Oman və İran Hörmüz boğazında gəmiçiliyin təhlükəsizliyini müzakirə edib

Oman və İran Hörmüz boğazında gəmiçiliyin təhlükəsizliyini müzakirə edib
İranın xarici işlər naziri Abbas Əraqçi Omanın xarici işlər naziri Bədr əl-Busaidi ilə görüşür. Oman, 17 noyabr 2026-cı il.
Bədr əl-Busaidinin “X” sosial şəbəkəsindəki hesabı

Oman və İran noyabrın 17-də Hörmüz boğazında gərginliyin artdığı bir vaxtda gəmiçiliyin təhlükəsizliyini, ticarətin davamlılığını və diplomatik danışıqların bərpasını müzakirə ediblər.

Oman Xarici İşlər Nazirliyinin məlumatına görə, görüş İranın xarici işlər naziri Abbas Əraqçinin ölkəyə səfəri zamanı keçirilib. Hörmüz boğazının cənub sahili Oman ərazisində yerləşir.

Oman fevralın 28-də ABŞ və İsrailin İrana endirdiyi zərbələrlə başlayan münaqişədə vasitəçilik edir.

Hörmüz boğazında neft tankerlərinə hücumlar artıb. İran boğazda gəmiçiliyin hərəkətini məhdudlaşdırır, ABŞ isə İran limanlarının dəniz blokadasını davam etdirir.

“Reuters”in noyabrın 11-də yaydığı məlumata görə, noyabrın ilk 10 günündə azı 10 gəmi zərbəyə məruz qalıb. Vaşinqton Yaxın Şərq Siyasəti İnstitutunun məlumatına əsasən, oktyabrda 37 hücum baş verib. Bu, münaqişə başlayandan bəri ən yüksək aylıq göstəricidir.

“Reuters” noyabrın 8-də Oman sahilləri yaxınlığında “Navig8” şirkətinə məxsus tankerin yandığını göstərən görüntülərin həqiqiliyini də təsdiqləyib. İran həmin gün üç tankerə zərbə endirdiyini açıqlayıb. Tehran bu gəmiləri Hörmüz boğazında icazə verilməyən marşrutlardan istifadə etməkdə ittiham edib.

Hücumlar ətraf mühitə də ziyan vurub. Yayılan videolarda neftin Oman sahillərinə çatdığı görünür. Peyk görüntülərində isə Oman və Birləşmiş Ərəb Əmirliklərinin sahilləri yaxınlığında neft sızmaları aşkarlanıb.

Beynəlxalq Dəniz Təşkilatının məlumatına görə, fevralın sonundan bəri regionda əksəriyyəti hücumlarla bağlı olan 133 insident qeydə alınıb. Bu müddətdə azı 25 dənizçi həlak olub.

Hörmüz boğazının təhlükəsizliyi əsas mübahisəli məsələlərdəndir

Münaqişədən əvvəl dünya üzrə enerji təchizatının təxminən beşdəbiri Hörmüz boğazından keçirdi. Bu strateji su yolunun təhlükəsizliyi təxminən doqquz aydır davam edən münaqişənin həlli istiqamətində əsas maneələrdən biri olaraq qalır. Diplomatik səylər isə hələlik ciddi nəticə verməyib.

Hörmüz boğazında hərəkət edən gəmilər. Oman, 17 noyabr 2026-cı il.
Reuters

Teqlər