Honkonqda tanınmış fəal Coşua Vonqa 10 il həbs cəzası verilib

Honkonqda tanınmış fəal Coşua Vonqa 10 il həbs cəzası verilib
Tələbə hərəkatının lideri Coşua Vonq Şərq Rayon Məhkəməsinə gələrkən. Honkonq, Çin, 28 avqust 2015-ci il.
Reuters

Honkonqlu demokratiya fəalı Coşua Vonq sentyabrda şəhərin milli təhlükəsizlik qanununa əsasən xarici qurumlarla əlbir olduğunu etiraf etdikdən sonra noyabrın 5-də 10 il həbsə məhkum edilib.

30 yaşlı fəal sürgündə yaşayan Natan Lou və digər şəxslərlə birlikdə xarici hökumətləri və təşkilatları Honkonq və Çinə qarşı beynəlxalq sanksiyalar, blokadalar və digər tədbirlər tətbiq etməyə çağırmaqda ittiham olunub.

İttihama əsasən, bu fəaliyyətlər hökumət əleyhinə aylarla davam edən etirazlardan sonra, 2020-ci ilin iyul-noyabr aylarında həyata keçirilib.

Hökm Çinin Honkonqda milli təhlükəsizlik qanununu tətbiq etməsindən altı il sonra çıxarılıb. Pekin bildirir ki, qanun 2019-cu ildə baş vermiş genişmiqyaslı iğtişaşlardan sonra sabitliyi bərpa etmək üçün zəruri idi.

“Cəza cinayətin ağırlığına uyğun olmalıdır”, – Ali Məhkəmənin hakimi Uilyam Tam hökmü elan edərkən bildirib.

Tamın sözlərinə görə, məhkəmə milli təhlükəsizliyə təhdid yarada biləcək xarici qüvvələrlə əməkdaşlığın nə dərəcədə ciddi əməl olduğunu nəzərə almalıdır.

Hakim bildirib ki, qanunun geriyə qüvvəsi olmasa da, Vonqun ABŞ və Avropa siyasətçiləri ilə əvvəlki görüşləri işin qiymətləndirilməsində nəzərə alınıb.

İttiham tərəfi həmçinin Vonqun rəhbərlərindən biri olduğu, sonradan fəaliyyətini dayandırmış “Demosisto” siyasi partiyasının fəaliyyətinə istinad edib. Partiya Çin və Honkonq hakimiyyətinə qarşı tədbirlər görülməsi üçün beynəlxalq səviyyədə kampaniya aparıb.

Honkonqdakı etiraz hərəkatının tanınmış siması

Vonq Honkonqda demokratiya tərəfdarlarının nümayişlərində iştirakı ilə beynəlxalq səviyyədə tanınıb.

Onun siyasi fəaliyyəti və Qərb rəsmiləri ilə görüşləri Pekinin tənqidinə səbəb olub. Çin hakimiyyəti onu xarici maraqlara xidmət etməkdə ittiham edib.

Vonq 2020-ci ilin noyabrından həbsdədir. Həmin vaxt o, 2019-cu il etirazları zamanı icazəsiz toplantı təşkil etməkdə və insanları həmin toplantıya qoşulmağa çağırmaqda təqsirini etiraf edib.

Vonqun yeni hökmə qədər 2027-ci ildə azadlığa çıxacağı gözlənilirdi.

Noyabrın 5-də keçirilən məhkəmə iclasında Vonq mavi köynək geyinib və tünd çərçivəli eynək taxıb. Onu üç mühafizəçi müşayiət edib. Hakim hökmü elan etməzdən əvvəl Vonq məhkəmə zalındakı izləyicilərə başı ilə işarə edib.

Milli təhlükəsizlik qanunu diqqət mərkəzində qalır

Honkonqun milli təhlükəsizlik qanunu və onun siyasi azadlıqlara təsiri beynəlxalq səviyyədə mübahisə mövzusu olaraq qalır.

Pekin qanunu 2020-ci ilin iyununda, zorakılıqla müşayiət olunan və aylarla davam edən etirazlardan sonra tətbiq edib.

Qanun separatçılıq, dövlət hakimiyyətini devirmə, terrorçuluq və xarici qüvvələrlə əlbir olma kimi əməllərə görə cinayət məsuliyyəti nəzərdə tutur.

Qərb ölkələrinin hökumətləri və beynəlxalq insan hüquqları təşkilatları qanunun siyasi azadlıqları məhdudlaşdırdığını və Honkonqun muxtariyyətini zəiflətdiyini bildirərək onun tətbiqini tənqid edirlər.

Çin hakimiyyəti isə bu ittihamları rədd edir.

Vonq barəsində çıxarılan hökm Honkonqdakı demokratiya hərəkatının tanınmış nümayəndələrinə qarşı açılan cinayət işləri çərçivəsində qəbul edilmiş növbəti məhkəmə qərarıdır.

Teqlər