İran: Xamenei raket imkanlarını artırmağı tapşırıb

İran: Xamenei raket imkanlarını artırmağı tapşırıb
Müctəba Xamenei. Görüntüləri İran mediası 24 avqust 2026-cı ildə yayıb.
Reuters

İranın “Bəsic” qüvvələri rəhbərinin müavini, briqada generalı Qasım Qureyşi bildirib ki, ABŞ qüvvələrinin İrandan min və ya iki min kilometr uzaqlaşması onların təhlükəsizliyinə zəmanət vermir.

O, jurnalistlərə bildirib ki, İranın ali rəhbəri Müctəba Xamenei raketlərin uçuş məsafəsinin artırılmasını və dəqiqliyinin yüksəldilməsini tapşırıb. Generalın sözlərinə görə, bu göstərişlər texnika, silahlanma, kəşfiyyat və atəş gücü sahələrində yerinə yetirilib.

Qureyşi xatırladıb ki, əvvəllər bəzi tənqidçilər İranın raket imkanlarına şübhə ilə yanaşır, bu silahları uydurma və ya təsirsiz hesab edirdilər. O bildirib ki, İran Silahlı Qüvvələri zərurət yaranarsa, ali rəhbərin əmrlərini yerinə yetirməyə hazırdır.

Generalın açıqlamalarını müstəqil şəkildə təsdiqləmək mümkün olmayıb.

Ballistik raketlərin uçuş məsafəsinə qoyulan məhdudiyyət ləğv edilib

İranın İslam İnqilabı Keşikçiləri Korpusu (SEPAH) noyabrın 7-də ballistik raketlərin uçuş məsafəsinə qoyulan həddin ləğv edildiyini açıqlayıb. İran uzun müddət bu məsafəni könüllü olaraq 2 min kilometrlə məhdudlaşdırmışdı.

SEPAH-ın sözçüsü, briqada generalı Hüseyn Möhəbbi həmin vaxt İranın hərbi imkanlarını sözlə deyil, əməldə nümayiş etdirəcəyini bildirib. Xamenei bundan əvvəl İranın təhdidlərə cavabını coğrafi baxımdan məhdudlaşdırmayacağını bildirmişdi.

İran rəsmiləri uçuş məsafəsi 2 min kilometri aşan raketlərin yerləşdirildiyini ictimaiyyətə açıqlamayıblar.

Qureyşinin xəbərdarlığı Tehranla Vaşinqton arasında davam edən gərginlik fonunda səslənib. İran mümkün hücumların qarşısını almaq üçün çəkindirmə vasitəsi kimi raket proqramına getdikcə daha çox əhəmiyyət verir.

Teqlər