“Saudel” tayfunu daşqınlara səbəb olub: Çin güclü yağışlara hazırlaşır

“Saudel” tayfunu Çinin cənubundakı Fucien və Quandun əyalətlərində genişmiqyaslı daşqınlara səbəb olub. Daşqın avtomobilləri aparıb və üçmərtəbəli binanın uçması ilə nəticələnib.

Fucien əyalətinin Fudin şəhərində yanğınsöndürənlər yaşlı sakinlərə kömək etmək üçün belədək çatan daşqın sularında hərəkət ediblər. Yaxınlıqdakı Sinksi kəndində isə daşqınlar evləri su altında qoyub və üçmərtəbəli binanın dağılmasına səbəb olub.

Səlahiyyətli şəxslər bir sıra sahil bölgələrində məktəbləri bağlayıb, ictimai nəqliyyatın fəaliyyətini dayandırıb və daşqınlara qarşı təcili tədbirlər həyata keçirirlər.

Fuciendə 83 mindən çox insan təxliyə olunub. Avqustun sonundan etibarən Çjetszyan və qonşu əyalətlərdə isə yüz minlərlə sakin təhlükəsiz ərazilərə köçürülüb.

“Saudel” Cənubi Çin dənizində gücləndikdən sonra çərşənbə axşamı Fucien sahillərində üçüncü dəfə quruya çıxıb. Bu, cari ildə Çinə çatan yeddinci tayfundur.

Eyni zamanda, bu, iki ay ərzində şərqi Çjetszyan əyalətinin Yuxuan şəhərinə çatan üçüncü tayfundur. Çin Meteorologiya İdarəsi bu ardıcıllığı “fövqəladə dərəcədə nadir” hadisə kimi qiymətləndirib.

“El Nino” ekstremal hava risklərini artırır

Ekspertlər bu qeyri-adi hava hadisələrinin artmasını tayfunların Çinin şərq sahillərinə doğru hərəkətinə təsir göstərə bilən “El Nino” fenomeni ilə əlaqələndirirlər.

BMT xəbərdarlıq edib ki, “El Nino” 2027-ci ilə qədər güclənə və uzunmüddətli ekstremal hava risklərini artıra bilər.

Mütəxəssislər bildirirlər ki, bəzi bölgələrdə çayların səviyyəsi artıq təhlükəli həddə çatıb. Davam edən güclü yağışlar isə torpaq sürüşmələri və digər təkrar fəlakətlərə səbəb ola bilər.

Hong Kong Elm və Texnologiya Universitetinin professoru Hui Su bildirib:

“Bu tayfun mövsümündə daha güclü tayfunların şahidi oluruq. Onlar daha şərqdə formalaşır, daha uzun məsafə qət edir və quruya çatdıqda güclənməkdə davam edirlər”.

O əlavə edib ki, uzunmüddətli isti hava səbəbindən bu il tayfun mövsümü dekabra qədər davam edə bilər.

Kopyalandı