Yaponiya: “Dujuan” tayfunu yaxınlaşır, torpaq sürüşməsi ilə bağlı xəbərdarlıq və təxliyə göstərişləri verilib

Yaponiya Meteorologiya Agentliyinin məlumatına görə, sentyabrın 21-də ölkənin Sakit okean sahillərinə yaxınlaşan güclü “Dujuan” tayfunu Tokio da daxil olmaqla Kanto regionunda leysanlara və güclü küləyə səbəb olub.

Güclü yağışlar torpaq sürüşməsi riskini artırıb.

Tayfunun gün ərzində Tokio və ətraf ərazilərin yaxınlığından keçəcəyi, hava şəraitinin isə sürətlə pisləşə biləcəyi bildirilib. İzu adalarında və ölkənin Sakit okean sahillərinin bəzi hissələrində artıq güclü yağışlar qeydə alınıb. Sentyabrın 19-dan bəzi ərazilərdə yağıntının miqdarı 300 millimetri ötüb.

Tokiodan təxminən 110 kilometr cənubda, İzu adaları qrupunda yerləşən Oşima adası üçün torpaq sürüşməsi ilə bağlı ən yüksək səviyyəli fövqəladə xəbərdarlıq elan edilib. Meteorologiya Agentliyi tayfun Kantoya yaxınlaşdıqca sentyabrın 21-də günortadan sonra yağışların güclənə biləcəyini bildirib.

NTV telekanalının Yanğın və Fəlakətlərin İdarə Olunması Agentliyinə istinadən verdiyi məlumata görə, yerli vaxtla saat 15:00-dək Tokio və ətraf prefekturalarda 1 milyon 670 min sakini əhatə edən təxliyə göstərişləri verilib.

Rəsmilər dar ərazilərdə bir neçə saat ərzində intensiv yağıntıya səbəb ola bilən yağış zolaqlarının yarana biləcəyi barədə də xəbərdarlıq ediblər. Belə yağıntılar qəfil daşqınlara və digər fəsadlara səbəb ola bilər.

Tayfun iri tədbirlərin keçirilməsinə də təsir göstərib. Aiçi prefekturasında keçirilən Asiya Oyunlarının təşkilatçıları hava şəraitinə görə atçılıq üzrə üçnövçülük yarışlarını sentyabrın 22-nə təxirə salıblar.

“Dujuan” tayfunu yaxınlaşarkən güclü dalğalar sahilə çırpılır. Kamakura, Kanaqava prefekturası, Yaponiya, 21 sentyabr 2026-cı il.

Reuters/Kyodo/Japan Out

Baş nazir Sanae Takaiçinin BMT Baş Assambleyasının sessiyasında iştirak etmək üçün Nyu-Yorka səfəri tayfun səbəbindən dörd saat gecikdirilib. Onun Tokiodan yerli vaxtla saat 23:00-da yola düşəcəyi gözlənilir.

Kopyalandı