emalı zavodunda gündə 400 min barel xam neft emal olunur. Müəssisədə benzin və kükürd tərkibi çox aşağı olan dizel yanacağı da daxil olmaqla neft məhsulları istehsal edilir.

“Reuters” in məlumatına görə, Səudiyyə Ərəbistanının milli neft şirkəti “Aramco” iyulun 27-də Yəməndə İranın dəstəklədiyi husilərin hücumundan sonra zavodun fəaliyyətini dayandırıb. Hücum nəticəsində müəssisəyə ziyan dəyib.

İranın Xarici İşlər naziri: "Hörmüz marşrutu üzrə razılaşma çox yaxındır”

İranın Xarici İşlər naziri Abbas Əraqçi bildirib ki, İran və vasitəçi Oman Hörmüz boğazından keçən yeni gəmiçilik marşrutu ilə bağlı razılaşmanın əldə olunmasına “çox yaxındır”.

Lakin Əraqçi xəbərdarlıq edib ki, dəniz yolunun yenidən açılması digər şərtlərdən, o cümlədən ABŞ-nin İrana kompensasiya ödəməsindən asılı olacaq.

Bu arada İranın ali milli təhlükəsizlik qurumunun katibi, İslam İnqilabı Keşikçiləri Korpusunun (SEPAH) veteranı Məhəmməd Baqir Zülqədr digər tələbləri də açıqlayıb. Onun sözlərinə görə, bunlara ABŞ-nin İran və onun müttəfiqlərinə qarşı “təcavüz” xarakterli hərəkətləri dayandırması, sanksiyaların ləğvi və İranın aktivlərinin sərbəst buraxılması daxildir.

İran Prezidenti Məsud Pezeşkian isə hazırkı dövrün razılaşmanın əldə olunması üçün ən uyğun vaxt olduğunu deyib. 

“Ölkədə həmrəylik, güc və birlik var. Bildiyim qədərilə, İran bu müharibədə qalib və güclü tərəf hesab olunur”, – İran xəbər agentlikləri onun sözlərinə istinadən bildiriblər.