Polşa Aİ-ni “Meta”ya qarşı sərt tədbirlər görməyə çağırıb

Polşa Avropa İttifaqını “Meta”ya qarşı tədbirləri sürətləndirməyə çağırıb. Buna səbəb yeni hesabatda texnologiya şirkətinin Polşada bir il ərzində dələduzluq xarakterli reklamlardan təxminən 199 milyon dollar (760 milyon zloti) gəlir əldə etmiş ola biləcəyinin göstərilməsidir.

Polşanın rəqəmsallaşma naziri Kşiştof Qavkovski hesabatın nəticələrinin heyrətamiz olduğunu deyib. O bildirib ki, “Facebook” və “Instagram”ın sahibi olan “Meta”ya qarşı davam edən araşdırmanın sürətləndirilməsini Avropa Komissiyasının vitse-prezidenti Henna Virkkunenlə müzakirə edəcək.

“ “Meta”ya qarşı mümkün qədər tez sərt cəzalar tətbiq edilməlidir. Cəzalar nə qədər ağır olsa, bir o qədər yaxşıdır. Heç bir güzəşt olmamalıdır!” - Qavkovski deyib.

Polşanın “Instrat” analitik mərkəzinin sentyabrın 16-da dərc etdiyi hesabata görə, dələduzluq xarakterli reklamlar ölkədə “Meta” platformalarındakı ümumi reklam əhatəsinin 10,85 faizini təşkil edib.

Hesabata görə, “Meta” 2026-cı ilin iyulunadək olan bir il ərzində belə reklamlardan təxminən 199 milyon dollar (760 milyon zloti) gəlir əldə etmiş ola bilər. Bu məbləğ “Facebook Poland”ın açıqladığı illik gəlirin təxminən 37 faizinə bərabərdir.

“Instrat”ın prezidenti Mixal Hetmanski “Meta”nı mütəşəkkil cinayətkar qrupların şirkətin platformalarından istifadə etməsinə şərait yaratmaqda ittiham edib. O, şirkətin Polşa bazarından yüksək gəlir əldə etməsinin dələduzluq reklamlarına qarşı effektiv mübarizəyə təsirini sorğulayıb. 

Hesabat Polşa hökumətinin “Meta”ya qarşı tədbirlərin gücləndirilməsini tələb etdiyi bir vaxtda açıqlanıb. Qavkovski avqustda Avropa Komissiyasını şirkətə 287 milyon dollar (250 milyon avro) cərimə tətbiq etməyə çağırıb. Nazir “Meta”nı barəsində məlumat verilən dələduzluq reklamlarının 80 faizindən çoxunu silməməkdə ittiham edib. Bunların arasında siyasətçilərin, jurnalistlərin və digər tanınmış şəxslərin görüntülərindən istifadə edilən reklamlar da olub.

“Meta” tənqidləri rədd edir

“Meta” dələduzluq məzmunundan qəsdən gəlir əldə etməsi ilə bağlı iddiaları rədd edib və dələduzluqla mübarizənin şirkət üçün prioritet olduğunu bildirib.

Şirkətin məlumatına görə, 2025-ci ilin iyulundan 2026-cı ilin iyununadək Polşada dələduzluqla bağlı qaydaları pozan 137 min reklam silinib. Onların 88 faizindən çoxu istifadəçilər tərəfindən şikayət edilməzdən əvvəl platformadan çıxarılıb.

“Meta” həmçinin süni intellekt əsasında dələduzluq xarakterli reklamları aşkarlayan təkmilləşdirilmiş sistemi istifadəyə verəcəyini açıqlayıb. Polşa bu sistemin ilk tətbiq ediləcəyi Avropa ölkələri sırasındadır.

Avropa Komissiyası Rəqəmsal Xidmətlər Aktı çərçivəsində “Meta”ya qarşı rəsmi araşdırma aparır. Araşdırma şirkətin aldadıcı reklamlarla bağlı siyasət və təcrübələrini də əhatə edir.

Komissiya daha əvvəl bildirib ki, proses çərçivəsində əlavə sübutlar toplana və pozuntular müəyyən edilərsə, müvafiq tədbirlər görülə bilər.

Kopyalandı