Efiopiyada yeddi silahlı qrup Abiy Əhməd hökumətinə qarşı ittifaq yaradıb

Efiopiyada yeddi silahlı qrup, o cümlədən 2020–2022-ci illərdəki vətəndaş müharibəsində bir-birinə qarşı döyüşmüş qüvvələr Baş nazir Abiy Əhmədin hökumətini devirməyi hədəfləyən ittifaq yaradıb.

“Efiopiya Xalqları Qüvvələri Alyansı” yaşamaq uğrunda mübarizə məqsədilə ölkənin müxtəlif bölgələrindən olan qrupları, o cümlədən Tiqray Xalq Azadlıq Cəbhəsini (TPLF) və Amhara Fano Milli Hərəkatını bir araya gətirir. Bununla belə, bəzi üzvlər arasında ərazi və digər məsələlərlə bağlı fikir ayrılıqları qalır.

Abiy Əhmədin sözçüsü Bilene Seyum bildirib ki, qruplar qonşu Eritreyanın maliyyə dəstəyi ilə bir müddətdir əməkdaşlıq edirlər. Eritreya isə oxşar ittihamları dəfələrlə rədd edib.

“Son açıqlama Efiopiya hökumətinin dəfələrlə irəli sürdüyü iddiaları bir daha təsdiqləyir”, – Seyum deyib.

Fano qüvvələri 2020–2022-ci illərdə Tiqray müharibəsində TPLF-yə qarşı federal hökumətlə birlikdə döyüşüb. Müharibə yüz minlərlə insanın ölümü ilə nəticələnib və etnik zəmində ağır zorakılıqlarla müşayiət olunub.

Daha sonra Fano federal hökumətə qarşı silahlı mübarizəyə başlayıb. 2023-cü ildən Amhara bölgəsində davam edən qarşıdurmalarda minlərlə insanın öldürüldüyü bildirilir.

İttifaqa daxil olan qruplar hökuməti hakimiyyəti mərkəzləşdirməkdə və bölgələri təcrid etməkdə ittiham edirlər. Hökumət isə siyasi fikir ayrılıqları və daxili münaqişələrin həlli üçün milli dialoq başladığını bildirir.

İttifaqın bəyanatında üzvlərin “bu rejimi devirmək kimi tarixi məsuliyyət daşıdığı” bildirilib. Bəyanatı Fano lideri Zemene Kassie oxuyub və çıxış TPLF-nin nəzarətində olan “Tigrai TV”də yayımlanıb.

Efiopiyanın media tənzimləyicisi daha sonra ölkədəki xəbər qurumlarına “Tigrai TV”dən mənbə kimi istifadə etməyi qadağan edib.

İttifaqın gücü ilə bağlı suallar

İttifaqa Oromiya, Afar və Benişanqul-Qumuz bölgələrindən olan qruplar da daxildir. Yeni birlik federal qüvvələrlə Tiqray qüvvələri arasında toqquşmaların baş verdiyinə dair məlumatlar fonunda yaradılıb.

Mayda TPLF Tiqrayın siyasi idarəçiliyi üzərində nəzarəti yenidən ələ alıb. “Reuters”in məlumatına görə, bu addım 2022-ci ildə Tiqray müharibəsinə son qoyan sülh sazişinin şərtlərinə zidd olub. TPLF isə federal hökuməti razılaşmanın şərtlərinə əməl etməməkdə ittiham edib.

• Baş nahiyəsindən bitişik efiopiyalı əkizlər uğurla ayrılıb
• Saheldə təhlükəsizlik böhranı: Növbəti hədəf Qərbi Afrika ola bilər

Teqlər

Efiopiya Abiy Əhməd Tiqray Efiopiya hökuməti Afrika xəbərləri