Fransada məktəb direktorunu və müəllimi yaralayan 14 yaşlı şagird saxlanılıb

Fransanın Marsel şəhəri yaxınlığındakı Oban qəsəbəsində yerləşən Jozef Lakanal məktəbində 14 yaşlı şagird ov tüfəngindən atəş açaraq məktəb direktorunu və bir müəllimi yaralayıb. Rəsmi qurumların məlumatına görə, xəsarət alanların həyatı üçün təhlükə yoxdur.

Məlumata görə, yeniyetmə məktəb binasına gitara çantasında gizlətdiyi ov tüfəngi ilə daxil olub. Birinci mərtəbədə atəş açan şagird 53 yaşlı məktəb direktorunu ayağından və belindən, 37 yaşlı müəllimi isə bud nahiyəsindən yaralayıb. Yaralılar dərhal xəstəxanaya yerləşdiriliblər. Hadisə zamanı başqa bir şəxsin də yüngül xəsarət aldığı, lakin şagirdlər arasında ciddi xəsarət alanın olmadığı bildirilir.

Faciənin qarşısı məktəb əməkdaşı tərəfindən alınıb

Marsel prokuroru Nikolas Bessonenin sözlərinə görə, silahlı şagird daha sonra yuxarı mərtəbəyə qalxaraq iki dəfə də atəş açıb. İlk atəş müəllimin ayaqları altına, ikincisi isə sinif otağındakı yazı lövhəsinə dəyib. Sinifdəki şagirdlər xəsarət almasalar da, böyük həyəcan və şok yaşayıblar.

Yeniyetmə daha böyük faciə törətməyə imkan tapmadan məktəbin nəzarətçisi tərəfindən tərk-silah edilib və hadisə yerinə gələn polis əməkdaşlarına təhvil verilib. Marsel Prokurorluğu faktla bağlı qəsdən adam öldürməyə cəhd maddəsi üzrə cinayət işi açıb. Yeniyetmənin bu addımı hansı motivlə atdığı hələ ki məlum deyil.

Şagirdlər arasında təşviş və təxliyə

Atışma zamanı məktəbdə böyük təşviş yaşanıb. Şagirdlərdən birinin sözlərinə görə, müəllim ilk atəş səsini yaxınlıqdakı tikinti işləri ilə səhv salıb. İkinci atəşdən sonra həyəcan siqnalı işə düşüb və şagirdlər dəhlizlərə qaçaraq binanı tərk etməyə çalışıblar.

Oban şəhərinin meri Jan-Pier Skillari şagirdlərin saniyələr ərzində təhlükəsiz yerə təxliyə edildiyini, hadisədən sarsıntı keçirənlər üçün psixoloji yardım qrupunun yaradıldığını bəyan edib.

Prezident Makrondan operativ reaksiyaya təqdir

Fransa prezidenti Emmanuel Makron zərərçəkənlərə, şagirdlərə və valideynlərə dəstəyini ifadə edərək faciənin qarşısını alan məktəb heyətinin operativ addımlarını yüksək qiymətləndirib:
“Təhsil heyətinin soyuqqanlılığını və nümunəvi reaksiyasını təqdir edirəm. Məhz onların sayəsində daha böyük faciənin qarşısı alındı”, — deyə Makron “X” hesabında yazıb.

Fransanın təhsil naziri Eduard Jefre hadisəni cəmiyyətdə artan zorakılığın təzahürü kimi qiymətləndirib. Onun daxili işlər naziri Loran Nunyeslə birgə məktəbə baş çəkilməsi planlaşdırılır.
Hücumun dəqiq səbəbləri ilə bağlı istintaq tədbirləri davam etdirilir.

• Fransada iki məşhur rəsm əsərinin oğurlanmasına görə 4 nəfər ittiham olunur

• “Air France”ın İsrailə uçuşlarda heyətə məhdudiyyət qoyduğu bildirilir

Teqlər

Fransa müəllim məktəb direktoru yeniyetmə odlu silah Marsel Oban