AFP: Pakistanda polis məntəqəsinə hücumda ölənlərin sayı 31-ə çatıb

Pakistanın şimal-qərbində polis məntəqəsinə hücum nəticəsində ölənlərin sayı 31-ə çatıb. AFP bu barədə polis rəsmisinə istinadən məlumat yayıb.

Rəsmilərin məlumatına görə, 18 sentyabrda polis əməkdaşları və onların ailə üzvləri məsciddə namaz qılarkən hücumçu partlayıcılarla yüklənmiş avtomobili polis məntəqəsinə çırpıb.

Hücum Xeybər-Paxtunxva əyalətinin Kohat rayonundakı “Old Police Lines” polis məntəqəsinin girişində baş verib.

Polisin məlumatına görə, biri intiharçı olmaqla 6 “terrorçu” da öldürülüb.

Partlayış nəticəsində polis məntəqəsində yerləşən məscidin qarşısında çuxur yaranıb.

Xeybər-Paxtunxva polisinin rəhbəri bildirib ki, atışma zamanı “Xüsusi Bölmə”nin binasına daha bir hücum olub.

Əfqanıstan hücumu pisləyib

Əfqanıstan Xarici İşlər Nazirliyinin sözçüsü Əbdül Qəhhar Bəlxi “X” hesabında hücumu “qətiyyətlə” pisləyib.

 

“Əfqanıstan müqəddəs məkanlara hücumları əsaslandırılması mümkün olmayan və qınanmalı əməl hesab edir, bu faciədə həlak olanların ailələrinə dərin hüznlə başsağlığı verir”, — o bildirib.

Bundan başqa, Pakistan təhlükəsizlik qüvvələri ölkənin cənub-qərbindəki Bəlucistan əyalətində keçirdikləri iki əməliyyatda 7 silahlını öldürüb. Bu barədə dövlətə məxsus Radio Pakistan məlumat yayıb.

• Pakistan əfqanıstanlı tibb tələbələrinin ölkədən çıxarılmasını müvəqqəti dayandırıb

Teqlər

Pakistan Təhlükəsizlik qüvvələri polis