Cənubi Avropa meşə yanğınları təhlükəsinin artdığı bir vaxtda yeni isti hava dalğası ilə üz-üzədir

Cənubi Avropa ölkələri ötən ay yaşanan isti hava dalğasından sonra yenidən kəskin istilərlə üzləşməyə hazırlaşır. Çərşənbə günü Fransa, İtaliya, İspaniya və Portuqaliyada temperaturun kəskin yüksələcəyi gözlənilir. Bölgədə meşə yanğınlarının başvermə ehtimalı da böyükdür.

Fransada isti hava və meşə yanğınları riski yenidən artır

Fransanın milli meteorologiya xidməti yüksək temperaturla əlaqədar ölkənin 67 bölgəsində narıncı xəbərdarlıq elan edib. Bəzi ərazilərdə temperaturun 41 dərəcəyə çatacağı gözlənilir.

Məlumata görə, ölkənin 40 bölgəsində meşə yanğınları riski “yüksək”, daha beşində isə “çox yüksək” olaraq qiymətləndirilir.

Fransanın cənubunda meşə yanğınlarının yayıldığı ərazi genişlənir

Son günlər Fransa, əsasən, cənub bölgələrini bürüyən meşə yanğınları ilə mübarizə aparır. Şərqi Pireneylər bölgəsində yanğın 4 900 hektardan çox ərazini öz cənginə alıb.

Rəsmilər çərşənbə günü vəziyyətin yaxşılaşdığını bildirsələr də, yenidən alovlanma hallarının qarşısını almaq üçün ərazidə 800 yanğınsöndürən fəaliyyətini davam etdirir.

Daxili işlər naziri Loran Nüne çərşənbə axşamı meşə yanğınları ilə bağlı şübhəli bilinən altı nəfərin saxlanıldığını açıqlayıb. Nazir “X” sosial şəbəkə hesabında bildirib ki, Savoya bölgəsində yanğını söndürmək istəyən 22 yaşlı könüllü həlak olub.

Drom bölgəsindəki yanğın da 1 400 hektar ərazini külə çevirib.

Cənubi Avropada isti hava dalğası güclənir

İtaliyanın da yeni isti hava dalğasının təsiri altına düşəcəyi gözlənilir. Həftəsonu ölkədə temperaturun 40 dərəcəyə çatacağı bildirilir. Yerli KİV-nin məlumatına görə, bir neçə şəhər üçün narıncı xəbərdarlıq elan edilib.

İspaniyanın böyük hissəsində narıncı xəbərdarlıq qüvvədədir. İki bölgədə isə hətta qırmızı xəbərdarlıq elan edilib. Bəzi ərazilərdə temperaturun 45 dərəcəyə yaxınlaşacağı gözlənilir.

Qonşu Portuqaliyanın da bir çox bölgəsində narıncı xəbərdarlıq elan olunub. Hərarətin 40 dərəcəyə çatacağı gözlənilir.

Kopyalandı