İran ABŞ-yə nüvə təklifi göndərib, danışıqlar üçün yeddi şərt qoyub

İran Qətər vasitəsilə ABŞ-yə nüvə proqramı ilə bağlı təklif göndərib. Adının açıqlanmasını istəməyən yüksəkvəzifəli İran rəsmisi “Reuters”ə bildirib ki, təklif yalnız Vaşinqton Tehranın yeddi tələbini yerinə yetirdikdən sonra müzakirə olunacaq.

Vasitəçilər ABŞ-də keçirilən aralıq seçkilərdən sonra döyüşlərin yenidən başlayacağına dair narahatlıqlar fonunda İranla ABŞ arasında müharibəyə son qoymaq üçün səylərini artırıblar.

ABŞ Prezidenti Donald Tramp noyabrın 3-də seçkilərdən sonra hərbi əməliyyatların bərpası ehtimalını istisna etməyib.

“Fox News”un məlumatına görə, Tramp İrana yenidən hücum etmək imkanını nəzərdən keçirir. ABŞ-nin yüksəkvəzifəli rəsmiləri telekanala bildiriblər ki, Prezident noyabrın 5-də milli təhlükəsizlik komandasının üzvləri ilə görüşərək mümkün variantları müzakirə edib.

İran yeddi şərtinin yerinə yetirilməsində israr edir

İranın yüksəkvəzifəli təhlükəsizlik rəsmisi Möhsün Rzayi noyabrın 5-də Rusiyaya səfəri zamanı ABŞ ilə danışıqların başlanması üçün Tehranın irəli sürdüyü şərtlərin yerinə yetirilməsində israr edib.

“Diplomatiya məsələsində amerikalılara yeddi şərt irəli sürmüşük. Onlar bu şərtləri yerinə yetirməyənədək nə Hörmüz boğazını açacağıq, nə də danışıqlara başlayacağıq”, – deyə o bildirib.

İranın tələbləri arasında ABŞ sanksiyalarının ləğvi, ölkənin dondurulmuş aktivləri üzərindəki məhdudiyyətlərin aradan qaldırılması və müharibəyə görə təzminat ödənilməsi də var.

İranın dövlət mediasının noyabrın 5-də yaydığı məlumata görə, Rzayi Moskvada ölkənin Ali Rəhbəri Müctəba Xameneinin mesajını Rusiya Prezidenti Vladimir Putinə çatdırıb. Mesajın məzmunu açıqlanmayıb.

Vaşinqton isə ilkin danışıqlarda nüvə məsələlərinin də müzakirə olunmasını tələb edir.

Tehran nüvə proqramının yalnız dinc məqsədlər daşıdığını bəyan edir.

Münaqişə Yaxın Şərqin digər ölkələrinə də yayılıb

ABŞ və İsrail fevralın 28-də İrana hücumlar həyata keçirib. Tehran buna cavab olaraq İsrailə və ərazisində ABŞ hərbi bazalarının yerləşdiyi Körfəz ölkələrinə zərbələr endirib.

Livanda da İranın dəstəklədiyi “Hizbullah” hərəkatı ilə İsrail arasında döyüşlər başlayıb.

Son vaxtlar münaqişə Yəmənə də yayılıb. İranın dəstəklədiyi husilər Səudiyyə Ərəbistanında enerji obyektlərinə, hava limanlarına və digər hədəflərə hücumlar həyata keçiriblər.

Noyabrın 5-dən 6-na keçən gecə Səudiyyə Ərəbistanının Mülki Müdafiə Xidməti Nəcran bölgəsində təhlükə barədə xəbərdarlıq yayıb. Sonra isə qurum təhlükənin aradan qalxdığını bildirib.

• Zelenski İspaniyaya səfərində enerji infrastrukturu və hava müdafiəsi üçün dəstək istəyib

• Heqsetin vəzifədən azad etdiyi keçmiş admiral Nensi Lakor Cənubi Karolinada seçkilərdə qalib gəlib

• İordaniyada bıçaqlı hücum nəticəsində bir polis əməkdaşı ölüb

Teqlər

İran ABŞ nüvə proqramı Tehran Vaşinqton İran-ABŞ münasibətləri